މޫސުމީ ބަދަލުތަކުގެ ސަބަބުން ކުރިމަތިވާ ގެއްލުންތަކުގެ ވާހަކަ ދައްކަވަނީ ހަމައެކަނި ރާއްޖޭގެ ހައްގުގައި ނޫން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ސީއެންއެންއަށް ދެއްވި އިންޓަރވިއުއެއްގައި ނަޝީދު ވިދާޅުވީ، 'ކްލައިމެޓް ވަލްނަރަބްލް ފޯރަމް'ގައި އެމަނިކުފާނު ތަމްސީލު ކުރައްވަނީ، މޫސުމީ ބަދަލުތަކުގެ ސަބަބުންވާ ގެއްލުމުގެ އަސަރު އެންމެ ބޮޑަށް ކުރާ 48 ގައުމު ކަމަށެވެ. ބަންގްލަދޭޝްގެ ބޮޑުވަޒީރު ޝެއިޚް ހަސީނާ ރިޔާސަތު ބަލަހައްޓަވާ އެ ފޯރަމްގައި އެ 48 ގައުމުގެ ހައްގުގައި އެމަނިކުފާނު ވާހަކަފުޅު ދައްކަވާ ކަމަށް ވިދާޅުވިއެވެ. މި 48 ގައުމަކީވެސް މޫސުމީ ނުރައްކާ އޮތް ގައުމުތައްކަން ފާހަގަ ކުރައްވަމުން ވިދާޅުވީ، ބޮޑެތި ގައުމުތަކުގައި މޫސުމީ ބަދަލުތަކާއެކު އަމިއްލަ ގެދޮރުން ނުކުމެ ހިކިފަސްތަނެއް ހޯދުމުގެ މަސައްކަތް ފެށިދާނެ ކަމަށެވެ. އެހެންނަމަވެސް ކުދި ޖަޒީރާ ގައުމުތަކުގައި އެހެން ހޯދާނެ ބިމެއް ނޯންނާނެ ކަމަށެވެ. އަދި އެކަމަށް އުންމީދުވެސް ނުކުރެވޭނެ ކަމަށެވެ.

ސާފު ދުޅަހެޔޮ ވެއްޓެގައި ދިރިއުޅުން އެއީ އިންސާނީ ހައްގެއްގެ ގޮތުގައި ކަނޑައެޅުމަށް ރާއްޖެ ހިމެނޭ ގޮތަށް ކުދި ޖަޒީރާ ގައުމުތައް ގުޅިގެން އދގެ ހިއުމަން ރައިޓްސް ކައުންސިލަށް ހުށަހެޅި، ރިސޮލިއުޝަން ފާސްވުމާ ގުޅުވައިގެން ނަޝީދު ވިދާޅުވީ، ކާރިސާއެއް ދިމާވެ އަމިއްލަ ގެދޮރު ގެއްލޭ ދަނޑިވަޅުގައި އދ އިން އެކަން ވީގޮތް ބެލުމަށް އެދޭ ކަމަށެވެ.

ރާއްޖޭގެ 90 އިންސައްތަ ރަށުގައި ފެން ފަށަލަ ތަޣައްޔަރުވެ ރަށް ގިރުމުގެ މައްސަލަވެސް ދިމާވެފައިވާކަމަށް ވިދާޅުވިއެވެ.

"ވޯލްޑް މަޖިލިސް 2.0 އެކްސްޕޯ"ގައިވެސް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ބައިވެރިވެވަޑައިގެންނެވިއެވެ. މި އެކްސްޕޯ ބާއްވާފައިވަނީ ދުބާއީގައި މިހާރު ކުރިއަށްދާ "އެކްސްޕޯ 2020" ހަވާސާގެ ތެރެއިންނެވެ. މިމަހުގެ އެއްވަނަ ދުވަހުން ފެށިގެން "އެކްސްޕޯ 2020"ގައި ކުރިއަށްދާ މި އެކްސްޕޯގައި މިމަހުގެ 3ވަނަ ދުވަހުން ފެށިގެން 9ވަނަ ދުވަހާއި ހަމައަށް ޚާއްސަކޮށްފައިވަނީ "ކްލައިމެޓް އެންޑް ބަޔޯޑައިވަރސިޓީ ވީކް"ގެ ގޮތުގައެވެ. މިމަހުގެ 7 ވަނަ ދުވަހު ބޭއްވި އެކްސްޕޯގައި ރައީސް ނަޝީދު ބައިވެރިވެވަޑައިގެން، ޒަމާނީ ޓެކްނޮލޮޖީގެ އެހީގައި މޫސުމީ ބަދަލުތަކުގެ ސަބަބުން ދުނިޔޭގެ ތިމާވެއްޓަށް ކުރާ ނޭދެވޭ އަސަރު ކުޑަކުރުމަށާއި، އެކަންކަން ހުއްޓުވުމަށް ކުރެވިދާނެ މަސައްކަތްތަކާ ގުޅޭގޮތުން ވާހަކަފުޅު ދެއްކެވިއެވެ.

"ވޯލްޑް މަޖިލިސް 2.0 އެކްސްޕޯ"ގެ މައިގަނޑު ޝިއާރެއްގެގޮތުގައި ކަނޑައަޅާފައިވަނީ "ރީ-އިންޖިނިއަރިން ޕްލެނެޓް އާރތް" މި ޝިއާރެވެ. ދުބާއީގައި ކުރިއަށްދިޔަ މި އެކްސްޕޯ ބާއްވާފައިވަނީ ދިވެހިރާއްޖެއާއި ގުޅިގެންނެވެ. ރައީސް ނަޝީދުގެ އިތުރުން، މިފަހަރުގެ އެކްސްޕޯގައި ސްޕީކަރުންގެ ގޮތުގައި ޔޫ.އޭ.އީގެ ނެޝެނަލް ސެންޓަރ ފޯރ މީޓިއޮރޮލޮޖީގެ ޑިރެކްޓަރ ޖެނެރަލާއި، ޔޫ.އޭ،އީގެ ފަރާތުން އިންޓަރނޭޝަނަލް ރިނިއުއަބަލް އެނަރޖީ އެޖެންސީ، އައިރީނާއަށް ކަނޑައަޅާފައިވާ ދާއިމީ މަންދޫބާއި، ޕޯޗުގަލްގެ ސެކްރެޓަރީ އޮފް ސްޓޭޓް ފޯރ އެންވަޔަރަމަންޓްގެ އިތުރުން ޖިއޯ ސައިންސްގެ ދާއިރާއާއި އެންވަޔަރަމަންޓަލް ސައިންސްގެ ދާއިރާއިން ފާހަގަކޮށްލެވޭ ދެ ޕްރޮފެސަރަކުވެސް ވަނީ އެބޭފުޅުން ތަޖުރިބާއާއި، ޚިޔާލާ މަޝްވަރާތައް ފޯރަމްގެ ތެރެއިން ހިއްސާކުރައްވާފައެވެ.