ރާއްޖޭގެ ސްކޫލްތަކުގައި ކިޔަވައިދޭ ޓީޗަރުންގެ އާބާދީގެ 20 އިންސައްތައަކީ ބިދޭސީން ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ތަފާސް ހިސާބުން ދައްކައިފިއެވެ.

މޯލްޑިވްސް ބިއުރޯ އޮފް ސްޓެޓިސްޓިކްސްއިން އާންމުކޮށްފައިވާ ތަފާސްހިސާބުތައް ދައްކާގޮތުން ރާއްޖޭގެ ސްކޫލުތަކުގައި 10615 ޓީޗަރުން ދަނީ ވަޒީފާ އަދާކުރަމުންނެވެ. އޭގެ ތެރެއިން 28 އިންސައްތައަކީ ފިރިހެނުންނެވެ. އަދި 72 އިންސައްތައަކީ އަންހެނުންނެވެ. ރާއްޖޭގައި ކުދިންގެ ނިސްބަތަށް ޓީޗަރުން ތިބޭ އަދަދަށް ބަލާއިރު، ކޮންމެ 9 ކުއްޖަކަށް ޓީޗަރެއް ހުރެއެވެ. އަތޮޅުތަކުގެ ރަށްރަށުގައި ކޮންމެ 7 ދަރިވަރަކަށް އެއް ޓީޗަރަކު ހުންނައިރު، މާލޭގައި ކޮންމެ 12 ދަރިވަރަކަށް ހުންނާނީ އެއް ޓީޗަރެކެވެ.

މޯލްޑިވްސް ބިއުރޯ އޮފް ސްޓެޓިސްޓިކްސްއިން ބުނެފައިވަނީ އަތޮޅުތެރޭގައި 5965 ދިވެހި ޓީޗަރުން ހަރަކާތްތެރިވާ ކަމަށާއި، މާލޭގައި 2536 ދިވެހި ޓީޗަރުން ހަރަކާތްތެރިވާ ކަމަށެވެ. ރާއްޖޭގައި ކިޔަވައިދޭ ޓީޗަރުންގެ 20 އިންސައްތަ އަކީ ބިދޭސީން ކަމަށް ތަފާސްހިސާބުތަކަށް ދައްކައެވެ. އޭގެ ތެރޭގައި ހިމެނެނީ މާލޭގައި ހަރަކާތްތެރިވާ 377 ޓީޗަރުންނާއި އަތޮޅުތެރޭގައި ހަކަރާތްތެރިވާ 1737 ޓީޗަރުންނެވެ.

މުޅި ރާއްޖޭގެ ޓީޗަރުންގެ ނިސްބަތަށް ބަލާއިރު، ސްކޫލްތަކުގައި ކިޔަވައިދެމުން އަންނަ ކޮންމެ 10 ޓީޗަރުންގެ ތެރެއިން 7 ޓީޗަރުންނަކީ އަންހެނުންނެވެ. މީގެ ތެރެއިން 80 އިންސައްތަ ޓީޗަރުން ވަނީ ތަމްރީންވެފައެވެ. އަދި 20 އިންސައްތަ ޓީޗަރުން ތަމްރީނުވެ، ސްކޫލްތަކުގައި ކިޔަވައިދިނުމަށް ހަރަކާތްތެރިވާ ކަމަށް ތަފާސްހިސާބުތަކުން ދައްކައެވެ.