ކޮވިޝީލްޑް ވެކްސިން ޖަހައިގެން ވެސް ކަރަންޓީނު ނުވެ ޔޫކޭއަށް ދަތުރު ކުރެވޭގޮތް ހަދައިފި
ރާއްޖެ ހިމެނޭ ގޮތަށް 47 ޤައުމެއް އެ ޤައުމުގެ ރެޑް ލިސްޓުން އުނިކޮށްފައިވޭ
ޔޫކޭ- އެ ޤައުމުގެ ރެޑް ލިސްޓުން ވެސް މިހާރު ރާއްޖެ ވަނީ އުނިކޮށްފައި
އެސްޓްރަޒެނެކާގެ ކޮވިޑް-19 ވެކްސިން ފޯމިއުލާއަށް އުފައްދާފައިވާ ކޮވިޝީލްޑް ވެކްސިން ޖަހައިގެން ވެސް ކަރަންޓީނު ނުވެ އިނގިރޭސިވިލާތް (ޔޫކޭ)އަށް ދަތުރު ކުރެވޭގޮތް ހަދައިފިއެވެ.
މިއީ ރާއްޖެއާއި ޔޫކޭއާ ދެމެދުގެ ދަތުރުފަތުރަށް ހުރި ހުރަސްތަކުގެ ތެރެއިން އެންމެ ފަހު ހުރަސް ނައްތާލެވުން ކަމުގައި ޔޫކޭއިން ރާއްޖެއަށް ކަނޑައަޅާފައި ހުންނަވާ ހައިކޮމިޝަނަރ ކެރޮން ރޮސްލާ ކުރެއްވި ޓްވީޓެއްގައި ވަނީ ސިފަ ކުރައްވާފައެވެ. އެގޮތުން ދާދި ފަހުން ޔޫކޭއިން ވަނީ މަހެއްހާ ދުވަހަށްފަހު އެ ޤައުމުގެ ރެޑް ލިސްޓުން ރާއްޖޭގެ ނަން އުނިކޮށްފައެވެ.
އޭރު ކަނޑައަޅާފައި އޮތީ ރާއްޖެ ހިމެނޭ ގޮތަށް ރެޑް ލިސްޓުން އުނިކުރި 8 ޤައުމުން ވެސް ޔޫކޭއަށް ދާ ފަތުރުވެރިން ވެކްސިންގެ ދެ ޑޯޒް ފުރިހަމަ ކޮށްފައިވާނަމަ ޕީސީއާރް ޓެސްޓަކާ ނުލާ ދަތުރު ކުރެވޭނެ ކަމަށާއި، އެ ގައުމަށް އެތެރެވާތާ 2 ދުވަސް ތެރޭގައި ޓެސްޓް ހެދުމަށް ފަސޭހަ އިންތިޒާމުތަކެއް ހަމަޖެއްސުމަށް މަސައްކަތް ކުރަމުންދާ ކަމަށެވެ. އަދި ރެޑް ލިސްޓްގަައި ނުހިމެނޭ ގައުމުތަކުން ދަތުރުކުރާ މީހުންނަށް އަމިއްލަ ގޭގައި ނުވަތަ ބޭނުންވާ ތަނެއްގައި ކަރަންޓީން ވުމުގެ ފުރުސަތު އޮންނާނެ ކަމަށް އޭރު އެ ޤައުމުން ކަނޑައެޅިއެވެ.
އެހެންނަމަވެސް މިހާރު މިވަނީ ރާއްޖޭގެ ވެކްސިން ޕްރޮގްރާމް ފުރިހަމަ ކޮށްފައިވާ ފަރާތްތަކަށް 11 އޮކްޓޯބަރު ވާ ހޯމަ ދުވަހުގެ ފަތިހު 04:00ން ފެށިގެން ކަރަންޓީނު ވުމެއްނެތި ޔޫކޭއަށް ދަތުރު ކުރެވޭގޮތް ހަމަޖައްސާފައެވެ.
ރާއްޖޭގެ ބްރިޓިޝް ހައިކޮމިޝަނުން މައުލޫމާތު ދޭ ގޮތުގައި ކޮވިޝީލްޑް ވެކްސިނާއި، އެސްޓްރަޒެނެކާ ވެކްސިންގެ އިތުރުން ފައިޒަރ ވެކްސިން ޖަހާފައިވާނަމަ ކަރަންޓީނު ނުވެ ދަތުރު ކުރެވޭ ގިންތިއަށް އެމީހަކު ފެތެއެވެ.
ޔޫކޭއިން ވަނީ ރާއްޖެ ހިމެނޭ ގޮތަށް 47 ޤައުމެއް އެ ޤައުމުގެ ރެޑް ލިސްޓުން އުނިކޮށްފައެވެ. ޔޫކޭ ހިމެނެނީ ރާއްޖެއަށް އެންމެ ގިނައިން ފަތުރުވެރިން އަންނަ މަންޒިލްތަކުގެ ތެރޭގައެވެ. އެހެންކަމުން ރެޑް ލިސްޓުން ރާއްޖެ އުނިވުމާއެކު ފަތުރުވެރިންގެ ޑިމާންޑް އަންނަނީ އިތުރުވަމުންނެވެ.
