ބޮޑުތަކުރުފާނު ކުރެއްވި ޖިހާދުގެ ވާހަކައަށް ފިލްމެއް!
އަންނަ އަހަރުގެ ޤައުމީ ދުވަހަށް ފިލްމް ގެނެސްދިނުމަށް ވަނީ އަމާޒު ހިފާފައި
މުޙައްމަދު ތަކުރުފާނުގެ ޤައުމީ ޖިހާދުގެ މައްޗަށް އުފައްދާ ފިލްމު އިފްތިތާޙުކުރުން
މުޙައްމަދު ތަކުރުފާނުގެ ޤައުމީ ޖިހާދުގެ މައްޗަށް ފިލްމެއް އުފައްދަން މިނިސްޓްރީ އޮފް ހޯމްއެފެއާޒުން ނިންމައިފިއެވެ.
ބުރާސްފަތި ދުވަހު ފާހަގަކުރަމުން މިދާ ޤައުމީ ދުވަހުގެ މުނާސަބަތުގައި, މުޙައްމަދުތަކުރުފާނު ނިސްބަތްވެވަޑައިގަންނަވާ ހއ. އުތީމުގައި ބޭއްވި ޖަލްސާގައި މި ފިލްމް ވަނީ އިފްތިތާޙުކޮށްފައެވެ. އަންނަ އަހަރުގެ ޤައުމީ ދުވަހަށް ފިލްމް ގެނެސްދިނުމަށް މިނިސްޓްރީން ވަނީ އަމާޒު ހިފާފައެވެ.
މިފިލްމާ ގުޅޭގޮތުން މިނިސްޓަރ އޮފް ހޯމްއެފެއާޒް ޢިމްރާން ޢަބްދުﷲ ވިދާޅުވީ މި ފިލްމަކީ ބޮޑުތަކުރުފާނު ކުރެއްވި މަތިވެރިވެގެންވާ ޖިހާދާއި ޤުރުބާނީތައް، މި ޒަމާނުގެ ވިސްނުންތަކާއި އެއްގޮތަށް ޒަމާނުގެ ލޯތަކަށް ޅަދަރިންނާ ހަމައަށް ގެނެސްދިނުމަށްޓަކައި ފެށި ވަރަށް ބޮޑު ޕްރޮޖެކްޓެއްކަމަށެވެ. މިއީ ވަރަށް މުހިއްމު މަސައްކަތެއްކަން ފާހަގަކުރައްވައި, މިމަސައްކަތުގައި ފުރިހަމަ އެއްބާރުލުން ދެއްވުމަށް މިނިސްޓަރ އެދިވަޑައިގެންނެވިއެވެ.
ބޮޑުތަކުރުފާނުގެ ވާހަކައަށް އިޝާރާތްކުރައްވާ މިނިސްޓަރ ވިދާޅުވީ ފަސް ފަހަރު އެވާހަކަ އެއްކޮޅުން އަނެއްކޮޅަށް ވިދާޅުވިކަމަށެވެ. ކޮންމެ ފަހަރަކުމެ ކިޔަމުންދާއިރު އެކުރެއްވި ބޮޑު ޖިހާދުގެ ވަރުގަދަ ޤުރުބާނީގެ އާވިސްނުންތަކަކާއި އައު އިހުސާސްތަކެއް ކުރެވޭކަމަށް ވިދާޅުވިއެވެ.
"އޭގެ ކޮންމެ ހާދިސާއަކީ އޭގެ މައްޗަށް ފުންކޮށް ނަޒަރުހިންގައި ވިސްނާލާއިރު އެއިން ބޮޑެތި ޢިބްރަތްތަކެއް ލިބެނިވި, ދީނާ ޤައުމަށްޓަކައި އަމިއްލައަށް ޤުރުބާންވާންޖެހޭކަމުގެ ފުރިހަމަ އިހުސާސްތައް ރަމްޒުކޮށްދޭ ކިތަންމެ މިސާލެއް." މިނިސްޓަރ ވިދާޅުވިއެވެ.
މިފިލްމް ޑައިރެކްޓް ކޮށްދެއްވާނީ މަޝްހޫރު ޑައިރެކްޓަރ އަޝްހަރު ވަޙީދެވެ.
