އދ.ގެ މުހިންމު ބައްދަލުވުންތަކުގައި ބައިވެރިވެވަޑައިގެންދެއްވުމަށް ރައީސްގެ އަރިހުން އެދިވަޑައިގެންފި
އަންނަ އަހަރުގެ ޖެނުއަރީ މަހު، ވެކްސިނާ ބެހޭ ޚާއްސަ ބައްދަލުވުމެއް ބާއްވާނެ
ރައީސުލްޖުމްހޫރިއްޔާގެ ދެކަނބަލުންގެ ފަރާތްޕުޅުން ޝާހިދުގެ ޝަރަފުގައި ދެއްވި ރަސްމީ ޖާފަތް
އދ.ގެ މުހިންމު ބައްދަލުވުންތަކުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ބައިވެރިވެވަޑައިގެންދެއްވުމަށް ފޮރިން މިނިސްޓަރ އަދި އދ.ގެ އާންމު މަޖިލީހުގެ 76 ވަނަ ސެޝަންގެ ރައީސް ޢަބްދުﷲ ޝާހިދު އެދިވަޑައިގެންފިއެވެ.
ޝާހިދު މިފަދައިން ވިދާޅުވީ ރައީސްގެ ދެކަނބަލުންގެ ފަރާތްޕުޅުން އެމަނިކުފާނުގެ ޝަރަފުގައި ދެއްވި ރަސްމީ ޖާފަތުގައި ވާހަކަފުޅު ދައްކަވަމުންނެވެ.
މި ޖާފަތުގައި ވާހަކަދައްކަވަމުން ޝާހިދު ވިދާޅުވީ, އެމަނިކުފާނުގެ އިސްނެންގެވުމުގެ މަތިން ކުރިއަށް އޮތް އަހަރުގެ ތެރޭގައި ކުރަން ގަސްތުކުރާ ބޮޑެތި ކަންކަމުގެ ތެރެއިން އެއްކަމަކީ އަންނަ ޖެނުއަރީ މަހުގެ ތެރޭގައި އދ.ގައި ބާއްވަން ގަސްތުކުރާ, ވެކްސިނާ ބެހޭ ޚާއްސަ ބައްދަލުވުން ކަމަށެވެ. އެ ބައްދަލުވުމުގެ މަގުސަދަކީ 2022 ވަނަ އަހަރުގެ ނިޔަލަށް ދުނިޔޭގެ އެންމެންނަށް ވެކްސިން ދިނުމަށް މަސައްކަތްކުރުން ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އަންނަ އަހަރު ނިމުމުގެ ކުރިން ދުނިޔޭގެ އެންމެންނަށް ވެކްސިން ދީ ނިންމުމަކީ ކުރެވިދާނެ ކަމެއް ކަމަށެވެ. މިކަން ކުރުމަށް ބޭނުންވަނީ ދުނިޔޭގެ ވެރިން އެގޮތަށް މަސައްކަތް ފެއްޓެވުން ކަމަށް ޝާހިދު ވިދާޅުވިއެވެ.
މި ބައްދަލުވުމުގެ އިތުރުން, ތިމާވެއްޓަށް ލިބެމުންދާ ގެއްލުންތަކާ ގުޅޭގޮތުންވެސް ދެ ބައްދަލުވުމެއް ބާއްވަން ގަސްތުކުރައްވާކަމަށް ޝާހިދު ވިދާޅުވިއެވެ. އެއީ މިއަހަރުގެ އޮކްޓޯބަރު 26 ވަނަ ދުވަހު ބާއްވާ ބައްދަލުވުމަކާއި، އަންނަ އަހަރުގެ ޖުލައި މަހުގެ ފަހުކޮޅު ބާއްވާ ބައްދަލުކުރެއްވުމެއް ކަމަށް ޝާހިދު ވިދާޅުވިއެވެ.
ރައީސުލްޖުމްހޫރިއްޔާ އދ.ގެ މަޖިލީހަށް ވަޑައިގެންދެއްވާނެކަމަށް އުންމީދުކުރައްވާ ކަން ހާމަކުރައްވައި ޝާހިދު ވަނީ, މިއިން ކޮންމެ ބައްދަލުކުރެއްވުމުގައިވެސް ރާއްޖޭގެ ފަރާތުން ރާއްޖޭގެ އެންމެ މަތީ ވެރިޔާގެ އަޑުފުޅު ދުނިޔެއަށް އިއްވައިދިނުމަށް އެދިވަޑައިގެންފައެވެ.
