ގާނޫނީ ވަކީލުން ހޯދުމުގައި އެހީތެރިކަންދޭ ވެބްސައިޓެއް!
މިސައިޓް މެދުވެރިކޮށް ގާނޫނީ ވަކީލުން އައްޔަންކުރުމުގެ ހުރިހާ ކަމެއް ހިންގޭނެ
ގާނޫނީ ވަކީލުން ހުވާކުރުމުގެ ރަސްމިއްޔާތެއްގެ ތެރެއިން
ޤާނޫނީ ވަކީލުން ހޯދުމުގައި އެހީތެރިކަން ފޯރުކޮށްދޭ ވެބްސައިޓެއް ލޯންޗްކޮށްފިއެވެ.
ލޯޔަރސްއެމްވީ.ކޮމް ގެ ނަމުގައި އުފައްދާފައިވާ މިވެބްސައިޓުގައި ދިވެހިރާއްޖޭގައި ޤާނޫނީ ވަކީލުންގެ ގޮތުގައި މަސައްކަތްކުރާ ފަރާތްތަކުގެ މަޢުލޫމާތު ހިމެނިފައިވެއެވެ.
ލޯޔަރސްއެމްވީ ގެ ޕްރޮޖެކްޓް މެނޭޖަރ އަޙްމަދު ނަސީރު ވިދާޅުވީ، މި ޚިދުމަތަކީ ޤާނޫނީ ވަކީލުންގެ އެހީތެރިކަން ފުރިހަމައަށް ލިބުމުގައި ހުރި ދަތިތައް ދިރާސާ ކުރުމަށް ފަހު އެކަމަށް ޙައްލެއް ހޯދައި ދިނުމުގެ ނިޔަތުގައި ޤާނޫނީ ވަކީލުންގެ ޚިޔާލާއެކު އުފައްދާފައިވާ ވެބްސައިޓެއް ކަމަށެވެ. މި ވެބްސައިޓް މެދުވެރިކޮށް ވަކީލަކު ޢައްޔަނުކުރުމުން، ވަކީލުންނާއި އެކަމަށް އެދޭފަރާތާ މެދު އޮންނަ މަސައްކަތު އެއްބަސްވުން އެކުލަވާލުމާއި، ޤާނޫނީ ވަކީލާއެކު ހިންގަންޖެހޭ މުޢާމަލާތުތައް ހިންގުމުގައި އެހީތެރިވެދިނުމާއި، އަދި މައްސަލައާ ގުޅިގެން ކުރަންޖެހޭ އިދާރީ މަސައްކަތަކުގައި މުވައްކިލުގެ ފަރާތުން ޤާނޫނީ ވަކީލާއެކު ލޯޔަރސްއެމްވީ އިން މަސައްކަތްކުރާނޭ ކަމަށް އަޙްމަދު ނަސީރު ވިދާޅުވިއެވެ.
ޖިނާއީ ގިނަ މައްސަލަތަކުގައި ވަކާލާތުކުރައްވާ ޤާނޫނީ ވަކީލު ޢަބްދުﷲ ޝާޢިރު ވިދާޅުވީ މި ޚިދުމަތަކީ މިހާރު ކޮންމެހެން ބޭނުންވެފައިވާ ޚިދުމަތެއް ކަމަށެވެ. "ބައެއް މައްސަލަތަކުގައި އެބަހުރި ޤާނޫނީ ވަކީލުން އެކަށީގެންވާ ގޮތަށް މަސައްކަތް ނުކުރުމުގެ ސަބަބުން މުވައްކިލުންނަށް ބޮޑެތި ގެއްލުންވެފަ. އަދި ޤާނޫނީ ފީ ނެގުމުގައި ވެސް ބައެއް ފަހަރު މުވައްކިލުންނާ އެބަހުރި މައްސަލަތަކާ ކުރިމަތިލާންޖެހިފަ. ޤާނޫނީ ވަކީލުންގެ ޚިދުމަތް ހޯދުމުގައި އެދާއިރާ ދަންނަ ބަޔަކު މެދުވެރިކޮށް މަސައްކަތްކުރުމަކީ ރަނގަޅުކަމެއް،" ޝާއިރު ވިދާޅުވިއެވެ.
ޖިނާއީ އަދި މަދަނީ ބޮޑެތި މައްސަލަތަކުގައި ވަކާލާތުކުރައްވާ ޤާނޫނީ ވަކީލު އަޙްމަދު ޢަބްދުﷲ ޢަފީފް ވިދާޅުވީ ބައެއް ޤާނޫނީ ވަކީލުންގެ ޚިދުމަތްދޭ ގޮތާ މެދު ކަންބޮޑުވުންތަކެއް ހުރިކަން އެއީ ޙަޤީޤަތެއް ކަމަށާއި، ޤާނޫނީ ވަކީލު މަސައްކަތް ކުރިއަށް ގެންދާ ގޮތަށް ފާރަވެރިވާނޭ ބަޔަކު މެދުވެރިކޮށް ވަކީލުން ޢައްޔަނުކުރުމުން އެފަދަ މައްސަލަތައް ދިމާވާ މިންވަރު މަދުކުރެވޭނޭ ކަމަށެވެ.
ލޯޔަރސްއެމްވީ އިން ދޭ އެއްވެސް ޚިދުމަތަކަށް ޚިދުމަތް ހޯދާފަރާތުން އެއްވެސް ފީއެއް ދައްކާކަށް ނުޖެހެއެވެ. ލޯޔަރސްއެމްވީގެ ވެބް އެޑްރެސްއަކީ www.lawyersmv.com އެވެ. އަދި ފޭސްބުކް ޕޭޖް މެދުވެރިކޮށްވެސް ލޯޔަރސްއެމްވީގެ ޚިދުމަތް ލިބޭނޭ ކަމަށް ޕްރޮޖެކްޓް މެނޭޖަރ އަޙްމަދު ނަސީރު ވިދާޅުވިއެވެ.
