ޒަމާނަށް އަހުލުވެރިވުމަށް އެކަށީގެންވާ ފުރުސަތު ނެތުމަކީ ޓީޗަރުންނަށް ހުރި ބޮޑު ގޮންޖެހުމެއް - ތޯހާ

ޒަމާނުއްސުރެ ތިބި ޓީޗަރުން ޒަމާނަށް އަހުލުވެރިވުމަށް އެކަށީގެންވާ ފުރުސަތު ނެތުމަކީ ޓީޗަރުންނަށް ހުރި ބޮޑު ގޮންޖެހުމެއް ކަމަށް ޣިޔާސުއްދީން ސްކޫލްގެ ކުރީގެ ޕްރިންސިޕަލް ތޯހާ ސަލީމް ވިދާޅުވެއްޖެއެވެ.

ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން ތޯހާ ވިދާޅުވީ، ޓެކްނޮލޮޖީގެ ގޮތުން އައި ބަދަލަށް ޓީޗަރުން އަހުލުވެރި ނުކުރެވޭނަމަ ދަރިވަރުންނަށް ކިޔަވާއިދޭ އެއްޗަކާ ޒަމާނަށް އައި ބަދަލުގެ ފަރަގު ބޮޑުވާނެ ކަމަށާއި، ދަރިވަރުންނަށް އޭގެ ގެއްލުން ބޮޑުވާނެ ކަމުގައެވެ. ޓީޗަރުންނަށް ލިބިފައިވާ ތަމްރީނާއެކު މަސައްކަތް ކުރެއްވި ނަމަވެސް ޒަމާނަށް އައި ބަދަލާއެކު ޓީޗަރުންނަށް ލިބެންޖެހޭ ސްކިލް ޓްރޭނިންތައް ލިބެންޖެހޭ ކަމަށެވެ.

އެތައް ދަރިވަރުންނެއް ގޮވައިގެން ކޮންމެ ދުވަހަކު މަސައްކަތްކުރާއިރު، މާއްދާތަކުގެ މައުލޫމާތުތައް އަދާހަމަކޮށް ކަރިކިއުލަމަށް އައި ބަދަލުތަކާއެކު ފިލާވަޅަށް ތައްޔާރުވެ، ޒަމާނީ ދަރިންތަކެއް މުޖުތަމަޢުއަށް ނެރުމަށް ޓީޗަރުން ކުރާ މަސައްކަތާ އެއްވަރުގެ އިނާޔަތެއް ދިނުން އެއީ ގައުމީ ފެންވަރުގައި ނަގައިގެން މަސައްކަތްކުރަން ޖެހޭ ކަމެއް ކަމަށް ތޯހާ ވިދާޅުވިއެވެ. ތޯހާ ވިދާޅުވީ، މިހާރު ޓިޗަރުންނަށް ދެމުން އަންނަ މުސާރައަކީ ކުރާ މަސައްކަތާ އެއްވަރުގެ މުސާރައެއް ނޫން ކަމަށެވެ. އެހެންކަމުން ސިސްޓަމަށް ބަދަލު އަންނަން ޖެހޭ ކަމަށް ތޯހާ ވިދާޅުވިއެވެ.

ޓީޗަރުންގެ މުސާރައިން ދިރިއުޅުމުގެ ޚަރަދުތައް ދެކޮޅު ނުޖެއްސޭ ކަމަށްވާނަމަ، އަލަށް ދާއިރާއަށް ވަންނާނެ މީހުން ނުލިބޭނެ ކަމަށާއި، ދެން ގެންނަން ޖެހޭނީ ބިދޭސީ ޓީޗަރުންކަން ތޯހާ ފާހަގަކުރެއްވިއެވެ.

ސްކޫލް ސިސްޓަމްގައި ކަންކަން ކުރާއިރު ކުރެވެނީ ވަކިވަކި ކަންކަމުގެ ގޮތުގައި ކަމަށާއި، ޚާއްސަ ދުވަސްތައް ވެސް ފާހަގަކުރަނީ މި ބީދައިން ކަމަށެވެ. ގައުމިއްޔަތާއި އެހެނިހެން ކަންކަމަކީ ސްކޫލް މާހައުލުގައި ގުޅިލާމެހިގެން އަންނަން ޖެހޭ ކަމެއްގެ ގޮތުގައި ތޯހާ ވިދާޅުވިއެވެ. ގައުމީ ދުވަސް ފަދަ ދުވަސްތައް ފާހަގަކުރުމަށް ޚާއްސަ ޅެމެއް ނުވަތަ ވާހަކައެއް އެ ދުވަހަކު ކިޔާލުމަށްފަހު ދެން ހިންގާ އެހެނިހެން ހަރަކާތްތަކުގައި ގައުމިއްޔަތުގެ ޒައްރެއްގެ މިންވަރު ވެސް ނުހިމަނާނަމަ ދަރިވަރުންނަށް ވިސްނައިދެވެނީ ގައުމިއްޔަތަކީ ވަކި ދުވަހަކަށް ޚާއްސަ ކަމެއްގެ ގޮތުގައި ކަމަށެވެ. އެހެންނަމަވެސް މިކަންކަމަކީ، މުޅި ދިރިއުޅުމުގައި ހުންނަން ޖެހޭ ކަމެއްގެ ގޮތުގައި ވިދާޅުވިއެވެ.