ސަރުކާރު މުވައްޒަފުންގެ ގޮތުގައި ބިދޭސީން ގެނައުމުގައި އެޖެންސީތައް ބޭނުން ކުރުމަށް އައު ގަވާއިދެއް އެކުލަވާލުމުގެ މަސައްކަތް ކުރަމުން އަންނަ ކަމަށް އިކޮނޮމިކް މިނިސްޓަރ ފައްޔާޒް އިސްމާއީލް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ވަޒީފާތަކަށް ބިދޭސީން ގެންނަ އެޖެންސީތަކުން ހުށަހަޅާފައިވާ ޕެޓިޝަނާ ގުޅޭގޮތުން ޕެޓިޝަން ކޮމިޓީން ދެންނެވި ސުވާލަކަށް ޖަވާބު ދެއްވަމުންނެވެ. ސަރުކަރުން ބިދޭސީ މަސައްކަތްތެރިން ގެނައުމުގައި އެޖެންސީތައް ބޭނުން ކުރުމަށް އައު ގަވާއިދެއް އެކުލަވާލުމުގެ މަސައްކަތް ކުރަމުން އަންނައިރު، މިހާރު ފުރަތަމަ ޑްރާފްޓްގެ މަސައްކަތް ވަނީ ނިމިފައެވެ. މި މަހުގެ 15 ހިސާބުގައި އެޖެންސީ ތަކާއެކު މަޝްވަރާ ކުރެވޭނެ ކަމަށާއި، އެ މަޝްވަރާތަކަށްފަހު ޑްރާފްޓް ފައިނަލް ވެގެންދާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ސަރުކާރުގެ ވަޒީފާތަކަށް ބިދޭސީން ގެންނަންވާނީ އެޖެންސީތައް މެދުވެރިވެގެން ކަމަށެވެ. އެހެންނަމަވެސް އަމިއްލަ ކުންފުނި ތަކުން އެޖެންސީތައް މެދުވެރިވެގެން ބިދޭސީން ގެނައުމުގައި މަޖުބޫރު ކުރުމުގެ ވިސްނުމެއް ނެތް ކަމަށެވެ. އެޖެންސީ ތަކަކީ އޭގެ ޒާތުގައި ވިޔާފާރީގެ ގޮތުގައި ހިންގާ ތަންތަން ކަން މިނިސްޓަރ ފާހަގަކުރެއްވިއެވެ. އެޖެންސީތަކަށް ފުރުސަތު ހުޅުވާލާއިރު ވަރަށް ވަރުގަދަ ކޮންޓްރޯލްތަކެއްވެސް ހިމަނާނެކަން މިނިސްޓަރ ފާހަގަ ކުރެއްވިއެވެ.
ބިދޭސީންގެ މައްސަލަ ބޮއްސުން ލައިގެން ދިޔައީ ހަމައެކަނި އެޖެންސީތަކުގެ ސަބަބުން ކަމަށް ބުނެވެން ނެތް ކަމަށް މިނިސްޓަރ ފައްޔާޒު ވިދާޅުވިއެވެ.
އެޖެންސީތަކުން ހުށަހަޅާފައިވާ ޕެޓިޝަނުގައި ކަންބޮޑުވުން ފާޅުކޮށްފައިވަނީ ސަރުކާރުގެ ބައެއް އިދާރާތަކުން ބިދޭސީން ގެނައުމުގައި ދިވެހި އެޖެންސީތަކަށް އިސްކަން ދިނުމުގެ ބަދަލުގައި ރާއްޖެއިން ބޭރުގެ އެޖެންސީތަކަށް އިސްކަންދޭ މައްސަލައިގައެވެ. އަދި ސަރުކާރުގެ ބައެއް އިދާރާތަކުން އަމިއްލައަށް ބިދޭސީން ގެންނަ ކަމަށާއި، އެކަމުން މާލީ ފައިދާ ހޯދާ ކަމަށްވެސް ޕެޓިޝަންގައި ބުނެފައިވެއެވެ. ބިދޭސީންނާ ގުޅުންހުރި ނިންމުންތައް ނިންމާއިރު އެޖެންސީތަކުގެ ބަހެއް ނުހޯދާ ކަމަށްވެސް ފާހަގަކޮށްފައިވެއެވެ.
ރާއްޖޭގައި އުޅޭ ބިދޭސީންގެ އަދަދު ދެލައްކަ އަށްޑިހަ އެއްހާހުން މަތީގައި އުޅޭކަމަށް އިކޮނޮމިކް މިނިސްޓަރ މީގެ ކުރިންވެސް ވަނީ ވިދާޅުވެފައެވެ.
