އަމާޒަކީ މުޅި ރާއްޖެއަށް ފަތުރުވެރިކަން ފަތުރާލުން: ރައީސް
ރާއްޖޭގެ ޖީޑީޕީގެ 44.5 އިންސައްތަ ހިއްސާކުރަނީ ފަތުރުވެރިކަމުގެ ޞިނާޢަތް
ތުރުވެރިކަމުގެ ރަންޔޫބީލް ގުނަން ފެށުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާ ވާހަކަދައްކަވަނީ
ސަރުކާރުގެ އަމާޒަކީ މުޅި ރާއްޖެއަށް ފަތުރުވެރިކަން ފަތުރާލުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ ފަތުރުވެރިކަމުގެ ރަންޔޫބީލް ގުނަންފެށުމުގެ ގޮތުން އާދީއްތަ ދުވަހުގެރޭ ކުރުނބާ މޯލްޑިވްސްގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ފަތުރުވެރިކަމުގެ ޞިނާޢަތް ކުރިއެރުވުމަށްޓަކައި ކުރެވެންހުރި ހުރިހާ ކަމެއް ސަރުކާރުގެ ފަރާތުން ކޮށްދެއްވާނެ ކަމަށެވެ.
ރާއްޖޭގެ ފަތުރުވެރިކަމަކީ ރާއްޖޭގެ ޖީޑީޕީގެ 44.5 އިންސައްތަ ހިއްސާ އޮންނަ ޞިނާޢަތަކަށް ވެފައި، މި ޞިނާޢަތް ތަރައްގީކޮށް ދެމެހެއްޓުމުގައި މި ޞިނާޢަތާ ގުޅިފައިވާ އެހެން ދާއިރާތަކުގެވެސް ހިއްސާ ބޮޑުކަން ރައީސް ފާހަގަކުރެއްވިއެވެ.
މިއަދުގެ ސަރުކާރުގެ އަމާޒަކީ މުޅި ރާއްޖެއަށް ފަތުރުވެރިކަން ފަތުރާލުން ކަމަށް ރައީސުލްޖުމްހޫރިއްޔާ ވިދާޅުވިއެވެ. މިކަން ކުރުމަށް ރަށްރަށަށް ފަސޭހައިން ދަތުރުކުރެވޭނެ އިންތިޒާމާއި، ސާފު ބޯފެނާއި، ނަރުދަމާ ނިޒާމެއް ކޮންމެ ރަށެއްގައި ގާއިމުކުރަންޖެހޭ ކަމަށް ވިދާޅުވިއެވެ. އަދިވެސް ކުރަންޖެހޭ ގިނަ ކަންކަން އެބަހުރި ކަމަށާއި، ސަރުކާރުން މިހާރު އަންނަނީ މިކަންކަން ކުރަމުން ކަމަށް ރައީސް ވިދާޅުވިއެވެ. އަތޮޅުތެރެއަށް ގެސްޓްހައުސްއާއި ހޯމް ސްޓޭގެ ޚިދުމަތް ރަނގަޅަށް ތައާރަފުވާނީ އޭރުން ކަމަށް ރައީސް ވިދާޅުވިއެވެ.
ރައީސް ވިދާޅުވީ ދެމެހެއްޓެނިވި ގޮތެއްގައި ފަތުރުވެރިކަން ކުރިއަރުވައި, އަންނަން އޮތް ޖީލުތަކަށް މީގެ ފައިދާ ފޯރުކޮށްދިނުމަށް ތަރައްގީގެ ޕްލޭނަށް ބަދަލުތަކެއް ގެންނަން ޖެހިފައިވާކަމަށެވެ. އަދި މޫސުމަށް އަންނަ ބަދަލުތަކާއި އަދި ތިމާވެއްޓަށް ރިޢާޔަތްކޮށް, ދެމެހެއްޓެނިވި ގޮތެއްގައި މި ޞިނާޢަތް ތަރައްގީކޮށް ކުރިއެރުވުން މުހިންމު ކަމަށެވެ. އެގޮތުން އެއްފަހަރު ބޭނުންކޮށްފައި އުކައިލާ ޒާތުގެ ޕްލާސްޓިކް ރާއްޖޭގައި ބޭނުންކުރުން، 2023ގެ ނިޔަލަށް ހުއްޓައިލުމާއި, އަދި 2030 ވަނަ އަހަރުގެ ނިޔަލަށް، ދިވެހިރާއްޖެ ކާރބަން ނިއުޓްރަލް ގައުމަކަށް ހެދުމަށް ސަރުކާރުން ކަނޑައަޅާފައިވާ ސިޔާސަތުތައް ރައީސް ފާހަގަކުރެއްވިއެވެ. ރައީސް ވިދާޅުވީ ތިމާވެށީގެ ރައްކާތެރިކަން ކަށަވަރުކުރުމަށް ކުރާ ކޮންމެ ކަމަކީ، ފަތުރުވެރިކަމަށް ލިބޭ އިތުރު ދިރުމަކަށް ވާނެކަމަށެވެ.
ރައީސުލްޖުމްހޫރިއްޔާގެ ވާހަކަފުޅުގައި ފަތުރުވެރިކަމުގެ ޞިނާޢަތުގައި ދިވެހި އަންހެނުންނާއި ޒުވާނުންގެ ބައިވެރިވުން މިހާރަށް ވުރެ އިތުރުކުރަންޖެހޭކަން ފާހަގަކުރެއްވިއެވެ.
މި ރަސްމިއްޔާތުގައި، ފަތުރުވެރިކަމަށް 50 އަހަރު ފުރޭ މުނާސަބަތާއި ގުޅިގެން ތައާރަފުކޮށްފައިވާ ލަވަ ވަނީ އިފްތިތާޙު ކޮށްފައެވެ. އަދި އެ ލަވައިގެ ޅެން މިރަސްމިއްޔާތުގައި ރައީސުލްޖުމްހޫރިއްޔާއަށް ވަނީ ވެދުމަށް އަރުވާފައެވެ.
މި ރަސްމިއްޔާތުގައި ބައެއް ވަޒީރުންނާއި ފަތުރުވެރިކަމުގެ ސިނާއަތު ތަމްސީލުކުރައްވާ ޖަމްޢިއްޔާ ޖަމާޢަތްތަކާއި ފަތުރުވެރިކަމުގެ ދާއިރާގައި ގިނަ ޒަމާންތައް ހޭދަކުރައްވާފައިވާ ފަރާތްތަކާއި މި ޞިނާޢަތުގެ އިސްފަރާތްތަކުން ބައިވެރިވެވަޑައިގެންނެވިއެވެ.
