ފިލިޕީންސްގެ ރައީސް ރޮޑްރިގޯ ޑުޓާޓޭގެ ދަރިކަނބަލުން ސާރާ ޑުޓާޓެ ކާޕިއޯ، 2022 ވަނަ އަހަރުގެ ރިޔާސީ އިންތިޚާބުގައި ކުރިމަތިލުމަށް ނިންމަވައިފިއެވެ.
މިގޮތަށް ސާރާ ނިންމަވާފައިމިވަނީ މި ދައުރު ނިމުމަށްފަހު އެކަމަނާގެ ބައްޕާފުޅު މަގާމުން ދުރުވެ، ސިޔާސީ ދާއިރާ ދޫކޮށްލާނެކަމަށް ބުނުއްވިތާ މާ ގިނަ ދުވަސްތަކެއް ނުވަނީހެވެ. ސާރާ އަކީ މިވަގުތު ފިލިޕީންސްގެ 3 ވަނައަށް އެންމެ ބޮޑު ސިޓީ ކަމުގައިވާ ޑަވާއޯގެ މޭޔަރުކަން ކުރައްވަމުން އަންނަ ފަރާތެވެ.
މިގޮތަށް ސާރާ ނިންމާފައިމިވަނީ، އެގައުމުގެ ސިޔާސީ މަޝްރަހު ދިރާސާ ކުރާ ފަރާތްތަކުން ޑުޓާޓޭގެ އަރިސް ބޭފުޅަކު ރައީސްކަމަށް އިންތިޚާބުވުމަކީ ޑުޓާޓޭއަށް ފައިދާ ބޮޑުކަމެއްކަމަށް ބުނެފައިވާ ދަނޑިވަޅެއްގައެވެ. މިހެން ބުނެފައިވަނީ 2016 ވަނަ އަހަރު އެގައުމުގައި މަސްތުވާތަކެތީގެ ބޮޑެތި އޮޕަރޭޝަންތަކެއްގައި ޑުޓާޓޭގެ އަމުރުފުޅަށް އެތައް ހާސް ބަޔަކު މަރާފައިވާތީ ޤާނޫނީ ގޮތުން ޑުޓާޓޭއަށް ފިޔަވަޅު އެޅުމުގެ ފުރުސަތު ބޮޑުވުމުންކަމަށެވެ. އެގައުމުގެ ރިޕޯޓުތަކުން ބުނާ ގޮތުގައި ޑުޓާޓޭ ރައީސްކަމާ ހަވާލުވެވަޑައިގެން ފަހުން މަސްތުވާތަކެއްޗާ ގުޅުންހުރި ނުވަތަ ކިރިޔާ ތުހުމަތެއް ކުރެވުނު 6100 މީހުން ވަނީ މަރާލާފައެވެ.
ފިލިޕީންސްގެ ދެން އޮންނަ ރިޔާސީ ދަޢުރަކަށް އިންތިޚާބެއް ބޭއްވުމަށް ހަމަޖެހިފައިވަނީ 2022 ވަނަ އަހަރުގެ މޭ މަހުގެ ތެރޭގައެވެ. މި އިންތިޚާބުގައި އެގައުމުގެ 60 މިލިއަނަށްވުރެ ގިނަ މީހުންނަށް ވޯޓުލުމުގެ ޙައްގު ލިބިފައިވެއެވެ.
