އިދިކޮޅު ފަރާތްތަކުން ދައުލަތުގެ މުއައްސަސާތަކުގެ ވެރިން ދިރިއުޅުއްވާ ގެކޮޅުތައްދޮށަށް އެއްވެ މުޒާހަރާ ކޮށްފިއެވެ.

އިދިކޮޅު ޕީޕީއެމް-ޕީއެންސީން "މިނިވަންކަމުގެ ދިފާޢުގައި ދިވެހިން"ގެ ނަމުގައި ކުރިއަށް ގެންދާ އެއްވުންތަކުގައިވެސް ބައިވެރިވާ ފަރާތްތައް ހޮނިހިރު ދުވަހުގެރޭ ވަނީ މާލޭގެ އެކި ސަރަހައްދުތަކުގައި މުޒާހަރާކޮށްފައެވެ. އެގޮތުން ހޮނިހިރު ދުވަހުގެރޭ 9:00ހާއިރު ޕްރޮސެކިއުޓަރ ޖެނެރަލް ޙުސައިން ޝަމީމް ދިރިއުޅުއްވާ ގޭދޮށަށް އެއްވެ ޝަމީމްގެ އިސްތިއުފާއަށް ގޮވާލައި އަޑުގަދަކޮށްފައިވާއިރު، ކުޑަވަގުތުކޮޅެއްގެ ތެރޭގައި އެސްއޯ ފުލުހުންގެ ވެހިކަލް އެ ސަރަޙައްދަށް ވަނީ ގޮސްފައެވެ. ނަމަވެސް އެސްއޯ ފުލުހުންގެ ވެހިކަލަށް އެހިސާބަށް ނާދެވެނީސް މުޒާހަރާގެ ބައިވެރިން ވަނީ އެސަރަހައްދު ދޫކޮށް ގޮސްފައެވެ.

އޭގެ އިތުރުން ޑިފެންސް މިނިސްޓަރ މާރިޔާ އަޙުމަދު ދީދީ ދިރިއުޅުއްވާ ގެކޮޅުދޮށަށްވެސް އެއްވެ ހަމައެގޮތަށް އަޑުއުފުލާފައިވެއެވެ.

އިދިކޮޅުން ދޭތެރެ ދޭތެރެއިން ގެންދަނީ ސިލްސިލާ މުޒާހަރާތައް ކުރަމުންނެވެ. އެކި ނަންނަމުގައި ކުރިއަށްގެންދާ މި މުޒާހަރާތަކުގައި މައިގަނޑު ގޮތެއްގައި ގޮވާލަމުން ގެންދަނީ މަނީ ލޯންޑަރިންގގެ ކުށް ސާބިތުވެ ޖަލު ހުކުމް ތަންފީޒު ކުރައްވަމުން ގެންދަވާ ކުރީގެ ރައީސް ޢަބްދުﷲ ޔާމީން މިނިވަން ކުރުމަށެވެ.

ފަހަކަށް އައިސް އިދިކޮޅުން ކުރިއަށްގެންދާ މުޒާހަރާތަކާއި އެއްވުންތަކުގައި ގައުމީ ދިދައާއި، ރަތްކުލައިގެ ޓީޝަރޓް ބޭނުންކުރާއިރު، މައިގަނޑު ޝިއާރެއްގެ ގޮތުގައި ބޭނުންކުރަމުންދަނީ "މިނިވަންކަމުގެ ދިފާޢުގައި ދިވެހީން"އެވެ.

އިދިކޮޅުން އެންމެ ފުރަތަމަ އެއްވުންތައް ބާއްވަން ފަށާފައިވަނީ "އިންޑިއާ އައުޓް"ގެ ނަމުގައެވެ. އެއަށްފަހު ކޮވިޝީލްޑް ވެކްސިން ޖެހުމާ ދެކޮޅަށް އަޑުއުފުލާފައިވާއިރު، ފިޔަވަތި އިސްލާހުކުރުމާއި، ތަހުގީގުތައް އަވަސް ކުރުމާއި، ދީނުގެ ދިފާޢުގެ ނަމުގައިވެސް ތަފާތު އެކި އެއްވުންތައް ބާއްވާފައިވެއެވެ. ނަމަވެސް މިއިން ކޮންމެ އެއްވުމެއްގައިވެސް ގޮވާލާފައިވަނީ ރައީސް ޔާމީނު މިނިވަން ކޮށްދިނުމަށެވެ.

އޭގެ އިތުރުން، ރައީސް ޔާމީނުގެ މައްޗަށް ވައްކަމުގެ ބޮޑެތި ތުހުމަތުތަކެއް ކުރެވި އެކަމުގެ ތަހުގީގު ކުރިއަށްދާއިރު، ދައުލަތުގެ ވެރިން ދިރިއުޅުއްވާ ގެކޮޅުތައްދޮށަށް އެއްވެ މިފަދައިން މުޒަހަރާކޮށް އަޑުގަދަ ކުރުމަކީ ތަހުގީގުތަކަށް ނުފޫޒު ފޯރުވުމަށް ކުރަމުންދާ ކަމެއް ކަމަށް ގިނަ ބަޔަކު ބުނެއެވެ. އެގޮތުން ދާދި ފަހުން އުއްތަމަފަނޑިޔާރު އަޙުމަދު މުޢުތަސިމު ޢަދުނާން ދިރިއުޅުއްވާ ގެކޮޅުގެ ސީސީޓީވީ ކެމެރާތައް ހަލާކުކޮށްލައި، ސެކިޔުރިޓީ ފޫއަޅުވާލައި އެ ގެޔަށް މީހަކު ވަދެފައިވާ މައްސަލައެއްވެސް ފެންމަތިވެފައިވެއެވެ.