ފިލިޕީންސްގެ ރައީސް ރޮޑްރިގޭ ޑުޓާޓޭ ސިޔާސީ ދާއިރާއާ ދުރަށް ވަޑައިގެންނެވުމަށް ވިސްނަވާކަން ހާމަ ކުރައްވައިފިއެވެ.

ހޮނިހިރު ދުވަހު ޑުޓާޓޭ އެކަން އިއުލާނު ކުރައްވާފައިވާއިރު، އެ ނިންމެވުމަކީ ގިނަ ބަޔަކަށް ހައިރާންކަން ގެނުވި ނިންމުމެއްކަމަށް ރޮއިޓަރސްގައި ރިޕޯޓު ކޮށްފައިވެއެވެ. އަދި އެ ނިންމެވުން ބަދަލުވެދާނެކަމަށްވެސް ގިނަ ބަޔަކު ޤަބޫލު ކުރެއެވެ. ސަބަބަކީ 2015 ގެ އިންތިޚާބަށްވެސް ކުރިމަތިލުމަށް ވަގުތު ކުޑަތަންވެ، އެންމެ 11 ގަޑިއިރަށް ވެފައިވަނިކޮށް ޑުޓާޓޭ އިންތިޚާބުގައި ވާދަ ކުރައްވައި، ކާމިޔާބު ކުރައްވާފައިވާތީއެވެ.

ފިލިޕީންސްގެ ސިޔާސީ މަސްރަހު ދިރާސާ ކުރާ ފަރާތްތަކާ ހަވާލާދީ ރޮއިޓަރސްގައި ރިޕޯޓު ކޮށްފައިވާ ގޮތުން، ކުރިއަށް އޮތް ރިޔާސީ އިންތިޚާބުގައި ޑުޓާޓޭގެ އަރިސް ބޭފުޅަކު އިންތިޚާބު ވުމަކީ ޑުޓާޓޭއަށް ފައިދާ ބޮޑު ގޮތެވެ. ސަބަބަކީ 2016 ވަނަ އަހަރު މަސްތުވާތަކެއްޗާ ދެކޮޅަށް ހިންގި ޚާއްސަ އޮޕަރޭޝަންތަކެއްގައި ޑުޓާޓޭގެ އަމުރުފުޅަށް އެތައް ހާސް ބަޔަކު މަރާފައިވާތީ ޤާނޫނީ ގޮތުން ޑުޓާޓޭއަށް ފިޔަވަޅު އެޅުމުގެ ފުރުސަތު ބޮޑުވުމުންނެވެ. ނަމަވެސް ސިޔާސީ ދާއިރާއާ ދުރަށް ވަޑައިގަންނަވަން ނިންމެވުމަކީ ޑުޓާޓޭ ކުރެއްވި ކަންކަމަށް ޖަވާބުދާރީވާން ނުޖެހޭނެ ސަބަބެއް ނޫންކަމަށް އިދިކޮޅު ފަރާތްތަކުން ގެންދަނީ ބުނަމުންނެވެ.

ރިޕޯޓުތައް ބުނާގޮތުން ޑުޓާޓޭ ވެރިކަމާ ހަވާލުވެވަޑައިގެން ފަހުން މަސްތުވާތަކެތީގެ މައްސަލަތަކާއި ގުޅުންހުރި 6100 މީހުން ވަނީ މަރާލާފައެވެ. އެގޮތުން ކިރިޔާ ތުހުމަތެއް ކުރެވުނަސް އެމީހަކު ފުލުހުން މަރާލާ ކަމަށް ރިޕޯޓުތައް ބުނެއެވެ.

އަންނަ އަހަރުގެ މެއި މަހު ފިލިޕީންސްގައި އޮންނަ ރިޔާސީ އިންތިޚާބުގައި 60 މިލިއަނަށްވުރެ ގިނަ މީހުންނަށް ވޯޓު ލުމުގެ ހައްގު ލިބިފައިވެއެވެ.