މޯލްޑިވްސް ކަރެކްޝަނަލް ސަރވިސަސް އިން ޖަލުތަކުގައި ޑްރަގް ޑިޓޮކްސިފިކޭޝަން ޕްރޮގްރާމް ފަށައިފިއެވެ.
އޮކްޓޯބަރު މަހުގެ 1 ވަނަ ދުވަހު އެ މަސައްކަތް ފަށާފައިވާކަން ކަރެކްޝަންސްގެ މީޑިއާ އޮފިޝަލު ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ. އޭނާ ވިދާޅުވީ، ޑިޓޮކްސް ޕްރޮގްރާމް ފަށާފައިވާ ކަމަށާއި، މިހާރު ކުރިއަށްދަނީ ފަރުވާއަށް ބޭނުންވާ ޤައިދީން ދެނެގަތުމަށްޓަކައި އެސެސްމަންޓު ހެދުމުގެ މަރުޙަލާ ކަމަށެވެ.
ކަރެކްޝަންސްއިން އެހެން ބުނެފައިވާއިރު، ޑްރަގް ރިހެބިލިޓޭޝަން ފެށުމަށްޓަކައި ޑިޓޮކްސް ކުރުމުގެ މަސައްކަތް ޖަލުގައި ވަރަށް އަވަހަށް ފަށާނެކަން ދާދި ފަހުން ހޯމް މިނިސްޓަރ ޝެއިޙް އިމްރާން އަބްދުﷲ ވެސް ވަނީ ވިދާޅުވެފައެވެ. ދައުލަތުގެ މީޑިއާ ޕީއެސްއެމްއަށް ދެއްވި އިންޓަރވިއުއެއްގައި މިނިސްޓަރ ވިދާޅުވީ، އެކަމަށްޓަކައި ޚާއްސަ ޔުނިޓެއްވެސް ޤާއިމު ކޮށްފައިވާ ކަމަށެވެ. އަދި އެ ޔުނިޓުގައި ފުރިހަމަ ކުރަންޖެހޭ ކަންކަން ފުރިހަމަ ކުރުމުގެ މަސައްކަތް ކުރައްވަމުން ގެންދަވާކަމަށް މިނިސްޓަރ އޭރު ވިދާޅުވިއެވެ.
މިނިސްޓަރ ވިދާޅުވީ، ޑިޓޮކްސް މަރުޙަލާއަށްފަހު ރިހެބިލިޓޭޝަންގެ ބާކީ ބައިތައް ކުރިއަށް ގެންދިއުމަށްޓަކައި ޚާއްސަ މަރުކަޒެއް ޤާއިމުކޮށް، އޮނިގަނޑަށް ގެންނަންޖެހޭ ބަދަލުތައް ގެނައުމާއި، އެކަމަށް ޚާއްސަ އޮފިސަރުން ތަމްރީނު ކުރުމުގެ މަސައްކަތްވެސް މިހާރު ކުރިއަށްދާ ކަމަށެވެ. އެގޮތުން ޓްރެއިނިންގެ ފުރަތަމަ މަރުޙަލާ މިހާރު ނިމިފައިވާކަންވެސް މިނިސްޓަރ ފާހަގަ ކުރެއްވިއެވެ.
އޭގެ އިތުރުން، ޤައިދީންގެ ދީނީ އަޤީދާ ވަރުގަދަ ކުރުމަށްޓަކައި މި ޕްރޮގްރާމްގައި ޚާއްސަ އިސްކަމެއް ދެެއްވާނެކަމަށް މިނިސްޓަރ ވިދާޅުވިއެވެ.
މޯލްޑިވްސް ކަރެކްޝަނަލް ސަރވިސަސް (އެމްސީއެސް)އިން ބަލަހައްޓަމުންދާ ޖަލުތަކުގައި ތިބި ޤައިދީންގެ 70 އިންސައްތަ އަކީ މަސްތުވާތަކެއްޗާ ގުޅުންހުރި މައްސަލަތަކުގައި ޖަލުގައި ބަންދުކޮށްފައިވާ މީހުންކަމަށް ކަރެކްޝަންސްއިން ހާމަކޮށްފައިވެއެވެ. އެގޮތުން ހަތަރު ޖަލުގައިވެސް މިހާރު ބަންދުކުރެވިފައިވާ ޤައިދީންގެ ނިސްބަތަށް ބަލާއިރު 70 އިން ސައްތަ ޤައިދީންނަކީ މަސްތުވާތަކެއްޗާއި ކޮންމެވެސް ބާވަތެއްގައި ޝާމިލްވާ މީހުންކަމަށާއި، ޖަލުތަކުގައި ރިހެބިލިޓޭޝަން ޕްރޮގްރާމްތައް ހިންގުމުގެ އިތުރުން ސަޕްލައި ހުއްޓުވުމަށް ވެސް މަސައްކަތްތަކެއް ކުރަންޖެހިފައިވާ ކަމަށް ކަރެކްޝަންސްއިން ބުނެފައިވެއެވެ.
އެގޮތުން އެމްސީއެސްއިން ޝާއިޢުކޮށްފައިވާ ތަފާސްހިސާބުތަކުން ދައްކާގޮތުގައި މި އަހަރުގެ ފުރަތަމަ ހަ މަސްދުވަހުގެ ތެރޭގައި ގާތްގަނޑަކަށް ބައި ކިލޯގެ މަސްތުވާތަކެތި އެކި އެކި އޮޕަރޭޝަންތަކުން އަތުލައިގަނެވިފައިވެއެވެ.
