ހުން އައިސް ކެއްސާނަމަ ނުވަތަ ރޯގާގެ އަލާމާތްތައް ހުންނަ މީހުންނަށް ފަސޭހަކަމާއެކު ޑޮކްޓަރަށް ދެއްކުމަށް ޚާއްސަ ޑިޕާޓްމެންޓެއް ގާއިމުކޮށްފައިވާ ކަމަށް އޭޑީކޭއިން ބުނެފިއެވެ.

ހޮނިހިރު ދުވަހު, އޭޑީކޭއިން ބުނީ މި ދުވަސްވަރު ރޯގާ ވަރަށް ބޮޑަށް ފެތުރެމުންދާ ކަމަށާއި، އާންމު ރައްޔިތުންނަށް ފަސޭހަ, ރަނގަޅު ޚިދުމަތެއް ދިނުމުގެ ގޮތުން ޚާއްސަ ޑިޕާޓްމެންޓެއް ހަމަޖައްސާފައިވާ ކަމަށެވެ. އަދި ހުމުގެ ޖެނެރަލް ހޯޕީޑީ ހުންނާނީ އެ ހޮސްޕިޓަލުގެ އެތެރޭގައި ކަމަށް އޭޑީކޭއިން ބުނެއެވެ.

އޭޑީކޭއިން ބުނީ ކޮންމެ ދުވަހެއްގެ ހަވީރު 4:00ން ރޭގަނޑު 10:00ށް ފްލޫ ކްލިނިކްގެ ޚިދުމަތް ލިބޭނެ ކަމަށެވެ.

އެހެންކަމުން ހުސްއައިސް ރޯގާގެ އެއްވެސް އަލާމާތެއް ފެންނަކަމުގައިވާނަމަ ލަސްނުކޮށް ޑޮކްޓަރަށް ދެއްކުމަށް އޭޑީކޭއިން ވަނީ އިލްތިމާސްކޮށްފައިވެއެވެ.

މީގެ އިތުރުން ޚާއްސަ ފްލޫ ކްލިނިކެއް ސެޕްޓެމްބަރު މަހުގެ 26 ވަނަ ދުވަހު އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް)އިން ގާއިމުކޮށްފައިވެއެވެ.

މި ފްލޫ ކްލިނިކް ހުންނާނީ އެކުވެނި ސަރަހައްދުގައި ހުންނަ ކުރީގެ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިމާރާތުގައެވެ. އަދި ޚިދުމަތް ދިނުމަށް ހަމަޖެހިފައިވަނީ ކޮންމެ ދުވަހެއްގެ ވެސް ހެނދުނު 8:30ން ރޭގަނޑު 10:00ށެވެ.

މި ދުވަސްވަރު އަރިދަފުސް ރޯގާ ޖެހޭ މީހުންގެ ނިސްބަތް އިތުރުވެފައިވާއިރު އާއްމު އަރިދަފުސް ރޯގާއިން ރައްކާތެރިވުމަށް އެޅުން މުހިއްމު ފިޔަވަޅުތަކެއް ވެއެވެ. އެގޮތުން އަރިދަފުސް ރޯގާ ޖެހިއްޖެނަމަ ކެއްސާ އިރު އަގަމަތީގައާއި ނޭފަތުގައި ކުޑަރުމާލެއް ނުވަތަ ޓިޝޫއެއް ފަދަ އެއްޗެއް އެޅުމާއި, ބޭނުންކޮށްފައިވާ ޓިޝޫފަދަ ތަކެތި ހާމައަށް އެއްލާނުލުމާއި އާއްމު ސާފުތާހިރުކަމަށް، ޚާއްސަކޮށް ސައިބޯނިލައިގެން އަތްދޮވުންފަދަ ކަންކަމަށް ސަމާލުކަންދިނުން ހިމެނެއެވެ.

ރޯގާޖެހި ކެއްސާނަމަ، މީހުން އެއްވެ އުޅޭ ތަންތަނަށް ނުދިއުމާއި, ޚާއްސަކޮށް މިފަދަ ތަންތަނަށް ކުޑަކުދިން ނުގެންދިއުމާއި ރޯގާޖެހިފައިވާނަމަ ކުޑަކުދިންނާ ދުރުހެލިވުން ހިމެނެއެވެ. ދުންފަތުގެ ދުމުން ކުޑަކުދިން ރައްކާތެރިކުރުމަށްޓަކައި, ގޭތެރޭގައި ދުންފަތުގެ އިސްތިއުމާލު ނުކުރުމާއި ބަލި ޖެހުމުން ނުރައްކާ ވުމުގެ ފުރުސަތު ބޮޑު މީހުން އިންފުލުއެންޒާއިން ރައްކާތެރިވުމަށް ވެކްސިންޖެހުމާއި އަދި މި ފަރާތްތައް ރޯގާ ޖެހި ހުން އަންނަނަމަ ޑޮކްޓަރެއްގެ ލަފާ ހޯދުން ހިމެނެއެވެ.