އިންސާނާގެ އުމުރަކީ ކުރު އެއްޗެކެވެ. ދުނިޔޭގައި ހޭދަކޮށްލަން މި ލިބޭ މަދު ދުވަސްކޮޅުގައި އަމަލުތައް ސީދާކޮށް ހެޔޮގޮތުގައި ދިރިއުޅެން ވޭތު ކުރެވޭތޯ މަސައްކަތް ކުރަން ޖެހެއެވެ. މީހުންނަށް އިޚްތިރާމް ކުރުމާއި އެހެން މީހުންނަށް ކަމޭ ހިތުން ފަދަ ކަންތައްތަކަކީ ވަރަށް އާދައިގެ ނަމަވެސް ކުރަން ޖެހޭ ކަންތައްތަކެވެ. އެކަންތައްތަކުގެ ސަބަބުން ހިތަށް ހިތްހަމަޖެހުން ވެސް ލިބޭ ކަންތައްތަކެވެ. ހަމަ އެފަދައިން އިސްރަށްވެހިންނަށް އިޚްތިރާމް ކުރުމަކީ ވެސް މިފަދަ ކަމެވެ. ކުރަން ލާޒިމު ވެސް ކަމެކެވެ.

އޮކްޓޯބަރު މަހުގެ އެއްވަނަ ދުވަހަކީ ބައިނަލްއަގްވާމީ ގޮތުން ފާހަގަކުރާ ދުނިޔޭގެ އިސްރަށްވެހިންގެ ދުވަހެވެ. އިސްރަށްވެހިންނަކީ ބައެއް ފަހަރު ބޭކާރު ބަޔެކޭ ނުވަތަ ބޭނުން ނެތް ބަޔެކޭ މުޖުތަމައުގެ ބައެއް ފަރުދުންނަށް ހީކުރެވޭތަން އާދެއެވެ. އެހެންނަމަވެސް ގަބޫލުކުރަންވީ ހަގީގަތަކީ ގައުމު ބިނާކުރުމަށާއި ހެޔޮ ލަފާ ޖީލެއް ބިނާކުރުމަށް އެންމެ އިސް ދައުރެއް އަދާ ކުރި މީހުންނަކީ އެމީހުން ކަމެވެ. މިއަދު އެމީހުން އުމުރުން ދުވަސްވެ، ގައިގެ ބާރު ދެރަވެ، އެނދުމަތިވި ނަމަވެސް އެމީހުން ވެސް އެހިސާބަށް ގޮސް އެތިބީ އަހަރުމެން ފަދައިން ޒުވާން އުމުރު ފަހަނައަޅާ ގޮސްފައެވެ. ތަޖުރިބާގެ ގޮތުން ބެލިޔަސް އެމީހުންނަކީ ނަން ކިޔާލެވޭ ފެންވަރުގެ މީހުންނެވެ. ހަގީގަތަށް ބުނާނަމަ އިސްރަށް ވެހިންނަކީ ކޮންމެ ޤައުމެއްގެވެސް އަގުބޮޑު ރައުސްމާލުތަކެކެވެ. މާޒީއަކީ މުސްތަޤުބަލުގެ މޫނުބަލާ ލޯގަނޑޭ ބުނާ ބީދައިން އެމީހުންގެ ތަޖުރިބާއަކީ މިއަދުގެ ޖީލުތައް ބިނާ ކުރުމަށް ނުހަނު އަގުބޮޑު އެއްޗެއްވެސް މެއެވެ.

އެހެންނަމަވެސް މި ރައުސްމާލާ ދޭތެރޭ މަދުން ނަމަވެސް ފަރުވާ ކުޑަކުރެވޭތަން އެބައާދެއެވެ. އަޅާނުލެވޭ ތަން އެބައާދެއެވެ. އަހަރުމެން ކުޑައިރު އިނގިލީގައި ހިފައިގެން އެމީހުން އަހަރުމެންނަށް މަގު ދައްކައެވެ. މަގުން ކައްސާލައިފިނަމަ ހެޔޮ މަގަށް އަނބުރާ ރުޖޫއަވަންދެން، އަލިމަގު ދައްކާ އެމަގަށް ދިޔުމަށް ހިތްވަރުދެއެވެ. އެކަމަކު މިއަދު އެމީހުން އަހަރުމެންގެ އިނގިލީގެ ހިފަން ބޭނުންވުމުން، އެ އިނގިލި ދިއްކޮށް ނުލެވޭތާ އެމީހުން ދުނިޔޭގެ ދިރި ހުރިތޯ ވެސް ބަލާނުލެވެ. އެމީހުން މަރުވުމަށްފަހު ވަޅުލުމުން ތިންމުށް ވެލި ލާންވެސް ނުދެވޭ މީހުން އެބައުޅެއެވެ. އެކަމަކު ތަރިކަ މުދަލުން ބައި ހޯދަން ވުމުން ކޯޓުގެ ދޮރުމައްޗަށް އެބަ ދެއެވެ. މިއީ ލަދުގަންނަން ޖެހޭ ކަމެކެވެ.

ގިނަ ފަހަރަށް އެމީހުންނާމެދު ވެވޭ އިހުމާލު ބޮޑެވެ. އިސްރަށްވެހިން ބާކީ ކޮށްލެވޭތަން އެބަ އާދެއެވެ. އެމީހުންގެ އުމުރު މައްޗަށް ދިޔުމުން އުމުރުގެ ދެން ބާކީ އޮތް ބައިގައި ވެސް އެމީހުން ބެލުމަކީ ބޮޑު ވޭނަކަށް ވެގެންދެއެވެ. ގިނަފަހަރަށް ސަރުކާރުން އެމީހުންނަށް ދޭ ފައިސާގެ ދަހިވެތި ކަމުގައި އެމީހުންނަށް ގޭގެ ކުޑަކޮޓަރިން ޖާގަ ދޭ ތަން ވެސް އެބަ ފެނެއެވެ. މިގޮތަށް އެމީހުންނަށް ލިބޭ ފައިސާގައި އެމީހުން ގެންގުޅޭއިރު ވެސް އެމީހުންނާއި ހިނިތުންވުމަށް ފަހު ހިތްހެޔޮކަމާއެކު ބަހެއް ނުބުނެވޭތާ، ބުނެލާ ރަހުމްކުޑަ ބަސްތަކުން އެމީހުންގެ އަޖަލު އަވަހަށް ޖެހިގެންދާނެ ނަމައޭ ހިތަށް އަރާ މީހުން ވެސް މަދެއް ނޫނެވެ. ދެ ފަހަރު އެއްކަމަކު އެމީހުން ބުނެފިނަމަ ކުނި މޫނު ދައްކައިގެން، އެއްތައް ހާސަރުތަކެއް ދެމުމަށްފަހު ނޫނީ އެބުނާ ކުޑަ ކަންތައް ވެސް ކޮށްދެވެނީ މަދު ފަހަރަކުއެވެ.

މިފަދައިން އިސްރަށްވެހިންނާއި ދޭތެރޭގައި އަމަލުތައް ބަހައްޓަނީ ހަގީގަތުގައި ވެސް ނުވިސްނޭ މީހުންނެވެ. އެމީހުންނަކީ ރަހުމެއް ކުލުނެއް، ހިތެއް އޮންނަ ބައެއް ނޫންބާއޭ ވެސް ހިތަށް އަރައެވެ. މިފަދަ މީހުންނަށް ނުވިސްނޭ އެއްކަމެއް ހަމަ ގައިމުވެސް އެބައޮތެވެ. އެއީ މި އިސްރަށްވެހިން ފަދައިން އެމީހުން ވެސް އެ ދުވަސް ދެކޭނެ ކަމެކެވެ. އެމީހުން ވެސް މުސްކުޅިވެ، ގައިބާރު ދެރަވެ، އެހެން މީހުންގެ އަޅާލުމާއި އޯގާތެރިކަމަށް ބޭނުންވާނެކަމެވެ. މީހުން ބުނެ އުޅެއެވެ. އެމީހަކަށް އިހުސާސް ވާނީ ހަމަ އެމީހަކަށް އެކަމެއް ދިމާވުމުންނެވެ. އެހެންކަމުން އެދުވަސް ތިމާއަށް އައުމުގެ ކުރިން މިއަދުގެ ބޭނުން ހެޔޮގޮތުގައި ހިފަން އެބަ ޖެހެއެވެ. ވަގުތު ފާއިތުވުމުގެ ކުރިންނެވެ. އިސްރަށްވެހިންނަށް އެ ބޭނުންވާ ލޯތްބާއި ގަދަރާއި އިހްތިރާމު އެބަ ފޯރުކޮށްދޭން ޖެހެއެވެ. އެމީހުންނަކީ ވެސް މުޖުތަމައުއަށް މުހިންމު ބައެއްކަމުގެ އިހުސާސް ކޮށްދޭން އެބަޖެހެއެވެ.