އެމްޓީސީސީން ބަސް ޑްރައިވަރުންނާއި އެޓެންޑެންޓުން ހޯދަނީ
ބަސް ޑްރައިވަރ ނުވަތަ ބަސް ޑްރައިވަރ ޓްރެއިނީގެ ގޮތުގައި ގްރޭޓަރ މާލޭ ސަރަހައްދުގައި މަސައްކަތްކުރުމަށް 23 މީހުން ބޭނުންވޭ
އެމްޓީސީސީގެ ބަހުގެ ޚިދުމަތް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބަސް ޑްރައިވަރުންނާއި ބަސް އެޓެންޑެންޓުން ހޯދުމަށް އިއުލާންކޮށްފިއެވެ.
އެކުންފުނިން ކޮށްފައިވާ އިއުލާނެއްގައި ބުނެފައިވަނީ ބަސް ޑްރައިވަރ ނުވަތަ ބަސް ޑްރައިވަރ ޓްރެއިނީގެ ގޮތުގައި ގްރޭޓަރ މާލޭ ސަރަހައްދުގައި މަސައްކަތްކުރުމަށް 23 މީހުން ބޭނުންވާކަމަށެވެ. އަދި ބަސް އެޓެންޑެންޓުންގެ ގޮތުގައި މަސައްކަތްކުރުމަށް 16 މީހުން ބޭނުންވާކަމަށެވެ. މި މަޤާމްތަކަށް ޝައުޤުވެރިވާ ފަރާތްތަކުގެ ވޯކް-އިން އިންޓަރވިއު، އޮކްޓޯބަރ މަހުގެ 3 ވަނަ ދުވަހު އޮންނާނެކަމަށް އެކުންފުނިން ބުނެއެވެ. އެގޮތުން އެދުވަހުގެ މެންދުރު 14:00 އާއި 18:00 ދެމެދު، އެމްޓީސީސީ ރީލޮކޭޝަން ބިލްޑިންގައި (ކުރީގެ މިނިސްޓްރީ އޮފް ފޮރިންގ އެފެއަރޒް ބިލްޑިންގ) އިންޓަރވިއު ކުރިއަށްދާނެކަމަށް އެކުންފުނިން ބުނެއެވެ.
ގްރޭޓަރ މާލެ ސަރަހައްދުގައި 2018 ވަނަ އަހަރުން ފެށިގެން ބަހުގެ ޚިދުމަތް ދެމުން އައިސްފައިނީ އެމްޕީއެލުންނެވެ. އެހެންނަމަވެސް މި އަހަރުގެ ޖުލައި މަހުން ފެށިގެން އެ ޚިދުމަތް މާލެ ސަރަހައްދުގައި ދެމުން ގެންދަނީ އެމްޓީސީސީންނެވެ. މީގެއިތުރުން އެމްޓީސީސީން މިހާރުވަނީ އޮކްޓޯބަރ މަހުގެ 1 ވަނަ ދުވަހުން ފެށިގެން ހުޅުމާލެ ދެވަނަ ފިޔަވައްސަށް ބަސް ދަތުރުތައް ބާއްވާގޮތަށް ހަމަޖައްސާފައެވެ.
އެ ކުންފުނިން މި ޚިދުމަތް ފޯރުކޮށްދިނުމުގެ އަމާޒަކީ ގްރޭޓަރ މާލެ ސަރަޙައްދުގައި ދިރިއުޅެމުންދާ ރައްޔިތުންނަށް ފެންވަރު ރަނގަޅު ޚިދުމަތްތަކެއް ފޯރުކޮށްދިނުން ކަމަށް އެމްޓީސީސީން ބުނެފައިވެއެވެ. މި ޚިދުމަތް ފުޅާކޮށް އެކަށީގެންވާ ފެންވަރެއްގައި ޚިދުމަތް ދިނުމަށް ބޭނުންވާނެ ބަސްތައް ގެނައުމާއި، އެކަމާ ގުޅިގެން ކުރަންޖެހޭ މަސައްކަތްތައް މިހާރު ކުރަމުންދާކަމަށް އެމްޓީސީސީން ބުނެފައިވެއެވެ.
