މި ފަހަރުގެ "އުރީދޫ ސާފް ޗެމްޕިއަންޝިޕް 2021" އަށް ތައްޔާރުވުމުގެ ގޮތުން ނޭޕާލުން ތަމްރީނު ކޭމްޕް ޖަހާފައިވަނީ ގަތަރުގައެވެ. މި ދަތުރުގެ ކުރިން ނޭޕާލުން އިންޑިއާއާ ދެކޮޅަށް އެކުވެރިކަމުގެ ދެ މެޗެއް ކުޅުނެވެ. ފުރަތަމަ މެޗުގައި މިދިޔަ ސެޕްޓެމްބަރު މަހުގެ ދެވަނަ ދުވަހު 1-1 ގެ ނަތީޖާއަކުން އިންޑިއާއާ އެއްވަރުވުއިރު، އެ މަހުގެ ފަސްވަނަ ދުވަހު އިންޑިއާއާ ދެކޮޅަށް ކުޅުނު މެޗުން ބަލިވީ 2-1 ގެ ނަތީޖާއަކުންނެވެ.

މީގެ އިތުރުން ގަތަރުގައި ކުރިއަށްގެންދިޔަ ކޭމްޕުގައި އޮމާނާ ދެކޮޅަށް އެކުވެރިކަމުގެ މެޗެއް ކުޅުނުއިރު، އެ މެޗުން 7-2 ގެ ބޮޑު ތަފާތަކުން އޮމާން ވަނީ ކުރިހޯދާފައެވެ.

ހުކުރު ދުވަހު ސާފް ޗެމްޕިއަންޝިޕް ރާއްޖޭގައި ފަށާއިރު، ފުރަތަމަ މެޗުގައި ނޭޕާލުން ހުކުރު ދުވަހުގެރޭ ބައްދަލުކުރަން ޖެހޭނީ އެންމެ ފަހުގެ ޗެމްޕިއަނުން ކަމަށްވާ ރާއްޖެއާއެވެ. މި ފަހަރުގެ ސާފް ޗެމްޕިއަންޝިޕުގައި ނޭޕާލާއި ރާއްޖެ ބައްދަލުކުރާއިރު، ރާއްޖޭން 2018 ވަނަ އަހަރު ބަންގްލަދޭޝްގެ ވެރިރަށް ޑާކާގައި ބޭއްވި ސާފް ޗެމްޕިއަންޝިޕުގެ ސެމީ ފައިނަލުގައި ވަނީ 3-0 ގެ ނަތީޖާއަކުން ނޭޕާލް ބަލިކޮށްފައެވެ. އަދި ސާފް ޗެމްޕިއަންޝިޕުގައި ނޭޕާލުން ރާއްޖެއާ ދެކޮޅަށް ހަތް މެޗެއް ކުޅެފައިވާއިރު، އޭފެ ތެރެއިން އެއްވެސް މެޗަކުން ނޭޕާލް މޮޅުވެފައެއް ނުވެއެވެ.

މި ފަހަރުގެ ސާފް ޗެމްޕިއަންޝިޕަށް ނޭޕާލުން ނުކުންނާނީ ކުވޭތުގެ ކޯޗު އަބްދުﷲ އަލް މުތައިރީގެ އިރުޝާދުގެ ދަށުންނެވެ. އެކަމަކު ދާދި ފަހުން ނޭޕާލުގެ ފުޓްބޯޅަ ފެޑަރޭޝަނުގެ ބައެއް މެމްބަރުންނާއި މުތައިރީއާ ދެމެދު ޚިޔާލު ތަފާތުވުންތަކެއް ހުރި ކަމަށް ރިޕޯޓުތައް ބުނެއެވެ. އެހެންނަމަވެސް ފަހު ވަގުތު ނޭޕާލުގެ ފުޓްބޯޅަ ފެޑަރޭޝަނުން ވަނީ މުތައިރީ ކޯޗު ކަމުގައި ބެހެއްޓުމަށް ނިންމާފައެވެ.

މި އަހަރުގެ މުބާރާތަށް ނޭޕާލުން ނުކުންނައިރު، އެ ޓީމަށް އޮތް އެންމެ ބޮޑު ހިތްހަމަޖެހުމަކީ ރާއްޖޭގެ ދަނޑަށް އެ ޓީމު ކުޅުންތެރިން ފަރިތަވުމެވެ. ކޯޗު މުތައިރީ މީގެ ކުރިން ނޭޕާލުގެ މީޑިއާއަކަށް ދިން އިންޓަވިއުއެއްގައިވެސް ވަނީ އެކަން ފާހަގަކޮށްފައެވެ. އެގޮތުން އެ ޓީމުގެ ކެޕްޓަން އަދި ގޯލްކީޕަރު ކިރަން ޝެމްޝޮން ވަނީ މީގެ ކުރިން ރާއްޖޭގެ ޓީސީ ސްޕޯޓްސް ކުލަބަށް ކުޅެފައެވެ.

މި ފަހަރުގެ ސާފް ޗެމްޕިއަންޝިޕުގެ ފުރަތަމަ މެޗުގައި ރާއްޖެއާ ދެކޮޅަށް ނޭޕާލް ނުކުންނައިރު، މުބާރާތުގެ ދެވަނަ މެޗުގައި އެ ގައުމު ނުކުންނާނީ އަންނަ ހޯމަ ދުވަހު ސްރީލަންކާއާ ދެކޮޅަށެވެ. އަދި މި މަހުގެ 10 ވަނަ ދުވަހު އިންޑިއާއާ ދެކޮޅަށް ނުކުންނައިރު، ފަހު މެޗުގައި މި މަހުގެ 13 ވަނަ ދުވަހު ނޭޕާލް ނުކުންނާނީ ބަންގްލަދޭޝާ ދެކޮޅަށެވެ.