އިންގްލެންޑާއެކު ވޯލްޑް ކަޕް ކާމިޔާބުކުރި ހަންޓް މަރުވެއްޖެ

އިންގްލެންޑަށް 1966 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްދިން ފޯވާޑް ރޮޖާ ހަންޓް (ސާ ރޮޖާ) އުމުރުން 83 އަހަރުގައި މަރުވެއްޖެއެވެ.

އިންގްލެންޑަށް 34 މެޗު ކުޅެދީފައިވާ ހަންޓް ވަނީ 1966 ވަނަ އަހަރު އިންގްލެންޑުން ވޯލްޑް ކަޕުގެ ޗެމްޕިއަންކަން ހޯދިއިރު، މުބާރާތުގައި އެ ޓީމުން ކުޅުނު ހަ މެޗުގައިވެސް ކުޅެފައެވެ. އަދި މި ހަ މެޗުގައި އޭނާ ވަނީ ތިން ލަނޑު ޖަހާފައެވެ.

މީގެ އިތުރުން ހަންޓް ވަނީ ކުލަބު ކެރިއަރުގައި ލިވަޕޫލާއެކު ގިނަ ކާމިޔާބީތަކެއް ހޯދާފައެވެ. އެގޮތުން 1958 ވަނަ އަހަރު ހަންޓް އެންމެ ފުރަތަމަ ލިވަޕޫލާ ގުޅުނުއިރު އެ ޓީމު އޮތީ އިނގިރޭސި ދެވަނަ ޑިވިޝަނުގައެވެ. އެކަމަކު ހަންޓުގެ މޮޅު ކުޅުމާއެކު 1962 ވަނަ އަހަރު ލިވަޕޫލުން ވަނީ ދެވަނަ ޑިވިޝަނުގެ ޗެމްޕިއަންކަން ހޯދައި، ފުރަތަމަ ޑިވިޝަނަށް ޕްރޮމޯޓުވެފައެވެ.

އޭގެ ފަހުން ހަންޓް ވަނީ ލިވަޕޫލާއެކު 1964 ވަނަ އަހަރާއި 1966 ވަނަ އަހަރު ފުރަތަމަ ޑިވިޝަނުގެ ޗެމްޕިއަންކަން ހޯދާފައެވެ. އަދި ވަނީ އެ ކުލަބާއެކު 1965 ވަނަ އަހަރުގެ އެފްއޭ ކަޕުގެ އިތުރުން އެފްއޭ ޗެރިޓީ ޝީލްޑް ތިން ފަހަރު ކާމިޔާބުކޮށްފައެވެ. އަދި ލިވަޕޫލުގެ ޖާޒީގައި ކުޅުނު 492 މެޗުގައި އޭނާ ވަނީ ޖުމްލަ 285 ލަނޑު ޖަހާފައެވެ.

ހަންޓް މަރުވުމުގެ ހިތާމައިގައި ބައިވެރިވެ ލިވަޕޫލުގެ ކޯޗު ޔާގެން ކްލޮޕް ބުނީ ހަންޓަކީ ލިވަޕޫލުގެ ތާރީޚުގައި ދެވަނައަށް އެންމެ މުހިންމު އެއް ކުޅުންތެރިޔާ ކަމަށެވެ. އެގޮތުން ލިވަޕޫލުގެ ލެޖެންޑުންގެ ތެރޭގައި ހަންޓް ހިމެނޭއިރު، މިހާރު ލިވަޕޫލް އޮތް ހާލަތަށް ގެނައުމުގައި ހަންޓުގެ ދައުރު ބޮޑު ކަމަށްވެސް ވަނީ ބުނެފައެވެ.

ލިވަޕޫލާއެކު ހަންޓް ގިނަ ރިކޯޑުތަކެއްވެސް ހެދިއިރު، އޭގެ ތެރޭގައި އިނގިރޭސި ފުރަތަމަ ޑިވިޝަނުގައި ލިވަޕޫލަށް އެންމެ އަވަހަށް 100 ލަނޑު ހަމަކުރި ކުޅުންތެރިޔާގެ ރިކޯޑުވެސް ހިމެނުނެވެ. އެކަމަކު މިދިޔަ ހޮނިހިރު ދުވަހު ލިވަޕޫލުގެ ފޯވާޑް މުހައްމަދު ސަލާހު ވަނީ ހަންޓުގެ އެ ރިކޯޑު މުގުރާލާފައެވެ. ލިވަޕޫލަށް ކުޅެދިން 151 މެޗުން ސަލާހު 100 ލަނޑު ހަމަކުރިއިރު، މީގެ ކުރިން ހަންޓް އެ ރިކޯޑު ހަދާފައިވަނީ 152 މެޗުންނެވެ.

ލިވަޕޫލުގައި ކާމިޔާބު 11 ސީޒަން ހޭދަކުރުމަށްފަހު ހަންޓް ވަނީ އިންގްލެންޑުގެ ބޮލްޓަން ވަންޑަރާސްއަށްވެސް ކުޅެފައެވެ.