ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރަށް ސެކިއުރިޓީ ދިނުމަށް ރައްޔިތުންގެ މަޖިލީހުން އެމްއެންޑީފްގައި އެދިއްޖެއެވެ.

އެންމެ މަތީ ދަރަޖައިގެ ސެކިއުރިޓީ ހަމަޖައްސަވައިދެއްވުމަށް ޖާބިރު އެދިވަޑައިގެންފައި މިވަނީ އއ. މަތިވެރިއަށް ދިއުމުން އޭނާއަށް ހަމަލާދިން ކަމަށް ބުނާ މައްސަލައަކާ ގުޅިގެންނެވެ. ރައްޔިތުންގެ މަޖިލީހުން ޑިފެންސް މިނިސްޓަރަށް ފޮނުއްވި ސިޓީގައި ބުނެފައިވަނީ ސެކިއުރިޓީ ހަމަޖައްސަވައި ދެއްވުމަށް ޖާބިރު އެދި ވަޑައިގެންފައިވާ ކަމަށެވެ. އެހެންކަމުން ޖާބިރަށް ސެކިއުރިޓީ ދިނުމަށް އެދޭ ކަމަށެވެ. މެމްބަރުން އެދިއްޖެ ހާލަތެއްގައި އެ މެމްބަރަކަށް ސެކިއުރިޓީ ހަމަޖައްސައިދޭން ޖެހޭ ކަމަށް މަޖިލީހުގެ ގަވާއިދުގައި ބުނެފައިވެއެވެ.

ސެކިއުރިޓީއަށް އެދިވަޑައިގެން، ރައްޔިތުންގެ މަޖިލީހުގެ ރައީސަށް ޖާބިރު ފޮނުއްވި ސިޓީގައި ބުނެފައިވަނީ, އެމަނިކުފާނަކީ ދިވެހި ރައްޔިތުންގެ ޕާޓީގެ ލީޑަރު ކަމަށްވާތީއާއި، ރައްޔިތުންގެ މަޖިލީހުގެ މެމްބަރަކަށްވާތީ ޑިފެންސް މިނިސްޓްރީ މެދުވެރި ކުރައްވައި ވީއެންމެ އަވަހަކަށް، އެންމެ މަތީ ދަރަޖައިގެ ސެކިއުރިޓީ ހަމަޖައްސައިދިނުމަށް އެދިވަޑައިގަންނަވާ ކަމަށެވެ.

އެމަނިކުފާނަކީ، ރައްޔިތުންގެ ހައްގުގައި ރައްޔިތުންގެ މަޖިލީހުގައި ވަކާލާތުކޮށް ޑިމޮކްރެސީއަށްޓަކައި މަސައްކަތްކުރައްވާ ބޭފުޅެއް ކަމަށާއި، އެކަން ނިމުމަކަށް ގެނައުމަށްޓަކައި މަރާލާނެ ކަމުގެ އިންޒާރު ތަކުރާރުކޮށް ލިބެމުން އަންނަ ކަމަށެވެ. އަދި އއ. މަތިވެރިން ދިން ހަަމަލާއިން ﷲގެ ހެޔޮ ރަހުމަތާއެކު ސަލާމަތްވެފައިވާކަމަށް ވެސް ސިޓީގައި ބުނެފައިވެއވެެ.

ޖާބިރު، އއ. މަތިވެރިއަށް ދިއުމުން އޭނާއަށް ހަމަލާދިން ކަމަށް ބުނާ މައްސަލައެއްގައި ދެ މީހަކު ވަނީ ހައްޔަރުކޮށްފައެވެ.

ފުލުހުން ބުނެފައިވަނީ ހައްޔަރުކޮށްފައިވަނީ 42 އަހަރާއި 19 އަހަރުގެ ދިވެހި ދެ ފިރިހެނުންނެވެ. ރަސްދޫ ކޯޓުން ވަނީ މި މަހުގެ 23ވަނަ ދުވަހު، މި ދެ މީހުންގެ ބަންދަށް 7 ދުވަސް ޖަހާފައެވެ.

ޖާބިރަށް ހަމަލާދިންކަމަށްބުނެ ފުލުހުން ދެ މީހަކު ހައްޔަރުކޮށްފައިވާއިރު، މި މަހުގެ 21 ދުވަހު ޖާބިރު އެ ރަށަށް އަރަން މަސައްކަތް ކުރުމުން، މަތިވެރި ކައުންސިލަށް ދައްކަންޖެހޭ 4.7 މިލިއަން ރުފިޔާ ނުދައްކާ ކަމަށް ބުނެ، އެ ރަށު ރައްޔިތުން ވަނީ މުޒާހަރާކޮށްފައެވެ. އަދި ޖާބިރަށް ވަނީ އަނިޔާ ވެސް ކޮށްފައިވެއެވެ. މި ހަމަނުޖެހުން ހިންގަން ފެށުމުން އެރަށު ފުލުހުން ވަނީ ޖާބިރު ޕޮލިސް ސްޓޭޝަނަށް ގެންގޮސްފައެވެ. އަދި ފަހުން އެސްއޯ ފުލުހުންނާއެކު ޖާބިރު ޕޮލިސް ސްޓޭޝަނުން ނުކުތް ވަގުތު ވެސް ހަމަލާދީފައިވާ ކަމަށް ޖާބިރު ވިދާޅުވިއެވެ.

ރާއްޖެއެމްވީއަށް މަތިވެރި ކައުންސިލްގެ ރައީސް އަހުމަދު އަސްލަމް ވިދާޅުވީ މަތިވެރީގެ ރައްޔިތުން ޖާބިރާ ދެކޮޅަށް މުޒާހަރާއަށް ނުކުތީ ކައުންސިލަށް ދައްކަން ޖެހޭ 4.7 މިލިއަން ރުފިޔާ ނުދައްކާތީ ކަމަށާއި، އެފައިސާ ދައްކަން ރައްޔިތުން ޑިމާންޑް ކުރި ކަމަށެވެ.