ކޮވިޑް-19އާ ގުޅިގެން ހުއްޓާލި އެލަވަންސް އަލުން ދޭއިރު، ނުލިބި ދިޔަ ދުވަސްތައް ނުހިމެނޭނެ

ކޮވިޑް-19ގެ ސަބަބުން ގެއްލިގެންދިޔަ އާމްދަނީއަކި މުސްތަގްބަލުގައި ލިބޭނެ އާމްދަނީއެއް ނޫން ކަމުން, ދެމެހެއްޓެނިވި ގޮތެއްގައި ދައުލަތުގެ ޚަރަދުތައް ބެލެހެއްޓުމަށް ހުއްޓާލުމަށް ނިންމި އެލަވަންސް އަލުން ދޭން ފަށާއިރު، ނުލިބި ދިޔަ ދުވަސްތަކަށް އެލަވަންސް ނުދޭ ގޮތަށް ނިންމާފައިވާ ކަަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، ވެލިދޫ ދާއިރާގެ މެންބަރު މުޙައްމަދު ޢަބްދުﷲ ޝަފީޤް ލިޔުމުން ޖަވާބު ހޯއްދެވުމަށް ކުރެއްވި ސުވާލަށް ޖަވާބު ދެއްވަމުންނެވެ. ޝަފީގް ކުރެއްވި ސުވާލަކީ، 2020 ވަނަ އަހަރުން ފެށިގެން ސިވިލް ސަރވިސް މުވައްޒަފުންގެ ސެޓްފިކެޓް އެލަވަންސްއާއި ޕާފޯމަންސް އެލަވަންސް ދިނުން ވަނީ ހުއްޓާލާފައިވާ ޝަކުވާ ބައެއް މުވައްޒަފުންގެ ފަރާތުން، ޚާއްޞަ ގޮތެއްގައި ތަޢުލީމީ ދާއިރާގައި މަސައްކަތްކުރައްވާ ޓީޗަރުންގެ ފަރާތުން ލިބިފައިވާ ކަމަށެވެ. އެހެންކަމުން މި އެލަވަންސް ދެއްވަން ފައްޓަވާނީ ކޮން އިރަކުންތޯ އާއި، އަދި ދެއްވަން ފައްޓަވާއިރު، އެލަވަންސް ނުލިބި ފާއިތުވެގެން މިދިޔަ ދުވަސްތައް ހިމަނުއްވާނެތޯއެވެ.

ސުވާލަށް ޖަވާބުދެއްވައި މިނިސްޓަރ ފޮނުވި ސިޓީގައި ވިދާޅުވެފައިވަނީ، ޕާރފޯމެންސް އެލަވަންސް ދޭން ފަށާނީ، ދައުލަތުގެ އާމްދަނީއަށް އައި ހީނަރުކަން ފިލައިގެން ދިޔުމުން ކަަމަށެވެ. މުވައްޒަފުންގެ ޕްރޮމޯޝަން ކޮވިޑް-19އާ ގުޅިގެން ވަގުތީ ގޮތުން ހުއްޓާލާފައިވާ ކަމަށާއި، މިގޮތުން ތައުލީމީީ ދާއިރާ ހިމެނޭ ގޮތުން ދެވޭ ސެޓްފިކެޓް އެލަވަންސާއި، ޕާރމޯމެންސް އެލަވަންސް ދިނުން ވަގުތީ ގޮތުން ވަނީ މެދުކަނޑާލެވިފައި ކަމަށް ވިދާޅުވިއެވެ. އެހެންނަމަވެސް ގިނަ މުވައްޒަފުންގެ އެދުމުގެ މަތިން ސެޓްފިކެޓް އެލަވަންސް މިހާރުވަނީ ދޭން ފަށާފައި ކަމަށާއި، ޕާރމޯމެންސް އެލަވަން ދޭން ފަށަން އެންމެ އެކަށީގެންވަނީ ދައުލަތުގެ އާމްދަނީއަށް އައި ހީނަރުކަން ފިލައި ދިޔުމުން ކަމަށް ވިދާޅުވިއެވެ. ތަންފީޒުކުރާނެ ގޮތް އެކުލަވާލުމުގެ އިތުރުން ވަޒީފާގެ ގޮތުން އެއްހަމަ މުވައްޒަފުންގެ މެދުގައި މުސާރައާއި އެލަވަންސްތައް ހަމަހަމަ ކުރުމަށް ކުރާ މަސައްކަތްތައްވެސް ޕޭ ކޮމިޝަނުން ކުރަމުން އަންނަ ކަމުގައި ވިދާޅުވިއެވެ.

ކޮވިޑް-19އާއެކު ދިމާވި އިގްތިސާދީ ތަދުމަޑުކަމުގެ ސަބަބުން ދައުލަތުގެ އާމްދަނީއަށް ކުރިމަތިވި ހީނަރުކަމާއެކު ދައުލަތުގެ ކޭޝަ ފްލޯ މެނޭޖް ކުރުމަށްޓަކައި ދައުލަތުގެ ޚަރަދުތައް ކުޑަކުރުމަށް ގިނަގުނަ ފިޔަވަޅުތަކެއް އަޅަން ޖެހުނު ކަމަށް ވިދާޅުވިއެވެ. މިނިސްޓަރ ވިދާޅުވީ، ޖުލައި 2021ގައި މަޖިލީޖހަށް ހުށަހެޅި ފިސްކަލް ސްޓްރެޓެޖީ 2022 - 2024ގައިވެސް ބަޔާން ކޮށްފައިވާ ފަދައިން ކޮވިޑް-19ގެ ހާލަތުން އަރައިގަނެވި އާއްމު ހާލަތަކަށް ރުޖޫއަވެވެންދެން ޚަރަދުތައް ކޮންޓްރޯލް ކުރުމަށް އެޅެންހުރި ފިޔަވަޅުތައް އަޅަމުން ގެންގޮސް އެ ފިޔަވަޅުތައް ދެމެހެއްޓުމަކީ ކޮންމެހެން ކުރަންޖެހޭ ކަމެއް ކަމަށެވެ.

އެކަމަށް އެންމެ ފުރަތަމަ ކުރެވެން އޮތީ، ކޮވިޑާ ނުގުޅޭ ޚަރަދުތަކެއް ކަަމަށާއި، އެގޮތުން މުވައްޒަފުންނަށް ކުރާ ޚަރަދުގެ ތެރެއިން ގިނަ ދާއިރާތަކަކުން ޚަރަދު ކުޑަކުރުުގެ ފިޔަވަޅުތައް އަޅާފައިވާކަން ފާހަގަކުރެއްވިއެވެ. ކުރިން ހުރި ވަރަށް ދައުލަތުގެ އާމްދަނީ ކުރިން ހުރިވަރަށް އިއާދަ ކުރެވެން އޮތީ، 2023ވަނަ އަހަރު ކަމުން މިހާރު އަޅާފައިވާ ފިޔަވަޅުތައް އެހިސާބަަށް ދަމަހައްޓައިގެން މެނުވީ ދައުލަތުގެ ކޭޝް ފްލޯ ހިގެހެއްޓުމަށް ދަތިވާނެތީ، ޚަރަދު ކުޑަކުރުމަށް އަޅާފައިވާ ފިޔަވަޅުތައް ދަމަހައްޓަންވަނީ ބަލާފައި ކަމަށް ވިދާޅުވިއެވެ.