އަސްކަރީ ޢިއްޒަތުގައި ލާންސް ކޯޕްރަލް މުޙައްމަދު ސުލްޠާން ވަޅުލައިފި

އިންޑިއާގައި އަސްކަރީ ތަމްރީނު ފުރިހަމަ ކުރަމުންދިޔަ ލާންސް ކޯޕްރަލް މުޙައްމަދު ސުލްޠާން އަސްކަރީ ޢިއްޒަތުގައި ވަޅުލައިފިއެވެ.

ސުލްޠާންގެ ޖަނާޒާގެ ކަންކަން ކުރިޔަށް ގެންދިޔައީ މަޣްރިބް ނަމާދަށްފަހު އާސަހަރާ މިސްކިތުގައެވެ. ޖަނާޒާގައި އެންސީޓީސީގެ ޑިރެކްޓަރ ޖެނެރަލް ބްރިގޭޑިއަރ ޒަކަރިއްޔާ މަންޞޫރާއި، ސިފައިންގެ އޮފިސަރުން ބައިވެރިވެވަޑައިގެންނެވިއެވެ.

ސުލްޠާން ނިޔާވެފައި ވަނީ އިންޑިއާގެ ނެޝަނަލް ޑިފެންސް އެކެޑެމީގެ، ކޭމްޕް ގްރީން ހޯންގައި ހޮނިހިރު ދުވަހު އޮތް އެންޑިއުރެންސް ރަންއެއް ފުރިހަމަ ކުރަން އުޅުމުގެ ތެރޭގައެވެ. ހޮނިހިރު ދުވަހުގެ މެންދުރުފަހު އޮތް ދުވުމުގެ ތެރޭގައި ސުލްޠާން ވެއްޓުމުން، މެންދުރު 1:38 ހާއިރު އިމަރޖެންސީގައި ހޮސްޕިޓަލަށް ގެންގޮސްފައިވާ ކަމަށާއި، ހޮސްޕިޓަލަށް ގެންދެވުނުއިރުވެސް އޭނާ ވަނީ ނިޔާވެފައިކަމަށް އެމްއެންޑީއެފުން މައުލޫމާތުދެއެވެ.

ސުލްޠާންގެ ހަށިގަނޑުގެ ޕޯސްޓްމޯޓަމް ހަދާނެ ކަމަށް މީގެ ކުރިން ބުނެފައިވަނީ ނަމަވެސް، އެމްއެންޑީއެފުން ބުނީ އާއިލާގެ އެދުމަށް ޕޯސްޓްމޯޓަމް ނުހަދާ ކަމަށެވެ. އޭނާ ނިޔާވުމާ ގުޅިގެން އާދީއްތަ ދުވަހުގެ ހަވީރު 6:00ން ފެށިގެން 48 ގަޑިއިރަށް ސިފައިންގެ މަރުކަޒުތަކުގައި ސިފައިންގެ ދިދަ ވަނީ ބައިދަނޑިއަށް ތިރިކޮށްފައެވެ. 

2018 އޭޕްރީލް 8 ވަނަ ދުވަހު ސިފައިންގެ ޚިދުމަތާ ގުޅުނު ސުލްޠާން ފުރިހަމަކުރަމުންދިޔައީ 2021 މާރިޗް 1އިން 2024 މާރިޗް 15އަށް ޕޫނޭ ނެޝަނަލް ޑިފެންސް އެކެޑެމީގައި ކުރިއަށް ގެންދިޔަ 145 ވަނަ އޮފިސަރ ކެޑޭޓް ކޯހެވެ. މިކޯހަށް ދިއުމުގެ ކުރިން އޭނާ މަސައްކަތް ކުރަމުން ގެންދިޔައީ އިންޓަގްރޭޓެޑް ހެޑްކްއާޓަރޒް (ޖޭ-1)ގައެވެ. އޭނާއަށް ލާންސް ކޯޕްރަލްކަމުގެ ރޭންކް ލިބިފައިވަނީ މި ކޯސް ފުރިހަމަ ކުރަމުންދަނިކޮށެވެ.