އާންމު ގަވާއިދުތަކުގެ ގާނޫނުގައިވާ ބައެއް ގަވާއިދުތަކަށް އަމަލުކުރުން އަނެއްކާވެސް ފަސްކޮށްފި
27 ސެޕްޓެމްބަރު 2021 | ހޯމަ 13:46ޖަދުވަލު 1 އަދި 2ގައި ބަޔާންކޮށްފައިވާ ގަވާއިދުތަކަށް އަމަލުކުރުމުގެ މުއްދަތު އަންނަ އަހަރުގެ ސެޕްޓެމްބަރ މަހުގެ ނިޔަލަށް ވަނީ ފަސްކޮށްފައި
ގަވާއިދު ކޮމިޓީ
އާންމު ގަވާއިދުތަކުގެ ގާނޫނުގައިވާ ބައެއް ގަވާއިދުތަކަށް އަމަލުކުރުން އަނެއްކާ ވެސް ފަސްކޮށްފިއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވަނީ އާންމު ގަވާއިދުތަކާބެހޭ ޤާނޫނުގެ ޖަދުވަލު 1 އަދި 2 ގައި ބަޔާންކޮށްފައިވާ ގަވާއިދުތަކަށް އަމަލުކުރުމުގެ މުއްދަތު އަންނަ އަހަރުގެ ސެޕްޓެމްބަރ މަހުގެ ނިޔަލަށް ފަސްކޮށްފައެވެ.
މީގެއިތުރުން މިމުއްދަތުގެ ތެރޭގައި އާންމު ގަވާއިދުތަކާއި ބެހޭ ގާނޫނުގެ ޖަދުވަލު 1 އަދި 2ގައި ހިމެނޭ ގަވާއިދުތަކާ ގުޅިގެން އެކުލަވާލަންޖެހޭ ބިލުތަކުގެ ތެރެއިން މިއަހަރުގެ އޮގަސްޓްމަހުގެ 29 ވަނަ ދުވަހު އެޓަރނީ ޖެނެރަލް އޮފީހުން ފޮނުވާފައިވާ ސިތީގައި ބަޔާންކޮށްފައިވާ, ނުނިމި ހުރި ބިލްތަކުގެ މަސައްކަތް ނިންމައި ވީހާވެސް އަވަހަކަށް ރައްޔިތުންގެ މަޖިލީހަށް ފޮނުވައިދިނުމަށް އޭޖީ އޮފީހުގައި އެދުމަށްވެސް ކޮމިޓީން ވަނީ ނިންމާފައެވެ. އަދި އެގަވާއިދުތަކަށް އަމަލުކުރުމަށް އިތުރުކުރެވޭ މުއްދަތުގެ ތެރޭގައި ބިލްތަކުގެ މަސައްކަތް ނިންމައި ރައްޔިތުންގެ މަޖިލީހުން ފާސްވެ ތަޞްދީޤުކޮށް ނިންމަންޖެހޭ ގޮތަށް މަސައްކަތްކުރުމަށް ކަމާގުޅުންހުރި ހުރިހާ މުއައްސަސާތަކެއްގައި އެދުމަށްވެސް ކޮމިޓީން ވަނީ ނިންމާފައެވެ.
މިފަހަރު ކޮމިޓީން ނިންމާފައިވަނީ ޖަދުވަލު 1ގައި ވާ ދެ ގަވާއިދެއް އުވާލުމަށެވެ. އަދި ޖަދުވަލް 1ގައި ހިމެނޭ 16 ގަވާއިދެއް އަދި ޖަދުވަލް 2ގައި ހިމެނޭ 3 ގަވާއިދަކާއެކު ޖުމްލަ 19 ގަވާއިދަކަށް އަމަލުކުރާ މުއްދަތު 1 އަހަރުގެ މުއްދަތަށް ފަސްކުރުމަށެވެ.
އެންމެ ފަހުން މަޖިލީހުން ފާސްކޮށްފައިވަނީ ދެ ގަވާއިދެއް އުނިކުރުމަށެވެ. އަދި ޖަދުވަލް 1ގައި ހިމެނޭ 18 ގަވާއިދެއް އަދި ޖަދުވަލް 2ގައި ހިމެނޭ 3 ގަވާއިދެއް ހިމެނޭގޮތަށް ޖުމްލަ 21 ގަވާއިދަކަށް އަމަލުކުރުމުގެ މުއްދަތު އިތުރުކުރުމަށް ވަނީ ފާސްކޮށްފައެވެ.
މިއީ މިހާރު އަމަލުކުރަމުން އަންނަ އައު ގާނޫނުއަސާސީ އައުމާއެކު, ކުރިން އަމަލުކުރަމުންދިޔަ ގަވާއިދުތަކަށް އަމަލުކުރުމުގެ ގާނޫނީ ބާރެއް ދިނުމަށްޓަކައި އެކުލަވާލާފައިވާ ގާނޫނެކެވެ. މި ގާނޫނުގެ ދަށުން ހުރި ގަވާއިދުތަކަށް އަމަލުކުރަމުން އަންނާނީ އެގަވާއިދަކާ ގުޅުންހުރި ގާނޫނެއް ވުޖޫދުވަންދެންނެވެ. އެގާނޫނެއް ވުޖޫދުވަންދެން ގަވާއިދުތަކަށް އަމަލުކުރުމުގެ މުއްދަތު އަންނަނީ އިތުރުކުރަމުންނެވެ. އެގޮތުން މީގެކުރިން ރައްޔިތުންގެ މަޖިލީހުން ވަނީ 13 ފަހަރަށް އެމުއްދަތު އިތުރުކޮށްދީފައެވެ.
