ވ. ފެލިދޫ ގިރާ ސަރަހައްދު ހިމާޔަތްކުރުމަށް ހުށަހެޅި ގަރާރަށް ވޯޓު ދެއްވުމަށް ފަޒުލް ވަޑައިނުގަންނަވާ

ވ. ފެލިދޫ ގިރާ ސަރަހައްދު ހިމާޔަތްކުރުމަށް ހުށަހެޅި ގަރާރު ރައްޔިތުންގެ މަޖިލީހުގެ އެންވަޔަރަންމެންޓް އެންޑް ކްލައިމެޓް ޗޭންޖް ކޮމިޓީއަށް ފޮނުވައިފިއެވެ.

ގަރާރު ކޮމިޓީއަށް ފޮނުވުމަށް ފާސްވީ ވޯޓުގައި ބައިވެރިވެވަޑައިގަތް 36 މެމްބަރުންގެ އިއްތިފާގުންނެވެ. ގަރާރު ހުށަހެޅުއްވި ފެލިދޫ ދާއިރާގެ މެމްބަރު އިބްރާހިމް ފަޒުލް ރަޝީދު ވޯޓުގައި ބައިވެރިވެވަޑައިގަތުމަށް މަޖިލީހަށް ވަޑައެއް ނުގަންނަވައެވެ.

ފަޒުލް ހުށަހެޅުއްވި ގަރާރުގައި ބުނެފައިވަނީ ފެލިދޫ އާދަޔާ ޚިލާފަށް ގިރަމުންދިއުމުގެ ސަބަބުން، ރަށުގެ ތިމާވެއްޓަށް ކުރިމަތިވެފައިވާ ނާޒުކު ހާލަތުގެ ސަބަބުން ފެލިދޫގެ ރައްޔިތުންނަށް ބިރުވެރިކަން ކުރިމަތިވެ، ހޮސްޕިޓަލާއި، ސްކޫލާއި ރައްޔިތުންގެ ގޯތިގެދޮރަށް ކުރިމަތިވެފައިވާ ނުރައްކަލުގެ ސަބަބުން އެފަރާތްތަކުގެ ދިރިއުޅުމަށް ކުރިމަތިވެފައިވާ ގޮންޖެހުންތައް ބޮޑުވެ، ފެލިދޫގެ ރީތިކަމާއި ގުދުރަތީ ގޮނޑުދޮށް ހަލާކުވެ، ރަށްގިރުމުގެ ސަބަބުން ރަށުގެ ރައްޔިތުންނަށް ވަރަށް ބޮޑު ތަކުލީފެއް އުފުލަންޖެހިފައިވާކަމަށެވެ.

ގިރާ ސަރަޙައްދު ޙިމާޔަތްކުރުމުގެ މަސައްކަތް މިއަހަރުގެ ބަޖެޓުގައި ހިމެނިފައިވީނަމަވެސް އެކަންވެސް ނުފެށި ލަސްވަމުންދާތީ ފެލިދޫގެ ތިމާވެއްޓަށް ކުރިމަތިވެފައިވާ މައްސަލަ ހައްލުކޮށްދެއްވުމަށް ސަރުކާރުގެ ކަމާބެހޭ އިދާރާތަކުން އެޅުއްވެން ހުރި ހުރިހާ ފިޔަވަޅެއް އަޅުއްވައި ދެއްވާ، ފެލިދޫގެ ރައްޔިތުންނަށް ސަލާމަތްތެރިކަމާއި، ރައްކާތެރި މާހައުލެއް ހޯއްދަވާ ދެއްވުމަށް ކުރައްވަންޖެހޭ ކަންކަން ވީހާވެސް އަވަސް ކޮށްދެއްވުމަށް ގަރާރުގައި އެދިފައިވެއެވެ.