އަޑިއަށްދިޔަ ސަފާރީގެ ބައެއް ތަކެތި އޮޔާދާތީ، ދަތުރުކުރާ ފަރާތްތަކުން ސަމާލުވުމަށް އިލްތިމާސްކޮށްފި

މޫސުން ގޯސްވުމުގެ ސަބަބުން އާދީއްތަ ދުވަހުގެ ހެނދުނު 8:39 ހާއިރު އަޑިއަށްދިޔަ ސަފާރީގެ ބައެއް ތަކެތި އޮޔާދާތީ, އެސަރަހައްދުން ދަތުރުކުރާ ފަރާތްތަކުން ސަމާލުވުމަށް އެމްއެންޑީއެފުން އިލްތިމާސްކޮށްފިއެވެ.

އެމްއެންޑީއެފުން ބުނީ ކ.ތިލަފުށީ ހުޅަނގުދެކުނުން 4 ނޯޓިކަލް މޭލުން ސަފާރީއެއް އަޑިއަށް ގޮސްފައިވާކަމަށެވެ. މިސަފާރީގައި ހުރި ބައެއް މުދާތައް އެސަރަހައްދުން އިރަށް އޮޔާދާތީ, އެސަރަހައްދުން ދަތުރުކުރާ ފަރާތްތަކުން ޚާއްސަ ސަމާލުކަމެއް ދިނުމަށް އިލްތިމާސްކުރާކަމަށެވެ. އަދި ޚާއްސަ ގޮތެއްގައި ރޭގަނޑު މިސަރަހައްދުން ދަތުރުކުރާ އުޅަނދުތަކުން މިކަމަށް ޚާއްސަ ސަމާލުކަމެއް ދިނުމަށް ވަނީ އިލްތިމާސްކޮށްފައެވެ.

ކުރިޔަށްއޮތް 24 ގަޑިއިރުވެސް ރާއްޖޭގެ މޫސުން ގޯސްވާނެކަމަށް މެޓް އޮފީހުން ވަނީ ބުނެފައެވެ. އެހެންކަމުން ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށް ވަނީ އިލްތިމާސްކޮށްފައެވެ.