ނިޔާވި އޮފިސަރުގެ އޯޓޮޕްސީ ހަދަން ނިންމައިފި
އޯޓޮޕްސީ ހެދުމަށް ނިންމީ މަރުގެ ސަބަބު ކަށަވަރު ކުރުމަށް
މުޙައްމަދު ސުލްޠާން - ލާންސް ކޯޕްރަލް / އެމްއެންޑީއެފް
އިންޑިއާގެ ނޭޝަނަލް ޑިފެންސް އެކެޑެމީގައި އޮފިސަރ ކެޑޭޓް ތަމްރީނު ހަރަކާތުގައި އުޅެނިކޮށް ނިޔާވި، ލާންސް ކޯޕްރަލް މުޙައްމަދު ސުލްޠާންގެ އޯޓޮޕްސީ ހަދަން ނިންމައިފިއެވެ.
އިންޑިއާގެ ބައެއް ނޫސްތަކުން ރިޕޯޓުކުރި ގޮތުގައި ސުލްޠާންގެ އޯޓޮޕްސީހަދަން ނިންމާފައިވަނީ މަރުވި ގޮތް ޔަގީންކުރުމަށްކަމަށާއި، އަދި މި މަރު މިހާރު ދަނީ ތަހުގީގު ކުރެވެމުންކަމަށެވެ. އަދި ސުލްޠާންގެ ހަށިގަނޑު ސިފައިންގެ ރަސްމީ ޢިއްޒަތުގައި ފޮނުވުމުގެ މަސައްކަތް ވެސް ކުރަމުން އަންނަކަމަށް ވެސް އެ އެކަޑަމީއާ ހަވާލާދީ ނޫސްތަކުންވަނީ ބުނެފައެވެ.
ސުލްޠާން ނިޔާވެފައި ވަނީ ނޭޝަނަލް ޑިފެންސް އެކެޑެމީގެ، ކޭމްޕް ގްރީން ހޯންގައި ހޮނިހިރު ދުވަހު އޮތް އެންޑިއުރެންސް ރަންއެއް ފުރިހަމަ ކުރަން އުޅުމުގެ ތެރޭގައެވެ. ހޮނިހިރު ދުވަހުގެ މެންދުރުފަހު އޮތް ދުވުމުގެ ތެރޭގައި ސުލްޠާނު ވެއްޓުމުން, 13:58 ހާއިރު އިމަރޖެންސީގައި ހޮސްޕިޓަލަށް ގެންގޮސްފައިވާ ކަމަށާއި, ހޮސްޕިޓަލަށް ގެންދެވުނުއިރުވެސް އޭނާ ވަނީ ނިޔާވެފައިކަމަށް އެމްއެންޑީއެފުން މައުލޫމާތުދެއެވެ.
