އަޑިޔަށް ދިޔަ ސަފާރީން މާލެ ގެނައި އެކަކުގެ ހާލު ސީރިއަސް

އަޑިޔަށް ދިޔަ ހެންޑީ ކްރޫޒަރ ނަމަކަށް ކިޔާ ސަފާރީން މާލެ ގެނައި އެކަކުގެ ހާލު ސީރިއަސް ކަމަށް މައުލޫމާތު ލިބިއްޖެއެވެ.

ސަފާރީން ދަތުރުކުރި މީހުން ސަލާމަތް ކުރުމުގައި އުޅުނު މީހަކު ރާއްޖެއެމްވީއަށް މައުލޫމާތު ދެމުން ބުނީ އެކަކުގެ ހާލު ސީރިއަސް ކަމަށާއި ދެން ތިބި މީހުން ހާލު ރަނގަޅު ކަމަށެވެ. އަދި ހާލު ސީރިއަސްވި މީހާ މާލެ ގެނައި އެމްއެންޑީއެފުގެ ލޯންޗުގައި ވަކިން ކަމަށެވެ. އެ ސަފާރީން ޖުމްލަ 17 މީހުން ދަތުރުކުރިއިރު ހާދިސާގެ ރިޕޯޓް ލިބިފައިވަނީ އާދިއްތަ ދުވަހުގެ 08:39 ހާއިރު ކަމަށް އެމްއެންޑީއެފުން ވަނީ ބުނެފައެވެ.

މި ސަފާރީ އަޑިއަށް ދިޔައީ ބޮލިފުށި ކައިރިން ފުރައިގެން މާލެއަށް ދަތުރުކުރަމުން ދަނިކޮށެވެ. އެމީހާ ބުނީ ދެން ތިބި މީހުން މާލެ ގެނެސްފައިވަނީ އެމްއެންޑީއެފްގެ ކޯސްޓްގާޑާއި އެހެން ދޯންޏެއްގެ އެހީތެރިކަމާއެކު ކަމަށެވެ.

މި ހާދިސާގައި އެކަކު ނިޔާވިކަމަށް ވާހަކަ ފެތުރިފައިވާއިރު އަދި އެއްވެސް ރަސްމީ އިދާރާއަކުން މިކަން ކަށަވަރުވާ ގޮތް ވަނީ ނުވެފައެވެ. މޫސުން ގޯސްވެ، ކަނޑުމަތީގެ ތަފާތު ހާދިސާތަކުގެ މަޢުލޫމާތު އެމްއެންޑީއެފްގެ ކޯސްޓްގާޑަށް ލިބެމުންދާތީ، ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް އެމްއެންޑީއެފް އިން ވަނީ އިލްތިމާސްކޮށްފައެވެ.

އަދި ކުރިއަށްއޮތްތަނުގައި ވައިގަދަވެ، ކަނޑުތައް ގަދަވާނެކަމަށް މޫސުމާ ބެހޭ އިދާރާއިން ލަފާކޮށްފައިވާތީ ކަނޑުދަތުރުކުރައްވާ އެންމެހާ ފަރާތްތަކުން މޫސުމާބެހޭ އެންމެ ފަހުގެ މަޢުލޫމާތު ހޯދުމަށްފަހު ދަތުރުތައް ރޭވުމަށް ވެސް އެމްއެންޑީއެފްއިން އިލްތިމާސްކުރެއެވެ.