ރާއްޖެ ވަޑައިގެންނެވުމަށް ރައީސް ޞާލިހް ދުނިޔެއަށް ދެއްވި ދައުވަތާއެކު ފަތުރުވެރިން އަންނަ މިންވަރަށް އެނގުންވާނެ: ޑރ. މައުސޫމް
26 ސެޕްޓެމްބަރު 2021 | އާދީއްތަ 03:37ރާއްޖެއަށް މީހުން އައުމަށް ރައީސް ދައުވަތު ދެއްވި ވަގުތަކީ ވަރަށް އުފާވި ވަގުތެއް ކަމަށް ވިދާޅުވި
ރާއްޖެޓީވީގެ ފަލަސުރުހީ ޕްރޮގްރާމުގައި ޓޫރިޒަމް މިނިސްޓަރ ޑރ. އަބްދުﷲ މައުސޫމް ވާހަކަ ދައްކަވަނީ
އދ.ގެ އާންމު މަޖިލީހުގެ 76 ވަނަ ސެޝަންގައި ތަގުރީރު ކުރައްވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ދުނިޔެއަށް ދެއްވި ދައުވަތާއެކު ފަތުރުވެރިން އަންނަ މިންވަރަށް އެނގުންވާނެ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން މައުސޫމް ވިދާޅުވީ ރައީސް ދެއްވި ތަގުރީރުގައި މުހިންމު މައްސަލަތަަކަކަށް ވަރަށް ކުރުކޮށް ފޮނިކޮށް އަލިއަޅުއްވާލެއްވި ކަމަށެވެ. އެމެރިކާގެ މާކެޓަކީ ވަރަށް އަރައިގެން އަންނަ މާކެޓެއްކަން ފާހަގަކުރައްވައި މައުސޫމް ވިދާޅުވީ ރައީސް ޞާލިޙްގެ ދައުވަތުގެ ސަބަބުން ރާއްޖޭގެ ފަތުރުވެރިކަަމަށް ވަރަށް ބޮޑު ކުރިއެރުމެއް އަންނާނެ ކަމަށެވެ.
މައުސޫމް އިތުރަށް ވިދާޅުވީ ރާއްޖެއަށް މީހުން އައުމަށް ރައީސް ދައުވަތު ދެއްވި ވަގުތަކީ ވަރަށް އުފާވި ވަގުތެއް ކަމަށާއި އެއީ ވަރަށް ފުރިހަމަ ވަގުތުކޮޅެއް ކަމަށެވެ.
އދ.ގެ އާންމު މަޖިލީހުގެ 76 ވަނަ ސެޝަންގައި ރައީސް ވަނީ ރާއްޖެ އޮތީ ދުނިޔެއަށް މަރުހަބާ ކިޔުމަށް ޒީނަތްވެ ތައްޔާރަށް ކަމަށާއި، ސަނީ ސައިޑަށް އިރު އަރައިފި ކަމަށް ވިދާޅުވެ، ދައުވަތު ދެއްވާފައެވެ. ރައީސް ވިދާޅުވީ، ކޮވިޑް19 ގެ ބަލިމަޑުކަމުން އަރައިގަތުމަށް ރާއްޖެއިން ކުރެވުނު މަސައްކަތްތަކަށް މި ވަގުތު ހަމަޖެހުން ލިބިފައިވާ ކަމަށެވެ. އެގޮތުން ރާއްޖޭގެ ވެކްސިން ޖެހޭ ޢުމުރުފުރާގެ 95 އިންސައްތަ އަށްވުރެ ގިނަ ކިޔަވާ ކުދިންގެ ވެކްސިން ފުރިހަމަ ވެއްޖެ ކަމަށާއި، އަދި ރާއްޖޭގައި ދިރިއުޅޭ އާބާދީގެ 85 އިންސައްތަ އަށްވުރެ ގިނަ މީހުން ވެކްސިން ފުރިހަމަކޮށްފި ކަމަށް ވެސް ރައީސް ވިދާޅުވިއެވެ. ސްކޫލްތައް ހުޅުވި، ވިޔަފާރިތައް ހިނގައިގަނެ، ބޯޑަރާއެކު ރިސޯޓުތައް ހުޅުވިއްޖެ ކަމަށެވެ.
އދ.ގެ އާންމު މަޖިލީހުގައި ވާހަކަފުޅު ދައްކަވަމުން ރައީސް ވިދާޅުވީ، މުޅި އިންސާނިއްޔަތާއި ހުރިހާ ގައުމެއް ދިފާޢު ވެގެން މެނުވީ ހަގީގީ ދިޕާއެއް އަދި މާނަވީ ސަލާމަތެއް މިކަމަކުން ނުހޯދޭނެ ކަމަށެވެ. އަދި މިވަބާއިން ރައްކާތެރިވުމަށް އޮތް އެންމެ މުހިންމު ފިޔަވަޅަކީ ވެކްސިން ކަމަށާއި، އެހެންކަމުން، ހަމަހަމަކަމާއެކު ވެކްސިން ފޯރުކޮށްދިނުމަކީ އޮތް އެންމެ މުހިންމު ހައްލު ކަމަށެވެ.
އދ.ގެ އާންމު މަޖިލީހުގައި ކުރިއަށްދާ ގައުމުތަކުގެ ވެރިންގެ މަޝްވަރާތަކުން ނުކުންނަ ނަތީޖާއަކަށް، ދުނިޔެ ކުރާ އުއްމީދަށް އިޝާރާތް ކުރައްވަމުން، ރައީސް ޞާލިޙް ވިދާޅުވީ، މިފަދަ ބަލިމަޑުކަމެއް ތަކުރާރުވިޔަ ނުދިނުމަށް މުޅިދުނިޔޭގެ ލޯތައް އަމާޒުކޮށް އެތިބީ، މިތާ އެއްވެ މިއޮތް މަޖިލީހަށް ކަމަށެވެ. މިކަމަށް ހުރިހާ ގައުމުތަކެއްގެ ވަސީލަތްތަކާއި ހަކަތައާއި ޢިލްމާއި ހުނަރާއި ހޯދުންތައް އެއްތަންކޮށް ހިއްސާވުމަށް އެއްބަސްވާން ޖެހޭ ކަމަށް ވެސް ރައީސް ވަނީ ވިދާޅުވެފައެވެ.
