ރާއްޖެއިން ބޭރުގައި ތަމްރީނު ހަދަމުންދަނިކޮށް ނިޔާވީ ލާންސް ކޯޕްރަލް ސުލްޠާން
ނިޔާވެފައިވަނީ އެންޑިއުރެންސް ރަންއެއް ފުރިހަމަ ކުރަން އުޅުމުގެ ތެރޭގައި
މުޙައްމަދު ސުލްޠާން - ލާންސް ކޯޕްރަލް / އެމްއެންޑީއެފް
އިންޑިއާގެ ނޭޝަނަލް ޑިފެންސް އެކެޑެމީގައި އޮފިސަރ ކެޑޭޓް ތަމްރީނު ހަރަކާތުގައި އުޅެނިކޮށް މިއަދު މެންދުރުފަހު ނިޔާވެފައި ވަނީ ހިމަންދޫ، ރޯޒްމީޑް ލާންސް ކޯޕްރަލް މުޙައްމަދު ސުލްޠާން ކަމަށް އެމްއެންޑީއެފުން ބުނެފިއެވެ.
ސުލްޠާން ނިޔާވެފައި ވަނީ ނޭޝަނަލް ޑިފެންސް އެކެޑެމީގެ، ކޭމްޕް ގްރީން ހޯންގައި ހޮނިހިރު ދުވަހު އޮތް އެންޑިއުރެންސް ރަންއެއް ފުރިހަމަ ކުރަން އުޅުމުގެ ތެރޭގައެވެ. ހޮނިހިރު ދުވަހުގެ މެންދުރުފަހު އޮތް ދުވުމުގެ ތެރޭގައި ސުލްޠާނު ވެއްޓުމުން, 13:58 ހާއިރު އިމަރޖެންސީގައި ވަނީ ހޮސްޕިޓަލަށް ގެންގޮސްފައިވާ ކަމަށާއި, ހޮސްޕިޓަލަށް ގެންދެވުނުއިރުވެސް އޭނާ ވަނީ ނިޔާވެފައިކަމަށް އެމްއެންޑީއެފުން މައުލޫމާތުދެއެވެ.
2018 އޭޕްރީލް 8 ވަނަ ދުވަހު ސިފައިންގެ ޚިދުމަތާ ގުޅުނު ސުލްޠާން ފުރިހަމަކުރަމުންދިޔައީ 2021 މާރިޗް 1އިން 2024 މާރިޗް 15އަށް ޕޫނޭ ނޭޝަނަލް ޑިފެންސް އެކެޑެމީގައި ކުރިއަށް ގެންދިޔަ 145 ވަނަ އޮފިސަރ ކެޑޭޓް ކޯހެވެ. މިކޯހަށް ދިއުމުގެ ކުރިން އޭނާ މަސައްކަތް ކުރަމުން ގެންދިޔައީ އިންޓަގްރޭޓެޑް ހެޑްކްއާޓަރޒް (ޖޭ-1)ގައެވެ. އޭނާއަށް ލާންސް ކޯޕްރަލްކަމުގެ ރޭންކް ލިބިފައިވަނީ މި ކޯސް ފުރިހަމަ ކުރަމުންދަނިކޮށެވެ. ސުލްޠާންގެ ހަށިގަނޑު މާލެ ގެނައުމުގެ މަސައްކަތް އެމްއެންޑީއެފުން އަންނަނީ ކުރަމުންނެވެ.
