ތެޔޮ ލީކުވީ ތެޔޮ ފީފާއެއް ފަޅައިގެންގޮސްގެން

ރަސްފަންނު މޫދަށް ތެޔޮ ލީކުވީ ތެޔޮ ފީފާއެއް ފަޅައިގެން ގޮސްގެން ކަމަށް އެންވަޔަރަންމެންޓް ޕްރޮޓެކްޝަން އެޖެންސީ (އީޕީއޭ) އިން ބުނެފިއެވެ.

މިމަހުގެ 16 ވަނަ ދުވަހުގެ ހަވީރުން ފެށިގެން ރަސްފަންނަށް ވަނީ ތެޔޮ ޖަމާވާން ފަށާފައެވެ. މިކަމާއި ގުޅިގެން އޭރު އެމްއެންޑީއެފުން ބުނީ ރަސްފަންނަށް ތެޔޮ ޖަމާވަމުންދާ ސަބަބެއް ނޭނނޭ ކަމަށެވެ.

ރާއްޖެއެމްވީން ކުރި ސުވާލަކަށް ޖަވާބުދެއްވަމުން އީޕީއޭގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވީ ރަސްފަންނަށް ތެޔޮ ޖަމާވަމުންދިޔައީ ތެޔޮ ފީފާއެއް ފަޅައިގެން ގޮސްގެން ކަމަށް މިހާރު އެނގިފައިވާ ކަމަށެވެ. އެއީ ވަކި ބައެއްގެ ތެޔޮ ފީފާއެއް ކަމެއް ދެނެގަނެވިފައިނުވާކަމަށް އޭނާ ވިދާޅުވިއެވެ.

ނައީމް ވިދާޅުވީ އެ ސަރަހައްދުގެ މޫދަށް ޖަމާވަމުންދިޔަ ތެޔޮ މިހާރު ސާފުކުރެވިފައިވާކަމަށެވެ. ރަސްފަންނު ތޮށިގަނޑުތެރޭގައި ހުރި ތެޔޮވެސް ސާފުކުރެވިފައިވާކަމަށާއި، މަސައްކަތް ނިންމާލުމަށްފަހު އެ ސަރަހައްދު އާންމުނަށް ހުޅުވާލާފައިވާކަމަށް ނައީމް ވަނީ ވިދާޅުވެފައެވެ.