ޔަމަންގެ 16 މިލިއަން މީހުން ބަނޑަށްޖެހިދާނެ ކަމުގެ އިންޒާރު އދ.ން ދީފި

ޔަމަނުގެ 16 މިލިއަން މީހުން ބަނޑަށްޖެހިދާނެކަމުގެ އިންޒާރު އދ. ގެ ކާނާއާ ބެހޭ އެޖެންސީގެ ވެރިޔާ ޑޭވިޑް ބެސްލީ ދެއްވައިފިއެވެ.

ދިގުލައި ދެމިގެންދާ ހަނގުރާމައާއެކު ޔަމަނުގެ ހާލަތު ގޯސްވަމުން އަންނައިރު ކުރިޔަށް އޮތް އޮކްޓޯބަރ މަހު އެގައުމަށް ކާނާ ލިބުމުގައި ދަތިތަކާ ދިމާވާނެކަމަށް ޑޭވިޑް ވަނީ ވިދާޅުވެފައެވެ. އެހެންކަމުން އިތުރު ފަރާތްތަކުގެ އެހީތެރިކަން ބޭނުންވާކަމަށް ޑޭވިޑް ވިދާޅުވިއެވެ.

ޑޭވިޑް ވިދާޅުވީ މިއަހަރު ދުނިޔޭގެ ކާނާއާ ބެހޭ ޕްރޮގްރާމް (ޑަބްލިޔުއެފްޕީ) އަށް ބޭނުންވާ މިންވަރަށް ފައިސާ ނެތުމާއެކު ޔަމަނުގައި ދިމާވެފައިވާ އިންސާނީ ކާރިޘާއިން ކިރިޔާވެސް ސަލާމަތްވެވުނީ އެދަނޑިވަޅު އެމެރިކާ، ޖަރުމަނު، ޔުނައިޓެޑް އަރަބް އެމިރޭޓްސް (ޔޫއޭއީ)، ސައުދީ އަރަބިއްޔާގެ އިތުރު އެހެން ގައުމުތަކުގެ އެހީތެރިކަމާއެކު ކަމަށެވެ. އަދި މިހާރު އަނެއްކާވެސް އެޖަމުޢިއްޔާއަށް ފައިސާ ބޭނުންވެފައިވާކަމަށާއި ފަންޑު ނުލިބިއްޖެނަމަ އޮކްޓޯބަރ މަހު 3.2 މިލިއަން މީހުންނަށް ބޭނުންވާ ކާނާ ފޯރުކޮށްނުދެވޭނެކަމަށް ޑޭވިޑް ވިދާޅުވިއެވެ. އަދި ޑިސެމްބަރ މަސް ނިމެންވާއިރު އެއަދަދު 5 މިލިއަނަށް އަރާނެކަމަށް ވިދާޅުވިއެވެ.

މަރޗް މަހު ވަރޗުއަލްކޮށް ކުރިޔަށް ގެންދިޔަ ބައްދަލުވުމެއްގައި އދ. ގެ ސެކެޓްރީ ޖެނެރަލް އެންތޯނިއާ ގުޓަރޭސް ވަނީ ޔަމަނަށް މިއަހަރު 3.85 ބިލިއަން އެމެރިކާ ޑޮލަރު ބޭނުންވާކަމަށް ވިދާޅުވެފައެވެ. ނަމަވެސް އެބައްދަލުވުމުގައި އެހީތެރިވެދޭ ގައުމުތަކުންނާއި ޖަމާއަތްތަކުން ޔަމަނަށް ދިނުމަށް ވައުދުވެފައިވަނީ 1.7 ބިލިއަން އެމެރިކާ ޑޮލަރެވެ. އެކަމާ ގުޅިގެން ގުޓަރޭސް ވަނީ ކަންބޮޑުވުން ފާޅުކުރައްވާފައެވެ.

ފާއިތުވި ހަ މަސް ދުވަހުގައި ޔަމަނަށް ބޭނުންވާ ފައިސާގެ މިންވަރު ވަނީ އިތުރުވެފައެވެ.

މިހާރު ކުރިޔަށްދާ އދ. ގެ އާންމު މަޖިލީހުގެ ހަވާސާގައި ކުރިޔަށްގެންދިޔަ ބައްދަލުވުމުގައި ޔަމަނަށް އެހީތެރިވުމަށް ހޯދިފައިވަނީ 600 މިލިއަން އެމެރިކާ ޑޮލަރު ކަމަށް ޔޫރަޕިއަން ޔޫނިއަނުން ވަނީ ބުނެފައެވެ. މިއާއެކު އަދިވެސް ޔަމަނަށް 1 ބިލިއަން އެމެރިކާ ޑޮލަރު ބޭނުންވެއެވެ.

ޔަމަނަށް އެހީތެރިވެދޭނެކަމަށް އެންމެ ބޮޑަށް ވައުދުވީ އެމެރިކާއިންނެވެ. އެމެރިކާގެ ސެކެޓްރީ އޮފް ސްޓޭޓް އެންތޮނީ ބްލިކަން ވިދާޅުވީ ޔަމަނަށް އެހީތެރިވުމުގެ ގޮތުން އެމެރިކާއިން 290 މިލިއަން އެމެރިކާ ޑޮލަރު ދޭނެކަމަށެވެ. އަދި ޔޫރަޕިއަން ޔޫނިއަނުން ވަނީ 139 މިލިއަން އެމެރިކާ ޑޮލަރު ދިނުމަށް އެއްބަސްވެފައެވެ.

ޔަމަންގައި 2014 ވަނަ އަހަރުން ފެށިގެން އަންނަނީ ދާޚިލީ ހަނގުރާމަ ހިނގަމުންނެވެ.