އުންމީދަކީ ފެހެންދޫ ބަނދަރުގެ މަސައްކަތް އަންނަ މަހު ނިންމާލުން: އާޒިމް
ކޮވިޑް-19ގެ ހާލަތާ ގުޅިގެން މަސައްކަތް ކުރިއަށްގެންދިއުމަށް ގޮންޖެހުންތަކެއް ދިމާވި
ފެހެންދޫ ބަނދަރުގެ މަސައްކަތް ކުރިއަށްދާ ސަރަހައްދު
އުންމީދަކީ ބ. ފެހެންދޫ ބަނދަރު ތަރައްގީކުރުމުގެ މަސައްކަތް މިއަހަރުގެ އޮކްޓޯބަރު މަހުގެ ނިޔަަލަށް ނިންމާލުންކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އެމްޓީސީސީން ބ. އަތޮޅުގެ ހަތަރު ރަށެއްގައި ކުރިއަށްގެންދާ މަޝްރޫއުތައް ބައްލަވާލެއްވުމަށް އެކުންފުނީގެ ސީއީއޯ އާދަމް އާޒިމް ވަނީ އެ ރަށްތަކަށް ދަތުރުކުރައްވާފައެވެ. މި ދަތުރުގައި ފެހެންދޫގައި އެކުންފުނިން ކުރިއަށްގެންދާ ބަނދަރު ތަރައްގީކުރުމުގެ މަޝްރޫއު ކުރިއަށްގޮސްފައިވާ ހިސާބު ބައްލަވާލައްވައި މީޑިއާތަކަށް މައުލޫމާތުދެއްވަމުން އާޒިމް ވިދާޅުވީ ފެހެންދޫ ބަނދަރުގެ މަސައްކަތަކީ 2019 ވަނަ އަހަރުގެ ފަހުކޮޅުގައި މޮބިލައިޒް ކޮށްފައިވާ މަސައްކަތަކަށް ވެފައި ކޮވިޑް-19ގެ ހާލަތާ ގުޅިގެން އެރަށަށް ބޭނުންވާ ބައެއް ތަކެތި ގެންދިއުމުގައި ދަތިތަކެއް ދިމާވި ކަމަށެވެ.
އެހެންނަމަވެސް ގޮންޖެހުންތަކާއެކުވެސް މިހާރު މި ވަނީ މަޝްރޫއުގެ މަސައްކަތް ނިމުމަކާ ގާތަށް އައިސްފައި ކަމަށް އާޒިމް ވިދާޅުވިއެވެ. އާޒިމް ވިދާޅުވީ ފެހެންދޫ ބަނދަރު ތަރައްގީކުރުމުގެ މަސައްކަތް އަންނަ މަހު އެއްކޮށް ނިންމާލެވޭނެ ކަމަށް އުންމީދުކުރައްވާކަމަށެވެ.
ފެހެންދޫ ބަނދަރު ތަރައްގީކުުރުމުގެ މަޝްރޫއާ ގުޅޭގޮތުން ޕްރޮޖެކްޓުގެ ކަންކަން ބެލުމުގައި އެންމެ އިސްކޮށް ހުންނަވާ ރަމްޒީ އަބޫބަކުރު ވިދާޅުވީ ފެހެންދޫ ބަނދަރު ތަރައްގީކުރަމުންދަނީ ރަށާއި ވަކިން އިންނަ ބަނދަރެއްގެ ގޮތުގައި ކަމަށެވެ. އެގޮތުން މިހާރު ކީވޯލް ގާއިމްކުރުމުގެ މަސައްކަތާއި، ރިވެޓެމްންޓު ޖެހުމުގެ މައިގަނޑު މަސައްކަތްތަކާއި، ހިލައިގެ ބޭނުންކޮށްގެން ކުރަންޖެހޭ ހުރިހާ މަސައްކަތެއް ނިންމާލެވޭ ހިސާބަށް މިހާރު އައިސްފައިވާކަމަށް ރަމްޒީ ވިދާޅުވިއެވެ. ކުރިއަށްއޮތީ ބްރިޖުގެ ފިނިޝިން މަސައްކަތްތައް ކަމަށް ރަމްޒީ ވަނީ ވިދާޅުވެފައެވެ.
މި މަޝްރޫއަކީ 45.1 މިލިއަން ރުފިޔާގެ މަޝްރޫއެކެވެ.
