"ކަރިޝްމާ ޕާޓީ" ހަދަން ހުއްދައެއް ނުދިން

"ކަރިޝްމާ ޕާރޓީ މޯލްޑިވްސް" ގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަ ނުދިނުމަށް އިލެކްޝަންސް ކޮމިޝަން (އީސީ)ން ނިންމައިފިއެވެ.

ކަރިޝްމާ ޕާރޓީ މޯލްޑިވްސް އުފެއްދުމުގެ ހުއްދައަށް އެދި އީސީ އަށް ހުށަހަޅާފައިވަނީ މ.ކެލަން، މުހައްމަދު އިސްމާއީލް އެވެ.

އީސީން ބުނީ ހުއްދަ ނުދިނުމަށް ނިންމި ސަބަބަކީ، ފޯމާއެކު އެ ފަރާތުން ހުށަހަޅާފައިވާ ލިޔެކިޔުން ފުރިހަމަނުވާތީ ކަމަށެވެ. އަދި އެ ފަރާތުން ހުށަހަޅާފައިވާ ނަމަކީ، ސިޔާސީ ޕާޓީއަކަށް ކިޔަން އެކަށީގެންވާ ނަމެއް ނޫންކަމަށް، 06 ޖަނަވަރީ 2019 ގައި އިލެކްޝަންސް ކޮމިޝަނުން ނިންމާފައިވާތީ ކަމަށެވެ.

ކަރިޝްމާ ޕާޓީ އުފެއްދުމަށް ހުށަހަޅާފައިވަނީ 2019 ވަނަ އަހަރުއެވެ. ނަމަވެސް ފަހުން ވަނީ އެހުށަހެޅުން އަނބުރާ ގެންގޮސްފައެވެ.