ފިޔަވައްޗަށް ވަން މައްސަލައިގައި ޖަވާބުދާރީ ވުމަށް ޝުޖާއަށް އަންގައިފި
މި މަހުގެ 26 ވާ އާދިއްތަ ދުވަހުގެ މެންދުރު 12:00ގެ ކުރިން އެލްޖީއޭއަށް ލިޔުމުން ޖަވާބުދާރީ ވާން ޖެހޭ
އިބްރާހީމް ޝުޖާއު - ހުޅުމާލެ ދާއިރާގެ ކައުންސިލް މެމްބަރ
މާލެސިޓީ، ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ފިޔަވައްޗަށް ވަން މައްސަލައިގައި ލިޔުމުން ޖަވާބުދާރީ ވުމަށް އަންގައިފިއެވެ.
ލޯކަލް ގަވަރމަންޓް އޮތޯރިޓީ (އެލްޖީއޭ)އިން ވަނީ މި މަހުގެ 26 ވާ އާދިއްތަ ދުވަހުގެ މެންދުރު 12:00ގެ ކުރިން އެލްޖީއޭއަށް ލިޔުމުން ޖަވާބުދާރީ ވުމަށް އެދިފައެވެ. އެލްޖީއޭ އިން ޝުޖާއަށް ފޮނުވާފައިވާ ސިޓީގައި ބުނެފައިވަނީ ދައުލަތުގެ ބެލުމުގެ ދަށުން ކުޑަކުދިން ދިރިއުޅެމުންދާ ފިޔަވަތި މަރުކަޒުގައި މި މަހުގެ ސަތާރަ ވަނަ ދުވަހު ހިނގި ކަންތައްތަކާ ގުޅޭ މައްސަލައެއް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމެޓީން ދިރާސާ ކުރަމުން އަންނަ ކަމަށާއި އެގޮތުން އެ ހާދިސާ ހިނގި ވަގުތު މާލޭ ސިޓީ ކައުންސިލްގެ މެމްބަރު އިބްރާހީމް ސުޖާއު އެ ސަރަހައްދަށާއި އެ މަރުކަޒަށް ވަދެފައިވާ ކަމަށެވެ. އަދި ކަންހިނގި ގޮތާއި މި ކަމާގުޅޭ ގޮތުން ފާހަގަ ކުރަން ބޭނުންވާ ކަންކަމުގެ ބަޔާނެއް ދިނުމަށް ވަނީ އެދިފައެވެ.
ފިޔަވަތީގައި ހިނގައި ދިޔަ ހާދިސާގެ ރިޕޯޓް ހިއުމަން ރައިޓްސް ކޮމިޝަނުންނާއި ޗިލްޑްރެންސް އޮމްބަޑްސްޕާސަން އިން ތައްޔާރުކުރި ރިޕޯޓްގައި ހިމަނާފައިވާ ކަންކަމާ ގުޅޭ ގޮތުން ސެޕްޓެމްބަރު 19 ވަނަ ދުވަހު ކުރިއަށް ދިޔަ ކޮމިޓީގެ ބައްދަލުވުމުގައި ފުވައްމުލަކު ދެކުނު ދާއިރާގެ މެންބަރު މުހައްމަދު މުމްތާޒް ވިދާޅުވީ ފިޔަވަތީގެ ކުދިން ނުކިޔަމަންތެރިކަން ދައްކައި ފުރާޅަށް އަރައިގެން އުޅުނު ވަގުތު ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ފިޔަވައްޗަށް ވަދެ އުޅުނު ކަމަށެވެ. އަދި ބައެއް މީހުން އެތަނަށް ވައްދަން އޭނާ މަސައްކަތް ކޮށްފައިވާ ކަމަށް ރިޕޯޓުގައި ބަޔާންކޮށްފައިވާތީ އެކަން ހިނގައި ދިޔަގޮތް ބަލަން އެލްޖީއޭއަށް އެންގުމަށް މުމްތާޒް ހުށަހެޅުއްވިއެވެ.
އެ ސަރަހައްދުގައި ހަރަކާތްތެރިވި ބައެއް ނޫސްވެރިން ހާދިސާއާ ގުޅޭ މަންޒަރުތަކާއި ފޮޓޯތައް އަމިއްލަ ސޯޝަލް މީޑިއާގައި ހިއްސާކޮށްފައިވެއެވެެ. އަދި ކުދިންގެ މޫނު ފެންނާނެހެން ބައެއް މީޑިއާތަކުން ރިިޕޯޓް ކޮށްފައިވާތީ މައްސަލަ ބަލައިދޭން މިޑީއާ ކައުންިސލަށް އަންގަން މުމްތާޒް ހުށަހެޅުއްވިއެވެ.
