ރާއްޖެ ތަމްސީލުކުރުމަށް ބޭރުގެ ގައުމުތަކަށް ކުރާ ދަތުރުތަކަކީ އިސްރާފެއް ނޫން: މެމްބަރު އަޙުމަދު ޢަބްދުﷲ
ރާއްޖޭގެ ޚާރިޖީ ސިޔާސަތު ވަރަށް ކާމިޔާބު
ރާއްޖެޓީވީގެ ފަލަސުރުޚީ ޕްރޮގްރާމްގައި މެމްބަރު އަޙުމަދު ޢަބްދުﷲ ވާހަކަދައްކަވަނީ
ދިވެހިރާއްޖެ ތަމްސީލް ކުރުމަށް ބޭރުގެ ގައުމުތަކަށް ކުރާ ދަތުރުތަކަކީ އިސްރާފެއް ނޫން ކަމަށް ބާރަށު ދާއިރާގެ މެމްބަރު އަޙުމަދު ޢަބްދުﷲ ވިދާޅުވެއްޖެއެވެ.
އާދީއްތަ ދުވަހު ކުރިއަށް ގެންދިޔަ ރާއްޖެޓީވީގެ ފަލަސުރުޚީ ޕްރޮގްރާމްގައި މެމްބަރު ވިދާޅުވީ, ރާއްޖޭގެ ޚާރިޖީ ސިޔާސަތު ވަރަށް ކާމިޔާބު ކަމަށާއި، ދުނިޔޭގެ ގައުމުތަކުން މިހާރު ރާއްޖެ ބަލައިގެންފައިވާކަމަށެވެ. އަދި ދޭދޭ ގައުމުތަކާ ގުޅުން ބަދަހިވެ މުޅި ދުނިޔޭގެ ސަމާލުކަން ރާއްޖެއަށް ލިބިފައިވާ ކަމަށާއި، ގިނަ ގައުމުތަކުގެ އެހީތެރިކަން ލިބެމުންދާ ކަމަށެވެ.
އދ.ގައި ކުރިއަށް ގެންދާ ސެޝަންތަކުގައި ރާއްޖެއިން ވަފުދުތައް ދިއުމަކީ އިސްރާފެއްކަމަށް ދެކެވޭ ވާހަކަތަކަށް ރައްދު ދެއްވައި މެމްބަރު ވިދާޅުވީ އެއީ އިސްރާފެއް ނޫން ކަމަށާއި، އިންވެސްޓް ކުރުމުން އޭގެ ބަދަލު ލިބޭ ކަމަށެވެ. އެގޮތުން އެންމެ ގައުމެއްގެ ވެރިންނާއެކު ވެސް ބޭއްވޭ މަޝްވަރާގެ ބައްދަލުވުމުގެ ތެރެއިން އެހީގެ ގޮތުގައި ރާއްޖެއަށް ބޮޑެތި އަދަދުތަކުން ފައިސާ ލިބޭކަން މެމްބަރު ފާހަގަކުރެއްވިއެވެ.
މެމްބަރު ވިދާޅުވީ ގައުމު ތަމްސީލު ކުރުމަކީ ވަރަށް މުހިންމު ކަމެއް ކަމަށާއި، މިސަރުކާރުން މިހާރު ވެސް ރާއްޖެ ވަރަށް ބޮޑަށް ތަމްސީލުކުރާ ކަމަށެވެ. އަދި ގައުމުތަކާ އެކަހެރިވުމުގެ ހިތި ނަތީޖާ ރާއްޖޭގެ ރައްޔިތުން ދެކެފައިވާ ކަމަށެވެ. އެކަމުގެ ސަބަބުން ހުރިހާ ދާއިރާއަކުން ވެސް ދަތިތަކާއި ކުރިމަތިވިކަން މެމްބަރު ފާހަގަކުރެއްވިއެވެ.
