ރަށްރަށުގެ މީރު ފެންފަށަލަ ވަކި ލެވެލެއްގައި ބެހެއްޓުމަށް ދަނީ މަސައްކަތް ކުރެވެމުން
30 ރަށެއްގެ ފެންފަށަލައަށް އަސަރުކޮށްފައި ހުރީ ކިހާ ވަރަކަށްތޯ ބެލުމުގެ މަސައްކަތް މިހާރު ކުރިއަށްދޭ
މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ ސްޓޭޓް މިނިސްޓަރ އަހުމަދު މުޖުތަބާ
އަތޮޅުތެރޭގެ ރަށްރަށުގެ މީރު ފެންފަށަލަ ވަކި ލެވެލެއްގައި ބެހެއްޓުމުގެ މަސައްކަތް ކުރަމުންދާ ކަމަށް އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު އަހުމަދު މުޖުތަބާ ވިދާޅުވެއްޖެއެވެ.
ހޮނިހިރު ދުވަހުގެ ރޭ ކުރިއަށް ގެންދިޔަ ރާއްޖެޓީވީގެ ފަލަސުރުޚީ ޕްރޮގްރާމްގައި މުޖުތަބާ ވިދާޅުވީ ޚާއްސަ އިސްކަމެއް ދީގެން އަތޮޅުތެރޭގެ ރަށްރަށުގެ ފެންފަށަލައަށް ކުރާ އަސަރުތައް ދެނެގަތުމަށް މަސައްކަތްތައް ކުރާ ކަމަށެވެ. ވަރަށް ބޮޑު މަޝްރޫއެއް ކުރިއަށް ގެންދާކަން ފާހަގަކުރައްވައި މުޖުތަބާ ވިދާޅުވީ 30 ރަށެއްގެ ފެންފަށަލައަށް އަސަރުކޮށްފައި ހުރީ ކިހާ ވަރަކަށްތޯ ބެލުމުގެ މަސައްކަތް މިހާރު ކުރިއަށްދާ ކަމަށެވެ. އެގޮތުން އެރަށްރަށުގެ ފެންފަށަލަ ރަނގަޅު ކުރުމަށްޓަކައި މަސައްކަތް ކުރާކަން އޭނާ ފާހަގަކުރެއްވިއެވެ.
މުޖުތަބާ ވިދާޅުވީ ސިޔާސަތަކީ ކޮންމެ ރަށެއްގައި ވެސް ތާޒާ ފެން ވަކި ލެވަލެއްގައި ބެހެއްޓުން ކަމަށެވެ. އެގޮތުން ފެން ހިންދާ ނިޒާމު ގާއިމް ކުރާއިރު، އެހުރިހާ ކަމަކަށް ބަލާ ކަމަށް އޭނާ ވިދާޅުވިއެވެ. އަދި ވިދާޅުވީ ޑްރައިނޭޖް ސިސްޓަމް ގާއިމް ކުރަނީ ރަށުގެ ތެރެއަށް ފެން ހިނދޭ ގޮތަށް ކަމަށެވެ.
މުޖުތަބާ ވިދާޅުވީ ބައެއް ރަށްރަށުގައި ޑީސަލިނޭޓްކޮށްގެން ވެސް ފެން ބޭނުންކުރާ ކަމަށެވެ. އަދި ބައެއް ރަށްރަށުގައި ފެންފަށަލައަށް އެއްވެސް މައްސަލައެއް ދިމާނުވާކަން އޭނާ ފާހަގަކުރެއްވިއެވެ.
