ފިޔަވަތީގައި މިހާރު ހިނގަމުންދާ ކަންކަމާއި ގުޅިގެން، މައްސަލަ ދިމާވެގެން އުޅެނީ މައިގަނޑު ހަތަރު ސަބަބަކާއި ގުޅިގެން ކަމަށް މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ބުނެފިއެވެ.

އާދީއްތަ ދުވަހު ބޭއްވި ޖެންޑަރ ކޮމިޓީގެ ބައްދަލުވުމުގައި މަޝްވަރާކޮށް، ދިރާސާކޮށްފައިވަނީ އެޗްއާރްސީއެމް އަދި ޗިލްޑްރަންސް އޮމްބަޑްޕާސަން ހުށަހަޅާފައިވާ ރިޕޯޓާ ބެހޭ ގޮތުންނެވެ. ކޮންމެ މުއައްސަސާއަކުން ވެސް ވަނީ ދެ ރިޕޯޓެއް ހުށަހަޅާފައެވެ. ރިޕޯޓުގައި މައިގަނޑު ގޮތެއްގައި ހަތަރު ކަމެއް ފާހަގަކޮށްފައިވެއެވެ. ޖާގައަށްވުރެ ގިނައިން އެތަނުގައި ކުދިން ގެންގުޅުމާއި، މުވައްޒަފުންނަށް ވުރެ އެތާގައި ބަލަހައްޓާ ކުދިންގެ އަދަދު ގިނަވުމެވެ. އަދި ތަނުގެ މުވައްޒަފުން ތަމްރީން ކޮށްފައިވަނީ ތުއްތު ކުދިން ބަލަހައްޓަން ކަމަށާއި ނަމަވެސް އުމުރުން 14 އަހަރުގެ ކުދިން އެތަނުގައި މިހާރު އެބަތިބި ކަމަށެވެ. މުވައްޒަފުންނަށް ބޮޑެތި ކުދިން ބެލެހެއްޓޭނެ ތަމްރީން ލިބިފައި ނެތުމާއި، ނަފްސާނީ ގޮތުން އެހީތެރިކަން ބޭނުންވާއިރު އެ އެހީތެރިކަން ލިބެމުން ނުދާ ކަަމަށެވެ. ފިޔަވަތީގައި އުޅެމުންދާ ކުދިންނަށް ނަފްސާނީ ގޮތުން އެހީތެރިކަން ބޭނުންވާ ކަމަށް ރިޕޯޓުގައި ފާހަގަކޮށްފައިވެއެވެ.

އެކި މާހައުލުތަކުގައި ބޮޑުތިވެފައިވާ ކުދިން އެއްތަނެއްގައި ބަލަހައްޓަން ޖެހުމެވެ. އެކި މާހައުލުން އަންނަ ކުދިން ދެނެގަނެ ވަކި ތަނެއްގައި ބެލެހެއްޓުން މުހިއްމު ކަމަށްވެސް ރިޕޯޓުގައި ފާހަގަ ކޮށްފައިވެއެވެ.

ކޮމިޓީގައި ފުވައްމުލަކު ދެކުނު ދާއިރާގެ މެންބަރު މުހައްމަދު މުމްތާޒް ވިދާޅުވީ އެ ސަރަހައްދުގައި ހަރަކާތްތެރިވި ބައެއް ނޫސްވެރިން ހާދިސާއާ ގުޅޭ މަންޒަރުތަކާއި ފޮޓޯތައް އަމިއްލަ ސޯޝަލް މީޑިއާގައި ހިއްސާކޮށްފައިވާ ކަމަށެވެ. އަދި ބައެއް މީޑިއާތަކުން އެކުދިންގެ މޫނު ފެންނަހެން ފޮޓޯއާ ވިޑިއޯ އާއްމުކޮށްފައިވާ ކަމަަށެވެ. އެހެންވެ އެ މައްސަލަ ބަލައިދޭން މިޑީއާ ކައުންސިލަށް އަންގަން މުމްތާޒް ހުށަހެޅުއްވިއެވެ. 

ފިޔަވަތި ހުންނަ ސަރަހައްދުގެ ގޮތުން ކުދިންނަށް ނުރައްކާތެރިވެދާނެ ކަމުގެ ކަންބޮޑުވުން ރިޕޯޓްގައި ފާހަގަކޮށްފައިވެއެވެ. މި ރިޕޯޓްތަކާއި ގުޅިގެން ޖެންޑަރ މިނިސްޓްރީއަށް ފިޔަވަޅުތަކެއް އަޅަން އަންގާފައިވެއެވެ. އެގޮތުން ކުދިން ފުރާޅަށް އެރޭހެން ހުރި ތަންތަން ބަންދު ކުރުމާއި ފިޔަވަތީގައި އަލިފާނުން ރައްކާތެރިވުމަށް ވަސީލަތްތައް ގާއިމުކުރުން ހިމެނެއެވެ.

ޖެންޑަރ މިނިސްޓްރީގެ ރިޕޯޓްވެސް ކޮމިޓީއަށް ލިބުމުން ދިރާސާކުރުމަށްފަހު ކޮމިޓީއަށް ފެންނަ ކަންކަން ނިންމުމަށް ވަނީ ހަމަޖެހިފައެވެ.