އައްޑޫ މާރާމާރީގައި އެއްވެސް މީހަކަށް ސީރިއަސް އަނިޔާއެއް ނުވޭ - އޭއީއެޗް
18 ސެޕްޓެމްބަރު 2021 | ހޮނިހިރު 11:02މާރާމާރީގައި އަނިޔާވި ދެމީހުނަށް ހުކުރުދުވަހުގެ ރޭ ހޮސްޕިޓަލުން ފަރުވާދީފައިވޭ
އައްޑޫ ސިޓީ
ހުކުރު ދުވަހު ރޭ އައްޑޫ ސިޓީ ހިތަދޫގައި ހިންގި މާރާމާރީގައި އެއްވެސް މީހަކަށް ސީރިއަސް އަނިޔާތަކެއް ނުލިބޭ ކަމަށް އައްޑޫ އިކުއެޓޯރިއަލް ހޮސްޕިޓަލުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން އައްޑޫ އިކުއެޓޯރިއަލް ހޮސްޕިޓްލްގެ މީޑިއާ އޮފިސަރ ޝާފީ މުހައްމަދު ވިދާޅުވީ މާރާމާރީގައި އަނިޔާވި ދެމީހުނަށް ހުކުރުދުވަހުގެ ރޭ ހޮސްޕިޓަލުން ފަރުވާދީފައިވާކަމަށެވެ. ނަމަވެސް އެއިން އެކަކަށްވެސް ސީރިއަސް އަނިޔާތަކެއް ލިބިފައިނުވާކަމަށް ވިދާޅުވިއެވެ.
މި މައްސަލައާއި ގުޅިގެން ފުލުހުން ބުނީ މީހަކު ހައްޔަރު ކޮށްފައި ނުވާކަމަށާއި މައްސަލަ އިތުރަށް ތަހުގީގު ކުރަމުންދާކަމަށެވެ. އައްޑޫސިޓީ ހިތަދޫގައި ދުއްވާފައި ދިޔަ ސައިކަލެއްގައި ތިބި ދެ މީހަކަށް ތޫނު އެއްޗަކުން ހަމަލާދީފައިވާ ކަމުގެ މައުލޫމާތު ފުލުހުންނަށް ލިބިފައިވަނީ ހުކުރު ދުވަހުގެ ރޭ 20:05 ހާއިރު ކަމަށް ފުލުހުން ބުނެއެވެ. މި މާރާމާރީގައި އަނިޔާވެފައިވަނީ 27 އަހަރުގެ ފިރިހެނަކަށާއި 23 އަހަރުގެ އަންހެނަކަށެވެ.
އައްޑޫ ސިޓީ ހިތަދޫ ފްލެޓް ސަރަހައްދުގައި ހުކުރު ދުވަހުގެ ހެނދުނު ވެސް ވަނީ ތޫނު އެއްޗަކުން ހަމަލާދީ މީހަކު ޒަޚަމްކޮށްލާފައެވެ.
