އައްޑޫ ސިޓީގައި އިތުރު މާރާމާރީއެއް
އަނިޔާވެފައިވަނީ 27 އަހަރުގެ ފިރިހެނަކަށާއި 23 އަހަރުގެ އަންހެނަކަށް
އައްޑޫ ސިޓީގައި ހުކުރު ދުވަހު ހެނދުނުގެ ވަގުތެއްގައިވެސް މާރާމާރީއެއް ހިންގާފައިވޭ
އައްޑޫ ސިޓީގައި ހުކުރު ދުވަހު އިތުރު މާރާމާރީއެއް ހިންގައި ދެ މީހަކު ޒަޚަމްކޮށްލައިފިއެވެ.
ފުލުހުން ބުނީ އައްޑޫސިޓީގައި ދުއްވާފައި ދިޔަ ސައިކަލެއްގައި ތިބި ދެ މީހަކަށް ތޫނު އެއްޗަކުން ހަމަލާދީފައިވާ ކަމުގެ މައުލޫމާތު މިރޭ 20:05 އެހާކަންހާއިރު ފުލުހުންނަށް ލިބިފައިވާ ކަމަށެވެ. މި މާރާމާރީގައި އަނިޔާވެފައިވަނީ 27 އަހަރުގެ ފިރިހެނަކަށާއި 23 އަހަރުގެ އަންހެނަކަށެވެ.
އައްޑޫ ސިޓީ ހިތަދޫ ފްލެޓް ސަރަހައްދުގައި ހުކުރު ދުވަހުގެ ހެނދުނު ވަނީ ތޫނު އެއްޗަކުން ހަމަލާދީ މީހަކު ޒަޚަމްކޮށްލާފައެވެ. އެ މާރާމާރީގައި އަނިޔާވެފައިވަނީ 29 އަހަރުގެ ދިވެހި ފިރިހެނަކަށެވެ. އޭނާއަށް ހޮސްޕިޓަލްގައި ގެންދަނީ ފަރުވާ ދެމުންނެވެ. މި މާރާމާރީއާ ގުޅިގެން މީހަކު ހައްޔަރު ކޮށްފައިވާ ކަމަށް ފުލުހުން މިހާތަނަށް ބުނެފައި ނުވެއެވެ.
ހަމަލާ ދިނުމާއި ގުޅިގެން އެ މީހާގެ ގައިން ވަރަށް ގިނަ ލޭ ވަނީ ފައިބާފައެވެ. ހަމަލާ ދިން ސަރަހައްދުގައިވެސް ވަރަށް ގިނައިން ލޭ ހުއްޓެވެ. އަދި އާންމުވެފައިވާ ފޮޓޯތަކުން އެހެން މީހަކަށްވެސް އަނިޔާވެ ވެއްޓިފައި އޮތް މަންޒަރު ފެނެއެވެ.
އައްޑޫގައި މާރާމަތީތަކެއް ހިންގަމުންދާއިރު، މި މާރާމާރީތައް ހުއްޓުވުމަށް މަަސައްކަތް ކުރަމުންދާކަމަށް ފުލުހުން ވަނީ ބުނެފައެވެ.
