އައްޑޫ ސިޓީ ހިތަދޫގައި ކުޑަ ކުއްޖަކަށް ޖިންސީ ގޯނާކުރި ކަމުގެ ތުހުމަތު ކުރެވިގެން ހައްޔަރުކުރި ފުލުސް މީހާ ޝަރީއަތް ނިމެންދެން ބަންދުކުރުމަށް އަމުރުކޮށްފިއެވެ.

އޭނާ ޝަރީއަތް ނިމެންދެން ބަންދުކުރަން އަމުރުކުރީ ބަންދާއިމެދު ގޮތެއް ނިންމުމަށް ހިތަދޫ މެޖިސްޓްރޭޓް ކޯޓަށް ހާޒިރުކުރުމުންނެވެ. އެކަމާއި ގުޅިގެން ފުލުހުން ބުނީ އުމުރުން 34 އަހަރުގެ ފިރިހެނަކު ބުރާސްފަތި ދުވަހުގެ ރޭ 23:09 ގައި ހައްޔަރުކޮށްފައިވާކަމަށެވެ. އަދި ހައްޔަރުކޮށްފައިވަނީ ފުލުހެއްކަމަށްވެސް ވަނީ ބުނެފައެވެ. މިމައްސަލަ އައްޑޫ ސިޓީގެ ފުލުހުންނާއި ފުލުހުންގެ ފެމެލީ އެންޑް ޗައިލްޑް ޕްރޮޓެކްޝަން (އެފްސީޕީ) ގުޅިގެން އަންނަނީ ތަހުގީގުކުރަމުން ކަމަށް ފުލުހުން ބުނެއެވެ.

މިމައްސަލާގައި ތުހުމަތުކުރެވޭ ފުލުސް މީހާ ހައްޔަރުނުކޮށް ލަސްވަމުންދާތީ އެކަމާއި ހިތްހަމަނުޖެހިގެން އައްޑޫ ސިޓީގައި އެމީހާ ދިރިއުޅޭ ގެ ކައިރީގައި ވަނީ މުޒާހަރާކޮށްފައެވެ. މުޒާހަރާކުރި މީހުން ގޮވާލާފައިވަނީ އެމީހާ ވީ އެންމެ އަވަހަށް ހައްޔަރުކުރުމަށެވެ. ފުލުހުން ބުނެފައިވަނީ އުމުރުން 16 އަހަރުގެ ކުއްޖަކަށް ޖިންސީ ގޯނާކުރި މައްސަލައެއް ހުށަހެޅިފައިވަނީ ބުދަ ދުވަހުކަމަށެވެ.

ކުރިޔަށްދިޔަ މުޒާހަރާ އާ ގުޅިގެން ފުލުހުން ބުނެފައިވަނީ ފުލުހުންގެ ދައުރު އަދާކުރުމަށް ހުރަސްއަޅަން މަސައްކަތްކުރުމާ ގުޅިގެން މުޒާހަރާގެ ބައިވެރިންނާ ދެކޮޅަށް ބާރުގެ ބޭނުންކޮށްފައިވާކަމަށެވެ. އެގޮތުން އެއްވި ތިބި މީހުން ދުރަށް ޖެއްސުމަށް ޕެޕަރ ސްޕްރޭ ބޭނުންކޮށްފައިވާނެ ކަމަށް ވަނީ ބުނެފައެވެ.