މާފުށީ ރައްޔިތުންގެ އެދުމުގެމަތިން, އިތުރު ދެ ހެކްޓަރު ބިން ހިއްކައި ޕިކްނިކް އައިލެންޑެއް ހެދުމަށް ނިންމާފައިވާ ކަމަށް އެމްޓީސީސީގެ ޗީފް އެގްޒެކެޓިވް އޮފިސަރ އާދަމް ޢާޒިމް ވިދާޅުވެއްޖެއެވެ.

އެމްޓީސީސީން މާލެ އަތޮޅު މާފުއްޓާއި, ހިންމަފުއްޓާއި އަދި ގުރައިދޫގައި ހިންގަމުން ގެންދާ ޕްރޮޖެކްޓްތައް ބައްލަވާލެއްވުމަށް ބުރާސްފަތި ދުވަހު އެ ކުންފުނީގެ ސީއީއޯ އާދަމް ޢާޒިމް އެ ރަށްތަކަށް ދަތުރުކުރައްވާފައިވާއިރު، މި ދަތުރުފުޅުގައި ޢާޒިމް ވަނީ މި ތިން ރަށުގެ ކައުންސިލާވެސް ބައްދަލުކުރައްވާފައެވެ.

ބުރާސްފަތި ދުވަހު ކުރެއްވި މި ދަތުރުފުޅުގައި އެންމެ ފުރަތަމަ ވަޑައިގެންނެވި ރަށަކީ ހިންމަފުއްޓެވެ. ހިންމަފުށީގައި އެމްޓީސީސީން ކުރަމުން ގެންދަނީ ބަނދަރު ތަރައްގީކުރުމުގެ މަސައްކަތެވެ.

މީޑިއާއަށް ދެއްވި އިންޓަރވިއުގައި ޢާޒިމް ވިދާޅުވީ މި މަޝްރޫގެ މަސައްކަތް މިއަހަރުގެ ނިޔަލަށް ނިމޭނެ ކަމަށް އުންމީދު ކުރައްވާ ކަމަށެވެ. އަދި މި މަޝްރޫއުގެ މަސައްކަތް ލަސްވީ ކޮވިޑާ ގުޅިގެން ދިމާވި ގޮންޖެހުންތަކުގެ ސަބަބުން ކަމަށެވެ.

ހިންމަފުށީ ކައުންސިލްގެ ރައީސް ޙަސަން ފާއިޒް ވިދާޅުވީ، މިހާރު ތަރައްގީ ކުރެވެމުން އަންނަ ބަނދަރަކީ ހިންމަފުއްޓަށް ވަރަށް މުހިންމު މަޝްރޫއެއް ކަމަށާއި، ޚާއްސަކޮށް ރަށަކީ ލޯކަލް ޓުއަރިޒަމާއި، މަސްވެރި ރަށަކަށް ވުމުން ބަނދަރުގެ މުހިންމުވެފައިވާ ކަމަށެވެ. ފާއިޒް އިތުރަށް ވިދާޅުވީ މިރަށު ބަނދަރަށް 100 ފޫޓު އިތުރު ކޮށްދިނުމަށް އެދިފައިވާނެ ކަމަށާއި، އަދި މިކަމަށް ސަރުކާރުގެ ފަރާތުން ޕޮޒިޓިވް ޖަވާބެއް ލިބިފައިވާ ކަމަށެވެ.

ޢާޒިމްގެ ދަތުރުގެ ދެވަނަ ރަށަކީ ގުރައިދޫއެވެ. ގުރައިދޫގައި އެމްޓީސީސީން ކުރިޔަށް ގެންދާ މަޝްރޫއަކީ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއެވެ. މި މަޝްރޫއުގެ ދަށުން 15 ހެކްޓަރުގެ ބިން ހިއްކުމާއިއެކު، 1200 މީޓަރުގެ ސަރަހައްދެއްގައި ރިވެޓްމަންޓް ޖެހުން ހިމެނެއެވެ.

އާޒިމް ވިދާޅުވީ މި މަޝްރޫއުގެ މަސައްކަތް މި މަހުގެ ނިޔަލަށް ނިމިގެންދާނެ ކަމަށެވެ. އަދި މި ރަށުގައި ބިންހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއެއްގެ އިތުރުން ޕިކްނިކް އައިލެންޑްއެއް ތަރައްގީ ކުރެވިގެންދިޔަކަމަށް ޢާޒިމް ވިދާޅުވިއެވެ.

ގުރައިދޫ ކައުންސިލްގެ ނައިބު ރައީސް އިބްރާހީމް ޝަލީޒް ވިދާޅުވީ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއަކީ ގުރައިދޫއަށް ވަރަށް މުހިންމު ކަމެއް ކަމަށާއި، ގުރައިދޫއަކީ ބިމުގެ ދަތިކަން ދިމާވެފައިވާ ރަށެއްގެ އިތުރުން ރަށް ގިރުމުގެ މައްސަލަ ދިމާވެފައިވާ ރަށެއް ކަމަށެވެ. އަދި މި މަޝްރޫއުގެ ސަބަބުން އެކަންކަމަށް ހައްލު ލިބިފައިވާ ކަމަށް ޝަލީޒް ވިދާޅުވިއެވެ.

މާފުށީގައި އެމްޓީސީސީން ކުރިޔަށް ގެންދަނީ ބިން ހިއްކުމާއި ގޮނޑުދޮށް ހިމާޔާތް ކުރުމުގެ މަޝްރޫއެކެވެ. މި މަޝްރޫއުގެ ދަށުން 25 ހެކްޓަރުގެ ބިންހިއްކުމާއި، 1،100 މީޓަރުގެ ސަރަހައްދެއްގައި ބޮޑުގަލުގެ ރިވެޓްމެންޓް ޖެހުން ހިމެނެއެވެ.

އާޒިމް ވިދާޅުވީ، މާފުށީގެ 25 ހެކްޓަރުގެ ބިން މި މަހުގެ ނިޔަލަށް ނިމިގެންދާނެ ކަމަށެވެ. އެކަމަކު އޭގެ އިތުރުން 2 ހެކްޓަރުގެ ބިން ހިއްކައިގެން ޕިކްނިކް އައިލެންޑެއް ހެދުމަށް ނިންމާފައިވާ ކަމަށެވެ. އަދި އެ މަސައްކަތުގެ އީއައިއޭ ހެދުމުގެ މަސައްކަތް މިހާރު ކުރަމުން އަންނަ ކަމަށާއި، އީއައިއޭގެ މަސައްކަތް މި މަހުގެ ނިޔަލަށް ނިމޭނެ ކަމަށް އުންމީދު ކުރައްވާ ކަމަށެވެ.

މާފުށީ ކައުންސިލްގެ ރައީސް ޙަސަން ޞަލާޙް ވިދާޅުވީ, ކޮވިޑުގެ ދަތި ހާލުގައި ވެސް މި ސަރުކާރުން ގިނަ ޕްރޮޖެކްޓްތަކެއް މާފުށީގައި ހިންގާފައިވާ ކަމަށެވެ. މާފުއްޓަކީ ބިމުގެ ދަތިކަން އިންތިހާއަށް ކުރިމަތިވެފައިވާ ރަށެއް ކަމަށާއި، މާފުށީގެ ލޭންޑްޔޫސް ޕްލޭން ނިމުނުހާ އަވަހަށް ހިއްކުނު ބިމުން ބަންޑާރަ ގޯތި ދޫކުރުމުގެ މަސައްކަތް ފެށިގެންދާނެ ކަމަށެވެ.