ކުޅިވަރު ކުރިއަރުވަން ސްޕޯޓްސް ކޯޕަރޭޝަނާއި އެމްއޯސީ ގުޅިގެން މަސައްކަތްކުރަނީ

ރާއްޖޭގެ ކުޅިވަރު ކުރިއެރުވޭނެ ގޮތްތަކާ ބެހޭގޮތުން މޯލްޑިވްސް ސްޕޯޓްސް ކޯޕަރޭޝަނާއި މޯލްޑިވްސް އޮލިމްޕިކް ކޮމިޓީ (އެމްއޯސީ) އިން މަޝްވަރާކޮށް، ދެ ފަރާތް ގުޅިގެން މަސައްކަތްކުރަން ނިންމައިފިއެވެ.

އެކަމަށް މަޝްވަރާކޮށްފައިވަނީ އަންގާރަ ދުވަހު ސްޕޯޓްސް ކޯޕަރޭޝަނުގައި ބޭއްވި ބައްދަލުވުމެއްގައެވެ. މި ބައްދަލުވުމުގައި ސްޕޯޓްސް ކޯޕަރޭޝަނުގެ މެނޭޖިން ޑިރެކްޓަރު މައުރޫފް އަޙްމަދު (މާއްޓޭ) އާއި އެމްއޯސީގެ ރައީސް މުޙައްމަދު އަބްދުލް ސައްތާރު (ޗަމްޕީ) އަދި އެ ކޮމިޓީގެ އައު ހިންގާ ކޮމިޓީގެ މެންބަރުން ވަނީ ބައިވެރިވެވަޑައިގެންފައެވެ.

މައުލޫމާތު ލިބޭ ގޮތުން މި ބައްދަލުވުމުގައި ވަނީ ރާއްޖޭގެ އުމްރާނީ ވަސީލަތްތަކުގެ ބޭނުން މިހާރާއި ކުރިއަށް އޮތްތަނުގައި ހިފާގޮތާ ގުޅޭ ގޮތުން ދުރުރާސްތާ ޕްލޭނެއް އެކުލަވާލުމަށް މަޝްވަރާކޮށްފައެވެ. އަދި ކުޅިވަރުގެ އުމްރާނީ ވަސީލަތްތައް ތަރައްގީކުރާއިރު، ކުޅިވަރު ކުރިއެރުވޭނެ ގޮތްތަކެއް ހޯދުމަށްވެސް މި ބައްދަލުވުމުގައި ވަނީ މަޝްވަރާކޮށްފައެވެ.

ކުޅިވަރު ކުރިއަރުވަން ސްޕޯޓްސް ކޯޕަރޭޝަނާއި އެމްއޯސީ ގުޅިގެން މަސައްކަތްކުރަން ނިންމިއިރު، ރާއްޖޭގެ ކުޅިވަރުގެ ޤާނޫނުގެ ދަށުން އުފައްދާފައިވާ ސްޕޯޓްސް ކޯޕަރޭޝަނުގެ މަގުސަދުތަކުގެ ތެރޭގައި ރާއްޖޭގައި ކުޅިވަރުގެ އުމްރާނީ ވަސީލަތްތައް ކުރިއެރުވުމާއި، ސްޕޯޓްސް ޗެނަލް ތަރައްގީކުރުމާއި، ކުޅިވަރު ކުޅޭ ފަރާތްތަކުގެ ގާބިލުކަން ކުރިއެރުވޭނެ ޕްރޮގްރާމުތައް ރާވައި ހިންގުމާއި، ކުޅިވަރު ދާއިރާގައި ހަރަކާތްތެރިވާ ފަރާތްތައް އިތުރަށް ކުރިއަރުވާ ތަމްރީނު ހޯދާނެ މަގު ފަހިކޮށްދިނުން ހިމެނެއެވެ. މީގެ އިތުރުން އެ ކުންފުނީގެ ބެލުމުގެ ދަށުފައިވާ ކުޅިވަރު ވަސީލަތްތަކުގެ ބޭނުން ކުލަބުތަކާއި އެސޯސިއޭޝަންތަކަށް ބޭނުން ހިފޭނެ މަގުފަހިކޮށްދީ، އެނޫން ފަރާތްތަކަށް އެ މުދަލުން މުއާމަލާތްކޮށް ވިޔަފާރި އުސޫލުން މަންފާ ހޯދުންވެސް ހިމެނެއެވެ.

މާ ބޮޑު މަސައްކަތެއް ނެތް ކުންފުންޏެއްގެ ގޮތުގައި އޮތް ސްޕޯޓްސް ކޯޕަރޭޝަނުން މި ސަރުކާރު އައި ފަހުން ކޮށްފައިވާ ހަމައެކަނި ބޮޑު މަސައްކަތަކީ ކުޅިވަރާ ބެހޭ ވުޒާރާއިން ސްޕޯޓްސް ކޯޕަރޭޝަނާ ހަވާލުކޮށްގެން ރަށްރަށުގައި އެޅުމަށް ނިންމާފައިވާ 61 އައުޓްޑޯ ޖިމްތައް ގެނައުމުގެ މަސައްކަތެވެ.

އެއާއެކު މިދިޔަ އަހަރުގެ ޖުލައި މަހު ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީއަށް ހާޒިރުވެ، ކުޅިވަރާ ބެހޭ ވަޒީރު އަޙްމަދު މަޚްލޫފް ވަނީ މިހާރު އެކުލަވާލާފައިވާ ޤާނޫނަށް އިސްލާހު ގެނެސް، ސްޕޯޓްސް ކޯޕަރޭޝަން އުވާލަން ނިންމާފައިވާ ކަމަށް ވިދާޅުވެފައެވެ. އެކަމަކު މިހާރު ސަރުކާރުގެ ވިސްނުމަކީ ސްޕޯޓްސް ކޯޕަރޭޝަން އުވާނުލައި، ކުރިއަށްދިއުންކަމަށް ވަނީ މައުލޫމާތު ލިބިފައެވެ.