ވިނަރެސް ފްލެޓްތަކުގެ މަސައްކަތް ލަސްވެގެން ދިޔައީ، ކުރީ ސަރުކާރުން އަމަލުކޮށްފައިވާ ގޮތުން: އެޗްޑީސީ
14 ސެޕްޓެމްބަރު 2021 | އަންގާރަ 19:16ހުޅުމާލޭގެ މައި މަގެއްގައި އިމާރާތް ކުރާ މިފްލެޓްތަކަށް ކޮމާޝަލް ޒޯނެއް ވަރަށް މުހިންމުވާނެ
އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު
ހުޅުމާލޭ ދެވަނަ ފިޔަވަހީގައި އިމާރާތް ކުރަމުންދާ ވިނަރެސް ފްލެޓްތަކުގެ މަސައްކަތް ލަސްވެގެން ދިޔައީ ކުރީ ސަރުކާރުން އަމަލުކޮށްފައިވާ ގޮތުން ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފިއެވެ.
ވިނަރެސް ފްލެޓްތަކާ ބެހޭ ގޮތުން ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން އެޗްޑީސީގެ މެނޭޖިންގ ޑިރެކްޓަރ ސުހައިލް އަޙުމަދު ވިދާޅުވީ, ކުރީ ސަރުކާރުން މިޝްރޫއަށް ނަން ދީފައިނުވާ ކަމަށާއި، ''ވިނަރެސް''ގެ ނަމުން ނަންދީ މިމަޝްރޫއުގެ މަސައްކަތްތައް ފަށައިގެން ކުރިއަށްދާ ކަަމަށެވެ.
ސުހައިލް ވިދާޅުވީ ކުރީގެ ހައުސިން މިނިސްޓަރު، އަދި މިހާރުގެ މާލެ ސިޓީ ކައުންސިލްގެ މޭޔަރު ޑރ.މުޙައްމަދު މުޢިއްޒުގެ ބެއްލެވެމުގެ ދަށުން އެޗްޑީސީއާ މިމަޝްރޫއު ހަވާލުކޮށްފައިވަނީ ޕާކިން ޒޯނާއި، ކޮމާޝަލް ޒޯނަށް ޖާގައެއް ކަނޑައެޅުމެއްނެތި ކަމަށެވެ. ހުޅުމާލޭގެ މައި މަގެއްގައި އިމާރާތް ކުރާ މިފްލެޓްތަކަށް ކޮމާޝަލް ޒޯނެއް ވަރަށް މުހިންމުވާނެ ކަމަށް ސުހައިލް ވިދާޅުވިއެވެ.
ކޮމާޝަލް ޒޯނަކާއި ނުލައި ފްލެޓްތައް އެޅުމަކީ އެޗްޑީސީގެ އުސޫލާއި ގައިޑްލައިންއާ ޚިލާފުކަމެއްކަން ފާހަގަކުރައްވައި ސުހައިލް ވިދާޅުވީ މިމަސައްކަތްތައް ކުރުމަށް އިތުރު ވަގުތު ނެގި ކަމަށާއި، އެހެންކަމުން މަޝްރޫއު ލަސްވެގެން ދިޔައީ ކަމަށެވެ. ސުހައިލް ވިދާޅުވީ މިމަސައްކަތްތައް ކުރުމަށް ދެގޮތަށް ޕްލޭން ކުރި ކަަމަށެވެ. އެއީ ފްލެޓްތަކުގެ އަދަދު މަދުކުރުން ނުވަތަ ލޯނު އިތުރު ކުރުން ކަމަށް އޭނާ ވިދާޅުވިއެވެ. އަދި ވިދާޅުވީ ވަރަށް ގިނަ މަޝްވަރާތަކަށްފަހު، ލޯނު ނެގުމަކީ އެންމެ ރަނގަޅު ގޮތް ކަމަށް ނުވާތީ ފްލެޓްތަކުގެ އަދަދު މަދުކޮށް މިހާރު ވެސް ނަގާފައިވާ ލޯނާއެކު، ޕާކިން ޒޯނާއި ކޮމާޝަލް ޒޯނު ހެދުން ކަމަށް ސުހައިލް ވިދާޅުވިއެވެ.
މިމަޝްރޫއު އެޗްޑީސީއާ ހަވާލުކުރިއިރު 1530 ފްލެޓް އަޅަން ނިންމި ނަމަވެސް މިހާރު އެ އަދަދު ވަނީ 1344 ފްލެޓަށް މަދުވެފައެވެ. އެއީ މުޅިން ވެސް 3 ކޮޓަރީގެ އެޕާޓްމަންޓްތަކެވެ. މި މަޝްރޫއުގައި 4 ބާވަތެއްގެ ޔުނިޓްތައް ހިމެނެއެވެ. އެއީ މެރީނާ ވިއު، އައުޓަރ ވިއު، އިނަރ ވިއު އަދި ސްޓޭންޑަރޑް ވިއު ފްލެޓްތަކެވެ.
