ގައިދީއަކު މަރުވުމާއި ގުޅިގެން ކަން ހިނގައިދިޔަގޮތުގެ ޓައިމްލައިން އާއްމުކޮށްފި

ހުޅުމާލެ ޖަލުގައި ގައިދީއަކު މަރުވުމާއި ގުޅިގެން ކަން ހިނގާ ދިޔަގޮތުގެ ޓައިމްލައިން އާއްމުކޮށްފިއެވެ.

ހޯމަ ދުވަހުގެ ރޭ އިރާކޮޅު ހުޅުމާލޭ ޖަލުގައި ގައިދީއަކު މަރުވުމާއި ގުޅިގެން މިޓައިމްލައިން ހަދާފައިވަނީ ސީީސީޓީވީ ފޫޓޭޖް، ޖަލު އޮފިސަރުން އަދި ގައިދީން ދީފައިވާ މައުލޫމާތުގެ މައްޗަށް ބިނާކޮށް ކަމަށް ހޯމް މިނިސްޓްރީން ބުނެއެވެ.

ހޯމް މިނިސްޓްރީން އާއްމުކޮށްފައިވާ ޓައިމްލައިންގައި ބުނެފައިވަނީ ހޯމަ ދުވަހުގެ ހަވީރު 5:55 ގައި މޭޒެއްގެ މަތީގައި އިށީނދެ އިންތަން ސީސީޓީވީން ފެނިފައިވާ ކަމަށާއި، 5:59 ގައި މޭޒު މަތިން އަނބުރައިގަނެގެން ވެއްޓިފައިވާ ކަމަށެވެ. ގައިދީއެއް ވަގުތުން ސީ.ޕީއާރ ދީފައިވާކަން ފާހަގަކޮށް ޓައިމްލައިންގައި ބުނެފައިވަނީ 6:02 ގައި އޮފިސަރުން ސީންއަށް އެޓެންޑް ކޮށްފައިވާ ކަމަށާއި، އެވަގުތު ގައިދީ ހޭނެތިފައިކަން ފާހަގަކުރެވުނު ކަމަށެވެ. އަދި 6:10 ހޮސްޕިޓަލަށް ގެންގޮސްފައިވާއިރު، ޑޮކްޓަރުން ވަގުތުން އެޓެންޑް ކުރި ކަމަށާއި، 6:30 ގައި އާއިލާ މެމްބަރުންނާއި ގުޅުމަށް ޕްރިޒަން އޮފިސަރުން މަސައްކަތް ފެށި ކަމަށެވެ.

މީގެ އިތުރުން ޓައިމްލައިންގައި ބުނެފައިވަނީ 6:42 އާއިލާ މެމްބަރަކާ ގުޅުނު ކަމަށާއި، 6:51 ގައި އިންސްޕެކްޓަރ އޮފް ކަރެކްޝަނަލް ސަރވިސް އަށް ރިޕޯޓު ކުރި ކަމަށެވެ. އަދި ގައިދީ 6:55 ގައި މަރުވެފައިވާ ކަމަށް ބުނެފައިވެއެވެ.

މިހާދިސާއާ ގުޅިގެން އިންސްޕެކްޓްރޭޓްގެ މުވައްޒަފުން ސީން އަށް ގޮސްފައިވަނީ 7:25 ގައެވެ.

އިންސްޕެކްޓަރ އޮފް ކަރެކްޝަނަލް ސަރވިސަސް އެމައްސަލަ ތަހުގީގު ކުރަމުންދާއިރު، އެގައިދީއަށް އަނިޔާކޮށްފައިވާ ކަމަށް ބުނެ އާއިލާއާ ހަވާލާދީ ފަތުރާ ޚަބަރަކީ ސައްހަ މައުލޫމާތެއް ނޫން ކަމަށް މޯލްޑިވްސް ކަރެކްޝަނަލް ސަރވިސް އިން ބުނެފައިވެއެވެ.