އިލެކްޓްރޯނިކް މުއާމަލާތާ ބެހޭ ބިލު ދިރާސާކުރުމަށް ގައުމީ ތަރައްގީއާއި ތަރިކައިގެ ކޮމިޓީއަށް
14 ސެޕްޓެމްބަރު 2021 | އަންގާރަ 08:42ކޮމިޓީއަށް ފޮނުވުމަށް ފާސްވީ ވޯޓުގައި ބައިވެރިވެވަޑައިގަތް 42 މެމްބަރުންގެ އިއްތިފާގުން
ގައުމީ ތަރައްގީއާއި ތަރިކައިގެ ކޮމިޓީގެ ބައްދަލުވުމެއްގެ ތެރެއިން
އިލެކްޓްރޯނިކް މުޢާމަލާތްތަކާ ބެހޭ ބިލު ދިރާސާ ކުރުމަށް ގައުމީ ތަރައްގީއާއި ތަރިކައިގެ ކޮމިޓީއަށް ފޮނުވައިފިއެވެ.
ކޮމިޓީއަށް ފޮނުވުމަށް ފާސްވީ ވޯޓުގައި ބައިވެރިވެވަޑައިގަތް 42 މެމްބަރުންގެ އިއްތިފާގުންނެވެ. ބިލު ހުށަހެޅުއްވީ، ސަރުކާރުގެ ފަރާތުން، ދިއްދޫ ދާއިރާގެ މެންބަރު ޢަބްދުﷲ ވަޙީދެއެވެ.
ސަރުކާރުން މި ބިލު ހުށަހެޅުމުގެ ބޭނުމަކީ، އިޤުތިޞާދީ އަދި އިޖްތިމާޢީ ކަންކަން ފަސޭހަކޮށް ތަރައްގީކުރުމަށްޓަކައި، ވިޔަފާރީގެ މުއާމަލާތްތައް ކުރުމަށާއި އެނޫން ބޭނުންތަކުގައި، އިލެކްޓްރޯނިކް ޒަރީއާއިން މުއާމަލާތުކުރުމާއި، އެފަދަ މުއާމަލާތުގެ ޞައްހަކަން ކަށަވަރުކުރެވޭނެ ނިޒާމެއް ގާއިމުކޮށް، އިލެކްޓްރޯނިކް ޒަރީޢާއިން މުއާމަލާތު ކުރުމުގައި އަމަލުކުރާނެ އުސޫލުތައް ބަޔާންކޮށް، ޓްރަސްޓް ޚިދުމަތްތަކުގެ އުސޫލުތައް ކަނޑައެޅުން ކަމަށެވެ.
ބިލުގެ ބަހުސް މަރުހަލާގައި މެމްބަރުން ވިދާޅުވެފައިވަނީ އިލެކްޓްރޯނި މުއާމަލާތްތަކާ ބެހޭ ގާނޫނަކީ ތަރައްގީގެ ނަމުގައި ރާއްޖެއިން އަޅާ ވަރަށް މުހިއްމު ފިޔަވަޅެއް ކަމަށެވެ. ޚަރަދު ކުޑަކޮށް ވިޔަފާރިތައް ހިންގުމަށް އޮންނަ ޕްރެޝަރު ދުނިޔޭގައި ވެސް ބޮޑުވަމުން އަންނައިރު، ރާއްޖޭގައި ވިޔަފާރިތައް މި ގޮތަށް ހިންގުމަށް އޮތް އެންމެ ބޮޑު ހުރަހަކީ، ރާއްޖޭގައި އިލެކްޓްރޯނިކް މުއާމަލާތާ ބެހޭ ގާނޫނެއް ނެތުން ކަމަށާއި، ބިލުގެ ޒަރިއްޔާއިން މި ކަންކަމަށް ހައްލު ލިބިގެންދާނެ ކަންވެސް މެމްބަރުން ވިދާޅުވިއެވެ. މި ބިލު ގާނޫނެއްގެ ގޮތުގައި ވުޖޫދުވެގެން އަންނައިރު، އިލެކްޓްރޯނިކް ޒަރިއްޔާއިން ދެފަރާތުގެ ދެމެދުގައި ވެވޭ އެއްބަސްވުންތަކަށް ގާނޫނީ ހައިސިއްޔަތު ލިބިގެންދާނެއެވެ.
ބިލުގެ މަޤްޞަދުތަކުގެ ތެރޭގައި ވެސް އިލެކްޓްރޯނިކް ސޮއި އަދި ޓްރަސްޓްގެ ޚިދުމަތްތައް ހިމެނޭގޮތަށް، ދިވެހިރާއްޖެއާއި ދިވެހިރާއްޖޭން ބޭރުގައި ކުރެވޭ އިލެކްޓްރޯނިކް މުޢާމަލާތްތަކުގެ ޞައްހަކަން ގާނޫނީ ގޮތުން ކަށަވަރުކޮށްދިނުން ހިމެނެއެވެ. އަދި ދިވެހިރާއްޖެއާއި ދިވެހިރާއްޖޭން ބޭރުގައި އިލެކްޓްރޯނިކް މުއާމަލާތްތައް ހިންގުމަށް މަގުފަހިކޮށްދީ، އެކަންކަމަށް ގާނޫނީ ގޮތުންހުރި ހުރަސްތައް ނައްތާލުން ވެސް މި ބިލުގެ މަޤްޞަދުތަކުގެ ތެރޭގައި ހިމެނެއެވެ.
ޑޭޓާ މެސެޖަކަށްވީތީ ހަމައެކަނި އެ ސަބަބުގެ މައްޗަށް ބިނާކޮށް ޝަރީޢަތެއްގައި ޑޭޓާ މެސެޖެއް ހެކީގެ ގޮތުގައި ބަލައިނުގަނެވޭނެ ގޮތަށް ހެއްކާބެހޭ އުސޫލުތައް ތަތުބީގުކޮށްގެން ނުވާނެ ކަމަށާއި، ޑޭޓާ މެސެޖެއްގެ ސިފައިގައިވާ މައުލޫމާތަށް ދޭންޖެހޭ ހެކީގެ ބުރަދަން ކަނޑައެޅުމުގައި އަމަލުކުރާނީ، ހެއްކާބެހޭ ގާނޫނުގައިވާ ގޮތުގެމަތިން ކަމަށްވެސް ބިލުގައި ބަޔާން ކޮށްފައިވެއެވެ.
