ފެލިދޫ ގިރާ ސަރަހައްދު ހިމާޔަތްކޮށްދިނުމަށް ގޮވާލައި ހުށަހެޅި ގަރާރު ބޭރުކޮށްލައިފި

ވ. ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދު ހުށަހެޅުއްވި، ވ. ފެލިދޫ ގިރާ ސަރަހައްދު ހިމާޔަތްކޮށްދިނުމަށް ގޮވާލައި ހުށަހަޅާ ގަރާރު މަޖިލީހުން ބޭރުކޮށްލައިފިއެވެ.

މައްސަލައަށް ބަހުސް ކުރުމަށް ބަލައިގަންނަން ވޯޓު ދެއްވީ 8 މެމްބަރުންނެވެ. ނުފެންނަ ކަމަށް ވޯޓު ދެއްވީ 10 މެމްބަރުންނެވެ. ވަކިގޮތަަކަށް ވޯޓު ނުދެއްވާ އެއް މެމްބަރަކު އިންނެވިއެވެ. ގަރާރަށް ބަހުސްކުރުމަށް ބަލައިގަންނަން 10 މެމްބަރުންގެ ވޯޓު ބޭނުންވެއެވެ. އެހެންކަމުން ބަހުސްކުރުމަށް ބަލައިގަންނަން ފާސް ނުވުމުން ގަރާރު މަޖިލީހުން ބޭރުކޮށްލީއެވެ.

Advertisement

ފަޒުލް ހުށަހެޅުއްވި ގަރާރުގައި ބުނެފައިވަނީ، ވ. ފެލިދޫގެ ގިރާ ސަރަހައްދު އާދަޔާ ޚިލާފަށް ގިރަމުން ދިއުމުގެ ސަބަބުން ރައްޔިތުންނަށް ގިނަ ގުނަ ދަތިތަކާ ކުރިމަތިވެ، ތިމާވެށީގެ ގޮތުން ރަށަށް ބޮޑެތި ގެއްލުންތަކެއް ލިބެމުންދާ ކަމަަށެވެ. އެހެންކަމުން، ފެލިދޫގެ ގިރާ ސަރަޙައްދު ހިމާޔަތް ކޮށްދިނުން އަވަސްކުރުމަށް ސަރުކާރުން ޚާއްޞަ ސަމާލުކަމެއް ދިނުމަށް އިލްތިމާސް ކުރާ ކަމަށެވެ.

ވ. އަތޮޅު ފެލިދޫ އާދަޔާ ޚިލާފަށް ގިރަމުންދިއުމުގެ ސަބަބުން، ރަށުގެ ތިމާވެއްޓަށް ކުރިމަތިވެފައިވާ ނާޒުކު ހާލަތުގެ ސަބަބުން ފެލިދޫގެ ރައްޔިތުންނަށް ބިރުވެރިކަން ކުރިމަތިވެ، ހޮސްޕިޓަލާއި، ސްކޫލާއި ރައްޔިތުންގެ ގޯތިގެދޮރަށް ކުރިމަތިވެފައިވާ ނުރައްކަލުގެ ސަބަބުން އެފަރާތްތަކުގެ ދިރިއުޅުމަށް ކުރިމަތިވެފައިވާ ގޮންޖެހުންތައް ބޮޑު ކަމަށް ގަރާރުގައި ބުނެފައިވެއެވެ. ފެލިދޫގެ ރީތިކަމާއި ގުދުރަތީ ގޮނޑުދޮށްހަލާކުވެ، ރަށްގިރުމުގެ ސަބަބުން ރަށުގެ ރައްޔިތުންނަށް ވަރަށް ބޮޑު ތަކުލީފެއް އުފުލަންޖެހިފައިވާކަމަށާއި، ގިރާ ސަރަޙައްދު ހިމާޔަތްކުރުމުގެ މަސައްކަތް މިއަހަރުގެ ބަޖެޓުގައި ހިމެނިފައިވީނަމަވެސް އެކަންވެސް ނުފެށި ލަސްވަމުންދާ ކަމަށް ފާހަގަކޮށްފައިވެއެވެ.

ފެލިދޫގެ ތިމާވެއްޓަށް ކުރިމަތިވެފައިވާ މައްސަލަ ހައްލުކޮށްދެއްވުމަށް ސަރުކާރުގެ ކަމާބެހޭ އިދާރާތަކުން އެޅުއްވެން ހުރި ހުރިހާފިޔަވަޅެއް އަޅުއްވާ ދެއްވައި، ފެލިދޫގެ ރައްޔިތުންނަށް ސަލާމަތްތެރިކަމާއި، ރައްކާތެރި މާހައުލެއް ހޯއްދަވައި ދެއްވުމަށް ކުރައްވަންޖެހޭކަންކަން ވީހާވެސް އަވަސް ކޮށްދެއްވުމަށް ސަރުކާރަށް އިލްތިމާސް ކުރުމަށްޓަކައި ހުށަހަޅާ ގަރާރެއް ކަމަށްވަނީ ބުނެފައެވެ.