ޚާއްސަ އިޤްތިޞާދީ ސަރަހައްދުން، ބޭރުގެ 2 މަސްބޯޓު އަތުލައިގެންފި

ރާއްޖޭގެ ޚާއްސަ އިޤްތިޞާދީ ސަރަހައްދަށް ވަދެގެން އުޅުނު ބޭރުގެ 2 މަސް ބޯޓެއް އަތުލައިގެންފިއެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ބުނީ ރާއްޖޭގެ ޚާއްސަ އިގްތިސާދީ ސަރަހައްދަށް ވަދެގެން އުޅުނު ބޭރުގެ 2 މަސް ބޯޓެއް އެމްއެންޑީއެފް ކޯސްޓް ގާޑުގެ ބެލުމުގެ ދަށަށް ގެންގޮސްފައިވާކަމަށެވެ.

Advertisement

މި ދެ ބޯޓުގެ ތެރެއިން ފުރަތަމަ ބޯޓު ކޯސްޓް ގާޑުގެ ބެލުމުގެ ދަށަށް ގެނެސްފައިވަނީ ސެޕްޓެމްބަރު 11ވީ ހޮނހިރު ދުވަހުގެ ހަވީރު 17:55ހާއިރު ކަމަށް އެމްއެންޑީއެފުން ބުނެފައިވެއެވެ. ދެވަނަ ބޯޓު ފެނިފައިވަނީ ސެޕްޓެމްބަރު 12ވީ އާދީއްތަ ދުވަހުގެ ފަތިހު 05:34ހާއިރު ކަމަށް އެމްއެންޑީއެފުން ބުނެފައިވެއެވެ. މި ދެބޯޓަކީ ކޮން ގައުމަކަށް ނިސްބަތްވާ ބޯޓުތަކެއް ކަމެއް އެމްއެންޑީއެފުން ބުނެފައެއް ނުވެއެވެ.

މި އޮޕަރޭޝަން ކުރިއަށްގެންދިއުމަށް "އަސުރުމާ 3" ދޯނީގެ ވަރަށް ބޮޑު އެހީތެރިކަމެއް ކޯސްޓް ގާޑަށް ލިބިފައިވާކަމަށް އެމްއެންޑީއެފުން ބުނެފައިވެއެވެ.

ދާދި ފަހުންވެސް ރާއްޖޭގެ ޚާއްސަ އިޤްތިޞާދީ ސަރަހައްދުގައި ގަވައިދާ ޚިލާފަށް މަސްވެރިކަން ކުރަމުންދިޔަ މަސް ބޯޓެއް ވަނީ އެމްއެންޑީއެފްގެ ބެލުމުގެ ދަށަށް ގެނެސްފައެވެ. މި ބޯޓު އެމްއެންޑީއެފްގެ ބެލުމުގެ ދަށަށް ގެނެސް، 4 ލައްކަ ރުފިޔާއިން ބޯޓުގެ ވެރިފަރާތް ޖޫރިމަނާކޮށްފައިވެއެވެ.