ހިޔާ ފްލެޓްގެ ޕެޓިޝަނާ ގުޅިގެން ކޮމިޓީން ރައީސާ ބައްދަލުކުރަން ނިންމައިފި

ހިޔާ ފްލެޓްގެ ޕެޓިޝަނާ ގުޅިގެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާ ބައްދަލުކުރެއްވުމަށް ޕެޓިޝަން ކޮމިޓީން ނިންމައިފިއެވެ.

ހޯމަ ދުވަހު ބޭއްވި ޕެޓިޝަން ކޮމިޓީގެ ބައްދަލުވުމުގައި މިގޮތަށް ފާސްކޮށްފައި މިވަނީ، ކުލި ކުޑަކުރެވޭނީ ސަރުކާރުން އެކަމާމެދު ދެކޭ ގޮތް އެނގިގެން ކަމަށް މެމްބަރުން ހުށަހެޅުއްވުމުންނެވެ. މެމްބަރުން ވިދާޅުވީ، ރައީސްގެ ލަފާފުޅެއް ނެތި ޕެޓިޝަންގައި ޑިމާންޑް ކޮށްފައިވާ ކަންކަމަށް އެއްވެސް ބަދަލެއް ނުގެނެވޭނެ ކަމަށާއި، ރައީސުލްޖުމްހޫރިއްޔާއަކީ ރައްޔިތުންނާ ގުޅުންހުރި ކަންކަމުގައި އިސްކަން ދެއްވާ ބޭފުޅެއް ކަމުން ރައީސާ ބައްދަލުކުރަން ޖެހޭ ކަމަަށެވެ. ރައީސާ ބައްދަލުކުރުމަށް ހުށަހެޅި ހުށަހެޅުން މެމްބަރުންގެ އިއްތިފާގުން ފާސްވީ ރައީސަށް ފަސޭހަފުޅު ވަގުތެއްގައި ކޮމިޓީއާ ބައްދަލުކުރެއްވުމަށެވެ.

ޕެޓިޝަންގައި ޑިމާންޑް ކޮށްފައިވާ ކުއްޔަކީ މިހާރުގެ މޭޔަރ ޑރ. މުހައްމަދު މުއިއްޒު ހައުސިންގ މިނިސްޓަރު ކަމުގައި ހުންނެވިއިރު، ކުލީގެ އަދަދުގެ ގޮތުގައި ކަނޑައަޅުއްވާފައިވާ އަގު ކަމުން، އެކަމާ މެދު މަޝްވަރާ ކުރެވޭނީ މޭޔަރ ކޮމިޓީއަށް ހާޒިރުވާ ދުވަހަކުން ކަމަށް ވެސް މެމްބަރުންވަނީ ފާހަގަކުރައްވާފައެވެ.

ރައްޔިތުންގެ މަޖިލީހަށް ހިޔާ ފްލެޓާ ގުޅިގެން ހުށަހަޅާފައިވާ ޕެޓިޝަންގައި މައިގަނޑު 3 ކަމަކަށް ޑިމާންޑް ކޮށްފައިވެއެވެ. އެގޮތުން ފްލެޓްގެ ކުލި 5،600 އަށް ކުޑަކުރުމާއި، ފްލެޓްގެ ފިނިޝިންގއަށް ދީފައިވާ މުއްދަތު 12 މަސްދުވަހަށް އިތުރުކޮށްދިނުމާއި، ފްލެޓްގެ ޖުމްލަ ކުލިން އެއްލައްކަ ރުފިޔާ ކުޑަކުރުމަށް ވަނީ ޕެޓިޝަންގައި ޑިމާންޑްކޮށްފައެވެ.

މިކަމާ ގުޅިގެން ބޭއްވި ޕެޓިޝަން ކޮމިޓީގެ ފުރަތަމަ ބައްދަލުވުމުގައި މި ޕެޓިޝަަން ކޮމިޓީއަށް ބަލައިގަނެ ދިރާސާ ކުރުމަށްފަހު, ރައްޔިތުންނަށް ދިމާވެފައިވާ ކަންބޮޑުވުމަށް ހައްލު ހޯދައި ދިނުމަށް ކުރެވެން ހުރި ކަމެއް ކުރުމަށް ވަނީ ނިންމާފައެވެ. ޕެޓިޝަން ބަލައިގެންފައިވާއިރު އިތުރު ހުށަހެޅުންތަކެއް ވެސް ހުށަހަޅައި ކޮމިޓީން ވަނީ ފާސްކޮށްފައެވެ. އެގޮތުން ހޯރަފުށީ ދާއިރާގެ މެމްބަރު އަޙުމަދު ސަލީމު ވަނީ ޕެޓިޝަންގައި ހިމަނާފައިވާ ކަންކަން ދިރާސާކުރުމުގެ ގޮތުން ބައެއް ބޭފުޅުން ކޮމިޓީއަށް ހާޒިރު ކުރުމަށް ވެސް ހުށަހަޅުއްވާފައެވެ. ކޮމިޓީއަށް ހާޒިރު ކުރުމަށް މެމްބަރު ސަލީމު ހުށަހަޅުއްވާފައިވާ ބޭފުޅުންނަކީ، ހައުސިންގ ޑިވެލޮޕްމެންޓް ކޮޕަރޭޝަންގެ މެނޭޖިންގ ޑިރެކްޓަރ، ކުރީގެ ހައުސިން މިނިސްޓަރ، މިހާރުގެ ހައުސިންގ މިނިސްޓަރ، ރައީސް އޮފީހުގެ ޕޮލިސީ ޑިޕާރޓްމެންޓްގެ އިސް ބޭފުޅެއް، ފިނޭންސް މިނިސްޓަރ، ޕޮލިސް ކޮމިޝަނަރ، ވެމްކޯގެ އެމްޑީ، އެޗްޑީއެފްސީގެ އެމްޑީގެ އިތުރުން ޕެޓިޝަން ހުށަހެޅި ބޭފުޅުންނެވެ. މެމްބަރ ސަލީމް ވަނީ މި ހުރިހާ ބޭފުޅުން ވެސް އެއް ބައްދަލުވުމަކަށް ހާޒިރުކުރުމަށް ހުށަހަޅުއްވާފައެވެ.

ޕެޓިޝަން ހުށަހަޅާފައިވަނީ ދެހާހަށްވުރެ ގިނަ މީހުންގެ ސޮޔާއެކުގައެވެ. މެމްބަރުން ވިދާޅުވީ 2،177 މެމްބަރުންގެ ސޮޔާއެކު ހުށަހެޅި ނަމަވެސް މިއީ ގާތްގަނޑަކަށް ތިރީސް ހާހެއްހާ މީހުންގެ ކަންބޮޑުވުން ކަމަށެވެ. މިކަމަކީ ބަޔަކު މީހުން ވެފައިވާ އިހުމާލެއްގެ ސަބަބުން ނުކުމެފައިވާ މައްސަލައެއްކަން ކޮމިޓީގެ މެމްބަރުން ފާހަގަކުރެއްވިއެވެ. މީގެކުރިން ވެސް ކުލި ކުޑުކުރުމަށް އެދި ހިޔާ ފްލެޓް ލިބުނު މީހުން އެދިފައިވާކަމަަށާއި، މިކަމަށް ކުރެވެން އޮތީ ކޮންކަމެއްތޯ ބަލަން ޖެހޭ ކަމަށެވެ.

ހިޔާ ފްލެޓް އެވޯޑްކުރުމުގައި ބަޔަކަށް މާލީ މަންފާއެއް ލިބިފައިވޭތޯ ބަލަން ޖެހޭ ކަމަަށާއި، އެފަދަ މަންފާއެއް ލިބިފައިވާނަމަ އެކަން ރަނގަޅަށް ބަލައި ފިޔަވަޅު އެޅެން ޖެހޭ ކަމަށް މެމްބަރުން ވިދާޅުވިއެވެ.

ހިޔާ ފްލެޓްގެ ކުލި އެންމެ ކުޑަކުރެވޭނެ މިންވަރަށް ކުޑަކޮށްފައިވާކަމަށް ޕްލޭނިންގ މިނިސްޓަރ މުޙައްމަދު އަސްލަމް ވަނީ ވިދާޅުވެފައެވެ. އެމަނިކުފާނު ވިދާޅުވެފައިވަނީ ކުރީގެ ސަރުކާރުން ފްލެޓްގެ ކުލި ކަނޑައެޅުމަށް ހިސާބު ހެއްދެވީ ގޯސްކޮށް ކަމަށެވެ. މެއިންޓެނެންސް ފީއާއެކު ފްލެޓްގެ އަގުގެ ގޮތުގައި ކަނޑައަޅާފައިވަނީ 8،500 ރުފިޔާއެވެ.