އިންސާނީ ވަގުފާރީގެ ކަންކަން މިހާރު ނުހިނގާ - ފައްޔާޒު
2019 ވަނަ އަހަރުން ފެށިގެން މިހާތަނަށް ބަންގްލަދޭޝުން ރާއްޖެއަށް އައިސްފައިވަނީ 11،113 މީހުން
ފައްޔާޟް އިސްމާޢީލް - މިނިސްޓަރ އޮފް އިކޮނޮމިކް ޑިވެލޮޕްމަންޓް
ރާއްޖޭގައި މިހާރު އިންސާނީ ވަގުފާރީގެ ކަންކަން ނުހިނގާ ކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޟް އިސްމާޢީލް ވިދާޅުވެއްޖެއެވެ.
ރައްޔިތުންގެ މަޖިލީހުގެ ހޯމަދުވަހުގެ ޖަލްސާގައި މެމްބަރުންގެ ސުވާލުތަކަށް ޖަވާބުދެއްވަމުން މިނިސްޓަރ ވިދާޅުވީ، ރާއްޖޭގައި މިހާރު އިންސާނީ ވަގުފާރީގެ ކަންކަން ނުހިނގާ ކަމަށެވެ. މިއީ މިކަން ހުއްޓުވުމަށް ސަރުކާރުން އެޅި މުހިއްމު ފިޔަވަޅުތަކުގެ ނަތީޖާ ކަމަށް މިނިސްޓަރު ވިދާޅުވިއެވެ. އިންސާނީ ވަގުފާރީގެ ކަންކަން ރާއްޖޭގައި ބޮޑަށް ހިނގަމުން ދަނީ ބަންގްލަދޭޝް މީހުން ގެނެސްގެން ކަމަށާއި، މި ސަރުކާރު ވެރިކަމަށް އައި ފަހުން ބަންގްލަދޭޝުން ރާއްޖެއަށް އެތެރެވި މީހުންގެ އަދަދު މަދުވެފައިވާ ކަމަަށް ވިދާޅުވިއެވެ. އެގޮތުން 2019 ވަނަ އަހަރުން ފެށިގެން މިހާތަނަށް ބަންގްލަދޭޝުން ރާއްޖެއަށް އައިސްފައިވަނީ 11،113 މީހުންކަން މިނިސްޓަރު ފާހަގަކުރެއްވިއެވެ. މި އަދަދުތައް އޭގެ ކުރީ އަހަރުތަކުގައި ހުރީ ކޮންމެ އަހަރަކު 11،000ން މަތީގައި ކަމަށް މިނިސްޓަރ ވިދާޅުވިއެވެ.
2018 ގައި ރާއްޖެ އޮތީ ޔޫއެސް ވޮޗް ލިސްޓްގައި ހިމެނިފައި ކަމަށާއި، ކުރެވުނު މަސައްކަތުން ޓިއާ 3ށް ދިޔުމުން ސަލާމަތް ކުރެވުނު ކަމަށް މިނިސްޓަރު ވިދާޅުވިއެވެ. އިންސާނީ ވަގުފާރިއާ ދެކޮޅަށް މަސައްކަތް ކުރުމަށް އެންޓި ޓްރެފިކިންގ ކޮމިޓީ އަލުން އުފެދިގެން އައިސް، ބަދަލުތަކެއް ގެނެވިފައިވާ ކަމަށެވެ. އައު އެކްޝަން ޕްލޭނެއް ފާސް ކުރެވި، އެއަށް އަމަލު ކުރަން ފަށާފައިވާ ކަމަށް ވެސް ވިދާޅުވިއެވެ.
އިންސާނީ ވަގުފާރީގެ ޝިކާރައަކަށްވާ މީހުން ބެހެއްޓުމަށް ގުޅިފަޅުގައި ޚާއްސަ ތަނެއް ހަދާފައިވާ ކަމަށް ވެސް މިނިސްޓަރ ވިދާޅުވިއެވެ.
މިހާރު ހުރި އެންމެ ބޮޑު ގޮންޖެހުމަކީ ވަސީލަތްތައް ނެތުން ކަން ފާހަގަ ކުރައްވަމުން މިނިސްޓަރ ވިދާޅުވީ، ވަސީލަތްތައް ގާއިމް ކުރުމުގެ މަސައްކަތް ކުރައްވަމުން އަންނަ ކަމަށެވެ. ފުރަތަމަ މަސައްކަތް ފަށައިގަތްއިރު ހުރީ އެންމެ އިންސްޕެކްޓަރެއް ކަމަށާއި، މިހާރު އެ އަދަދު 7ށް އިތުރު ކުރެވިފައިވާ ކަމަށް ވިދާޅުވިއެވެ. އިތުރު 18 މީހުން މަސައްކަތަށް ނެރުމަށް މަސައްކަތް ކުރައްވަމުން ގެންދަވާކަމަށްވެސް ވިދާޅުވިއެވެ.
މިނިސްޓަރ ވިދާޅުވީ، އިންސާނީ ވަގުފާރީގެ ކަންކަމުގައި ފުލުހުންގެ ފަރާތުންވެސް އެކަށީގެންވާ އެއްބާރުލުމެއް ލިބެމުން ނުދާ ކަމަށެވެ. މިހާ ހިސާބަށް ހޯދުނު ހޯދުންތަކުން 281،000 ބިދޭސިން ރާއްޖޭގައި އުޅެމުންދާކަމަށް ތަފާސްހިސާބުތަކުން ދައްކައެވެ.
