ކޯޓުތަކުގެ މިނިވަންކަން ކަށަވަރުކުރުމަށް ވަކި ތަސައްވުރެއް ކަނޑައެޅި، މަސައްކަތްތައް ކުރެވޭ: ހިސާން
ކޯޓުތަކުގެ ހިންގުން ހަރުދަނާކުރުމުގެ ގޮތުން ވަރަށް ގިނަ މަސައްކަތްތައް ކުރެވޭ
ޖޭއެސްސީގެ ރައީސް އަދި ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިން
ކޯޓުތަކުގެ މިނިވަންކަން ކަށަވަރުކުރުމަށް ވަކި ތަސައްވުރެއް ކަނޑައެޅިފައިވާ ކަމަށާއި، އެ ތަސައްވުރު ހާސިލްކުރުމަށް ޚާއްސަ އިސްކަމެއްދީގެން މަސައްކަތްތައް ކުރަމުންދާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ)ގެ ރައީސް އަދި ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިން ވިދާޅުވެއްޖެއެވެ.
އާދިއްތަ ދުވަހު ފަނޑިޔާރުންނާއި މެޖިސްްޓްރޭޓުން ހުވާކުރުމަށް ބޭއްވި ޚާއްސަ ރަސްމިއްޔާތުގައި ހިސާން ވިދާޅުވީ ރާއްޖޭގެ ކޯޓުތަކުގެ ހިންގުން ހަރުދަނާކުރުމުގެ ގޮތުން ވަރަށް ގިނަ މަސައްކަތްތައް ކުރަމުންދާ ކަމަށެވެ. އެގޮތުން ޖޭއެސްސީން ކުރި އެންމެ މުހިންމު އެއް މަސައްކަތަކީ ކޯޓުތަކަށް ފަނޑިޔާރުން އައްޔަންކުރުމުގެ އުސޫލު އިސްލާހު ކުރުން ކަމަށް ހިސާން ވިދާޅުވިއެވެ.
ކޯޓުތަކުގެ މިނިވަންކަމަށް އިޝާރަތް ކުރައްވައި ހިސާން ވިދާޅުވީ ކޯޓުތައް މިނިވަންނުވެ އަދުލުވެރި ނިޒާމެއް ގާއިމްނުކުރެވޭނެ ކަމަށާއި، ރައްޔިތުންނަށް އަދުލްއިންސާފު ނުލިބޭނެ ކަމަށެވެ. ގައުމެއްގައި އެންމެ މުހިންމު އެކައްޗަކީ އިންސާފު ކަމަށާއި، އިންސާފު ނެތްތަނެއްގައި އަމާންކަމެއް ނޯންނާނެ ކަމަށް ހިސާން ވިދާޅުވިއެވެ. ހިސާން ވިދާޅުވީ ކޯޓުތައް ފުރިހަމަ ގޮތުގައި ހިންގާ ކޯޓުތަކުގެ މިނިވަންކަން ކަށަވަރުކުރުމަށް ވަކި ތަސައްވުރެއް ކަނޑައެޅިފައިވާކަމަށެވެ. އަދި ޖޭއެސްސީން އަަމަލުކުރަމުން އަންނަނީ އެ ތަސައްވުރު ތަންފީޒު ކުރުމަށް ކަމަށް ހިސާން ވިދާޅުވިއެވެ.
އެގޮތުން ފަނޑިޔާރުން އައްޔަންކުރުމުގައި ޖޭއެސްސީން ގެންގުޅުނު އުސޫލުތައް ބަދަލުކޮށް، އިސްލާހު ކޮށްފައިވާ ކަމަށް ހިސާން ވިދާޅުވިއެވެ. ފަނޑިޔާރުން އައްޔަން ކުރުމުގައި ވަރަށް ގިނަ ކަންތައްތަކަށް ބަލައި، ވަރަށް ގިނަ ކަންތައްތަކަށް ރިއާޔަތްކުރާކަން ހިސާން ފާހަގަކުރެއްވިއެވެ. އޭގެތެރޭގައި ފަނޑިޔާރުންގެ ގާބިލުކަމުގެ އިތުރުން އިލްމީ ފެންވަރާއި، ތަޖުރިބާ، ސުލޫކަށް އަދި އަޚުލާގީ މިންގަނޑަށް ބަލާ ކަމަށް އޭނާ ވިދާޅުވިއެވެ. އަދި އިންޓަވިއުއާ ހަމައަށް ދެވޭނީ އެހުރިހާ ކަމަކުން ފާސްވުމަށްފަހު ކަމަށް ހިސާން ވިދާޅުވިއެވެ.
ހިސާން ވިދާޅުވީ މިބަދަލުތަކާއެކު، ޖުޑިޝަރީއަށް ރައްޔިތުންގެ އިިތުބާރު މިހާރު ލިބެމުންދާ ކަމަށެވެ. އަދި ފަނޑިޔާރުންގެ ކިބައިން ވެސް ގިނަ އުންމީދުތައް ކުރާ ކަމަށާއި، ކޯޓުތަކުގެ މިނިވަންކަން ނަގަހައްޓާ ގާނޫނު ތަންފީޒު ކުރާނެކުރާނެ ކަމަށް އުންމީދުކުރާ ކަމަށް ހިސާން ވިދާޅުވިއެވެ.
