ޕައިލެޓުންނާއި ކެބިންކްރޫއިންގެ ޑިމާންޑަކީ 100 އިންސައްތަ މުސާރަ ބޮޑުކުރުން
ޕައިލެޓުންނަށް މިހާރު ލިބޭ މުސާރަ ކުޑަ ނޫން ކަމަށް މޯލްޑިވިއަންގައި މަސައްކަތް ކުރާ ޕައިލެޓަކު ވަނީ ބުނެފައި
މޯލްޑިވިއަންގެ ސީ ޕްލޭނެއް މަލިކުގައި މަޑުކޮށްގެން
އައިލެންޑް އޭވިއޭޝަން ސަރވިސަސް (އައިއޭއެސް)އިން ހިންގާ ގައުމީ އެއާލައިން، މޯލްޑިވިއަންގެ ޕައިލެޓުންނާއި ކެބިންކްރޫއިންގެ ޑިމާންޑަކީ 100 އިންސައްތަ މުސާރަ ބޮޑުކުރުން ކަމަށް ރާއްޖެއެމްވީއަށް އެނގިއްޖެއެވެ.
ރާއްޖެއެމްވީއަށް މައުލޫމާތު ދެމުން މޯލްޑިވިއަންގެ ޕައިލެޓަކު ބުނީ މަންތާ އެއަރއިން ވަޒީފާ އިއުލާނު ކުރުމުން 7 ޕައިލެޓުން ވަޒީފާއިން ވަކިވާން ސިޓީ ހުށަހެޅި ކަމަށާއި އޭގެތެރެއިން ފަސް ޕައިލެޓުން ވަޒީފާ ދޫކޮށް ދިޔަ ކަމަށެވެ. އަދި ދެ ޕައިލެޓުން މަޑުކޮށްފައިވާ ކަމަށެވެ.
މި ދަނޑިވަޅުގެ ބޭނުން ހިފައި, ޑޭޝެޑްގައި ހިމެނޭ ބައެއް މުވައްޒަފުން މުސާރަ 80 އިންސައްތަ ބޮޑުކޮށްދޭން ސަރުކާރުން ނިންމި ނަމަވެސް އެ މުވައްޒަފުން ޑިމާންޑު ކުރަމުންދަނީ 100 އިންސައްތަ މުސާރަ ބޮޑުކޮށްދިނުމަށް ކަމަށް އޭނާ ބުންޏެވެ.
އޭނާ ބުނީ ފަސްޓް އޮފިސަރުންނަށް މުސާރަ ކުޑަ ކަމަށާއި މަހެއްގެ މައްޗަށް 13000 ރުފިޔާ ލިބޭ ކަމަށެވެ. އަދި ޕައިލެޓަކު 50 ގަޑިއިރު ފްލައިކުރި ނަމަވެސް މިހާރު ވެސް މުސާރައިގެ ގޮތުގައި ގެއަށް ގެންދަން މަދުވެގެން 90،000 ރުފިޔާ ލިބޭ ކަމަށް އެމީހާއަށް ބުންޏެވެ. އަދި ފުލް މުސާރައާ އެއްކޮށް މި އަދަދު އެއްލައްކަ ފަންސާސް ހާހަށް ވުރެން މައްޗަށް އަރާނެ ކަމަށް ވަނީ ބުނެފައެވެ.
އޭނާ ބުނީ އެ މުވައްޒަފުންގެ މައިގަނޑު ޑިމާންޑަކީ ރާއްޖެއަށް އަންނަ ފަތުރުވެރިންގެ އަދަދު އިތުރުވުމުން ޓޫރިޒަމް ރަނގަޅުވުން ކަމަށާއި އެހެންނަމަވެސް އެ އަދަދު އަސްލު ބޮޑުވަނީ އިންޑިއާއިން އަންނަ ފަތުރުވެރިންނާއެކު ކަމަށް އެ މީހާ ވަނީ ބުނެފައެވެ.
ބައެއް މުވައްޒަފުންގެ މި ޑިމާންޑުތަކާ ގުޅިގެން ސަރުކާރުން އެ މީހުންނާ ބައްދަލުކޮށް، ބޯޑު މީޓިންގ ބާއްވާފައިވާ ކަމަށް ވެސް ވަނީ ބުނެފައެވެ. މިއީ ސިޔާސީ ކަމެއްގެ ގޮތުގައި އެމީހާ ވަނީ ސިފަކޮށްފައެވެ.
މިކަމުގައި ބައިވެރިވާ ޕައިލެޓުން ބުނި ގޮތުގައި، އޭރުގެ ހާލަތަށް ބަލައި އެކަމުގައި އެމީހުން އެއްވެސް ޝަކުވާއެއް ކޮށްފައެއް ނުވާނެއެވެ. އަދި ޤައުމީ ހިދުމަތެއްކަމުގައި ދެކިގެން ކޮވިޑްގެ ހާލަތުގައިވެސް މީހުން އެކި ތަންތަނަށް އުފުލުމާއި، ވެކްސިން އަދި މެޑިކަލް އިކުއިޕްމެންޓްފަދަ ތަކެތި އުފުލުމުގައިވެސް އެ ޕައިލެޓުން ހަރަކާތްތެރިވެފައިވެއެވެ. ކޮވިޑާ ގުޅިގެން މުސާރަ ކުޑަކުރުމަށްފަހު, ފަހުން އިތުރު ކުރީ 30 ޕަސެންޓް ކަމަށާއި، އެއީ ދިގުމުއްދަތަކަށް ކިޔަވައިގެން އަދި އެފަދަ މަސައްކަތަކަށް އެއްވެސް ވަރަކަށް އެކަށޭނަ މުސާރައެއް ނޫން ކަމަށް ވަނީ ބުނެފައެވެ.
މިކަމުގައި ހުރި ހިތްހަމަނުޖެހުންތަކާއެކު ޕައިލެޓުން ވަނީ އެ މީހުންގެ މުސާރަ ކުރިން ހުރިވަރަށް ބަދަލުކުރުމަށް އެއްބަސްވެފައިވާތީ އެކަން އެގޮތަށް ކުރާނެކަމުގެ ޔަގީންކަން ދެއްވުމަށް އެދި އައިލެންޑް އޭވިއޭޝަންގެ މެނޭޖިން ޑިރެކްޓަރަށް ސިޓީއެއް ފޮނުވާފައެވެ. އަދި ސެޕްޓެމްބަރު 12 ވަނަ ދުވަހުގެ 16:00 އަށް, ޕައިލެޓުންނާއެކު އެއްބަސްވެފައިވާ ގޮތަށް، ކަންކަން ނުދާނަމަ އުދުހުން ހުއްޓާލާނެކަމަށްވެސް ޕައިލެޓުން ބުނެފައިވެއެވެ.
